പൊന്നിൽ കുളിച്ച കൊന്നപ്പൂക്കൾക്കിടയിൽ ഒരു ജീവൻ പൊലിഞ്ഞു; കൊന്നപ്പൂ പറിക്കുന്നതിനിടെ മരത്തിൽ നിന്ന് വീണ് യുവാവ് മരിച്ചു
കരുനാഗപ്പള്ളി: വിഷുക്കണി ഒരുക്കാൻ കണിക്കൊന്നപ്പൂക്കൾ തേടി മരത്തിൽ കയറിയ യുവാവ് താഴെ വീണ് മരിച്ചു. കുലശേഖരപുരം നീലികുളം സ്വദേശി ശ്രീനാഥ് (36) ആണ് മരിച്ചത്. ഇന്ന് പുലർച്ചെ ഐശ്വര്യത്തിന്റെ കണിയൊരുക്കാൻ കാത്തിരുന്ന ഒരു നാടിനെയും കുടുംബത്തെയും കണ്ണീരിലാഴ്ത്തിയാണ് ഈ വിയോഗം.
ഇന്നലെ ഉച്ചയോടെ അയൽപക്കത്തെ വീട്ടിലെ മരത്തിൽ നിന്നും കൊന്നപ്പൂക്കൾ പറിക്കുന്നതിനിടെയായിരുന്നു അപകടം. മരത്തിൽ നിന്നും കാൽ വഴുതി താഴെ വീണ ശ്രീനാഥിനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വീടിനും നാടിനും ഏറെ പ്രിയപ്പെട്ടവനായിരുന്ന യുവാവിന്റെ അപ്രതീക്ഷിത മരണം വിശ്വസിക്കാനാവാതെ വിതുമ്പുകയാണ് സുഹൃത്തുക്കളും ബന്ധുക്കളും.
വിഷു ആഘോഷങ്ങൾക്കായി അച്ഛൻ കൊണ്ടുവരുന്ന പൂക്കൾക്കായി കാത്തിരുന്ന പിഞ്ചുമക്കൾക്ക് മുന്നിലേക്ക് എത്തിയത് പ്രിയപ്പെട്ടവന്റെ ചേതനയറ്റ ശരീരമാണ്. ശ്രീനാഥിന്റെ ഭാര്യ അഖിലയും ഏഴു വയസ്സുകാരി ദേവപ്രിയയും രണ്ടു വയസ്സുകാരൻ രുദ്രദേവും അടങ്ങുന്ന കുടുംബം ഈ വിയോഗം താങ്ങാനാവാത്ത അവസ്ഥയിലാണ്.
പൊന്നിൽ കുളിച്ചു നിൽക്കുന്ന കണിക്കൊന്നപ്പൂക്കൾക്കിടയിൽ ഒരു ജീവിതം പാതിവഴിയിൽ പൊലിഞ്ഞത് നാടിനാകെ നോവാകുകയാണ്. സംസ്കാരം പിന്നീട് നടക്കും.
Comments
Post a Comment