പട്ടിണിയിലും പതറാത്തപട്ടിണിയിലും സത്യസന്ധത; വഴിയിൽ കിട്ടിയ അരലക്ഷം രൂപ പോലീസിലേൽപ്പിച്ചു രണ്ടാം ക്ലാസുകാരൻ മാതൃകയായി

 

ഈറോഡ്: കണ്ണ് മഞ്ഞളിക്കുന്ന പണത്തിന് മുന്നിലും പതറാത്ത സത്യസന്ധതയുമായി എട്ടു വയസ്സുകാരൻ കൈയടി നേടുന്നു. ഈറോഡ് ചിന്നസെമൂർ ഗ്രാമത്തിലെ ഗവൺമെന്റ് പ്രൈമറി സ്കൂളിലെ രണ്ടാം ക്ലാസ് വിദ്യാർത്ഥിയായ മുഹമ്മദ് യാസീനാണ് തനിക്ക് വഴിയിൽ ലഭിച്ച 50,000 രൂപ അടങ്ങിയ ബാഗ് പോലീസിനെ ഏൽപ്പിച്ച് നാടിനാകെ അഭിമാനമായത്.

​ബാഗ് കണ്ടത് സ്കൂളിലേക്കുള്ള യാത്രയ്ക്കിടെ

കഴിഞ്ഞ ദിവസം രാവിലെ സ്കൂളിലേക്ക് പോകുന്ന വഴിക്കാണ് റോഡരികിൽ ഉപേക്ഷിക്കപ്പെട്ട നിലയിൽ ഒരു ബാഗ് യാസീന്റെ ശ്രദ്ധയിൽപ്പെടുന്നത്. ആകാംക്ഷയോടെ തുറന്നു നോക്കിയ കുട്ടി കണ്ടത് കെട്ടുകളായി അടുക്കിവെച്ചിരിക്കുന്ന നോട്ടുകളാണ്. പണമെടുത്ത് കൈവശം വെക്കാനോ വീട്ടിലേക്ക് കൊണ്ടുപോകാനോ മുതിരാതെ യാസീൻ നേരെ ഓടിയത് തന്റെ സ്കൂളിലേക്കായിരുന്നു. ക്ലാസ് ടീച്ചറായ ജയന്തിയെ വിവരമറിയിച്ചതിനെ തുടർന്ന് പ്രധാന അധ്യാപികയുടെ നേതൃത്വത്തിൽ ഉടൻ തന്നെ പോലീസിൽ വിവരമറിയിച്ചു.

​സമ്മാനത്തുക നിരസിച്ച് കുഞ്ഞു മിടുക്കൻ

ജില്ലാ പോലീസ് സൂപ്രണ്ട് (എസ്.പി) ശക്തി ഗണേശന് മുൻപിലാണ് യാസീൻ പണമടങ്ങിയ ബാഗ് ഹാജരാക്കിയത്. കുട്ടിയുടെ നിഷ്കളങ്കമായ പ്രവൃത്തിയിൽ സന്തോഷം തോന്നിയ എസ്.പി, മിഠായി വാങ്ങാനായി 1,000 രൂപ സമ്മാനമായി നൽകിയെങ്കിലും യാസീൻ അത് വാങ്ങാൻ തയ്യാറായില്ല. തുക 2,500 രൂപയായി ഉയർത്തി നിർബന്ധിച്ചിട്ടും 'എനിക്ക് പണം വേണ്ട' എന്ന നിലപാടിൽ അവൻ ഉറച്ചുനിന്നു. ഒടുവിൽ എസ്.പി നേരിട്ട് കടയിൽ കൊണ്ടുപോയി യാസീനും സഹോദരനും പുതിയ യൂണിഫോമും ഷൂസും വസ്ത്രങ്ങളും വാങ്ങി നൽകിയാണ് യാത്രയാക്കിയത്.

​അഭിമാനത്തോടെ പിതാവ്

ദിവസവും 300 മുതൽ 500 രൂപ വരെ മാത്രം വരുമാനമുള്ള ഒരു സാധാരണ തുണിക്കച്ചവടക്കാരനാണ് യാസീന്റെ പിതാവ്. കടുത്ത സാമ്പത്തിക ബുദ്ധിമുട്ടുകൾക്കിടയിലും മകൻ കാണിച്ച ഈ വലിയ മനസ്സിനെക്കുറിച്ച് പറയുമ്പോൾ അദ്ദേഹത്തിന്റെ കണ്ണുകൾ നിറയുന്നുണ്ട്. "എന്റെ മകനെക്കുറിച്ച് എനിക്ക് വലിയ അഭിമാനമുണ്ട്, അവനെ നല്ലൊരു മനുഷ്യനായി വളർത്തണമെന്നാണ് എന്റെ ആഗ്രഹം," അദ്ദേഹം പറഞ്ഞു.

​ചിന്നസെമൂർ ഗ്രാമത്തിലെ ഈ കൊച്ചു മിടുക്കന്റെ സത്യസന്ധത ഇപ്പോൾ സോഷ്യൽ മീഡിയയിലടക്കം വലിയ ചർച്ചയായിരിക്കുകയാണ്. പണത്തിന് മീതെ പരുന്തും പറക്കാത്ത കാലത്ത്, മൂല്യങ്ങൾ ഉയർത്തിപ്പിടിച്ച യാസീനെ അഭിനന്ദിക്കാൻ നിരവധി പേരാണ് രംഗത്തെത്തുന്നത്.