പുഴക്കരയിൽ നിന്ന് കിട്ടിയ കുറിപ്പ് മാറ്റിയത് ഒരു ജീവിതം; അപ്രതീക്ഷിതമായി പണം തിരികെ ലഭിച്ച സന്തോഷത്തിൽ ആനപ്പാപ്പാൻ

 

തിരുനാവായ: ഭാരതപ്പുഴയുടെ തീരത്ത് നഷ്ടപ്പെട്ട പതിനയ്യായിരത്തിലേറെ രൂപയുടെ കവർ തിരികെ ലഭിച്ച ആനപ്പാപ്പാന്റെ മുഖത്ത് തെളിഞ്ഞത് ആശ്വാസത്തിന്റെയും അത്ഭുതത്തിന്റെയും നിമിഷങ്ങൾ. തിരുനാവായ നവാ മുകുന്ദ ക്ഷേത്രത്തിലെ ഉത്സവത്തിനെത്തിയ ഗുരുവായൂർ ദേവസ്വത്തിന്റെ 'ജൂനിയർ വിഷ്ണു' എന്ന ആനയുടെ പാപ്പാൻ മനീഷിനാണ് തന്റെ പണം തിരികെ ലഭിച്ചത്. മനുഷ്യപ്പറ്റിന്റെയും സത്യസന്ധതയുടെയും ഉത്തമ മാതൃകയാവുകയാണ് തോണിക്കാരനായ യാഹൂട്ടി.

ക്ഷേത്രത്തിലെ ഉത്സവത്തിനായെത്തിയതാണ് ഗുരുവായൂർ ദേവസ്വത്തിന്റെ ആനയായ ജൂനിയർ വിഷ്ണു. ആനയെ കുളിപ്പിക്കാനായി മനീഷ് ഭാരതപ്പുഴയുടെ കടവിലേക്ക് എത്തിയതായിരുന്നു. കുളിപ്പിക്കാൻ ഇറങ്ങുന്നതിന് മുൻപ് തന്റെ കൈവശമുണ്ടായിരുന്ന 15,600 രൂപ അടങ്ങിയ കവർ കടവിൽ ഭദ്രമായി വെച്ചു. എന്നാൽ കുളി കഴിഞ്ഞു കയറിയപ്പോൾ, വിജനമായ കടവിൽ പണം എവിടെയാണ് വെച്ചത് എന്ന് കൃത്യമായി ഓർത്തെടുക്കാൻ മനീഷിന് സാധിച്ചില്ല. ഏറെ നേരം തിരച്ചിൽ നടത്തിയിട്ടും പണം കണ്ടെത്താൻ കഴിയാതെ വന്നതോടെ, ആരെങ്കിലും എടുത്തു കാണുമെന്ന് കരുതി സങ്കടത്തോടെ അദ്ദേഹം മടങ്ങുകയായിരുന്നു.

അതേസമയം, മഗ്രിബ് നമസ്‌കാരത്തിനു ശേഷം സുഹൃത്തുക്കളായ ഷറഫുദ്ദീൻ, മൻസൂർ എന്നിവർക്കൊപ്പം പുഴക്കടവിലെത്തിയതായിരുന്നു തോണിക്കാരൻ യാഹൂട്ടി. ഉത്സവം നടക്കുന്ന ദിവസങ്ങളിൽ തോണിയുമായി പുഴയിൽ സജീവമാകുന്ന ഇവർ, സുരക്ഷാ മുൻകരുതലിന്റെ ഭാഗമായി കടവ് പരിശോധിക്കാൻ എത്തിയതായിരുന്നു. ആ സമയത്താണ് അപ്രതീക്ഷിതമായി പണം അടങ്ങിയ കവർ ഇവർ കണ്ടെത്തുന്നത്.

​കടവിൽ വേറെ ആരെയും കാണാത്തതുകൊണ്ട് ആ പണം ഉടമയുടേതാണെന്ന് ഉറപ്പിച്ച യാഹൂട്ടി, പണം ലഭിച്ച വിവരം ഒരു കടലാസിൽ എഴുതി ആ സ്ഥലത്ത് ഒട്ടിച്ചുവെച്ചു. കൂടെ തന്റെ ഫോൺ നമ്പറും രേഖപ്പെടുത്തി.

പിറ്റേന്ന് രാവിലെ, നഷ്ടപ്പെട്ട പണം തേടി വീണ്ടും അതേ കടവിൽ എത്തിയ മനീഷിന്റെ കണ്ണിൽ പെട്ടത് യാഹൂട്ടി എഴുതി വെച്ച കുറിപ്പാണ്. ഉടൻ തന്നെ അദ്ദേഹം യാഹൂട്ടിയെ ഫോണിൽ ബന്ധപ്പെടുകയും വിവരം പറയുകയും ചെയ്തു. നഷ്ടപ്പെട്ടു എന്ന് കരുതിയ തുക തിരികെ ലഭിക്കുമെന്ന് ഉറപ്പായതിന്റെ സന്തോഷം മനീഷിന്റെ വാക്കുകളിൽ പ്രകടമായിരുന്നു.

​തുടർന്ന്, തിരുനാവായയിൽ നടന്ന ചടങ്ങിൽ ദേവസ്വം എക്സിക്യൂട്ടീവ് ഓഫീസർ ശ്രീ പരമേശ്വരന്റെയും തിരൂർ എസ്.എച്ച്.ഒ അനിൽ സാറിന്റെയും സാന്നിധ്യത്തിൽ, തോണിക്കാരൻ യാഹൂട്ടി മനീഷിന് പണം കൈമാറി. പണം നഷ്ടപ്പെട്ടവനും അത് തിരികെ നൽകിയവനും ഒരുപോലെ സന്തോഷം പങ്കിട്ട ഈ നിമിഷം, തുകയേക്കാൾ വലുത് മനുഷ്യത്വമാണെന്ന് ഒരിക്കൽ കൂടി തെളിയിച്ചു.