വാക്കുകൾ അമ്പുകളായി; അപവാദപ്രചാരണത്തിൽ ഒരു മെഡിക്കൽ സ്വപ്നം പൊലിഞ്ഞു

 

ബംഗളൂരു: സഹപാഠികളുടെ നിരന്തരമായ പരിഹാസവും തെറ്റായ അപവാദ പ്രചാരണങ്ങളും ഒരു മെഡിക്കൽ വിദ്യാർത്ഥിനിയുടെ ജീവനെടുത്തു. മല്ലാദിഹള്ളി രാഘവേന്ദ്ര ആയുർവേദിക് കോളേജിലെ അവസാന വർഷ ബി.എ.എം.എസ് വിദ്യാർത്ഥിനി നിഖിതയെയാണ് (22) വീടിനുള്ളിൽ മരിച്ച നിലയിൽ കണ്ടെത്തിയത്. തനിക്ക് അധ്യാപകനുമായി അവിഹിത ബന്ധമുണ്ടെന്ന തരത്തിൽ സഹപാഠികൾ പ്രചരിപ്പിച്ച കള്ളവാർത്തകളിൽ മനംനൊന്താണ് പെൺകുട്ടി ഈ കടുംകൈ ചെയ്തത്.

കോളേജിലെ ലക്‌ചററായ ഡോ. രാജുവുമായി നിഖിതയ്ക്ക് ഉണ്ടായിരുന്ന സൗഹൃദത്തെ ചില സഹപാഠികൾ മോശമായ രീതിയിൽ ചിത്രീകരിക്കുകയായിരുന്നുവെന്ന് പരാതിയിൽ പറയുന്നു. ഇരുവരും പ്രണയത്തിലാണെന്ന തരത്തിൽ കോളേജിലുടനീളം അപവാദങ്ങൾ പ്രചരിപ്പിക്കുകയും പെൺകുട്ടിയെ കാണുമ്പോഴൊക്കെ സഹപാഠികൾ പരിഹസിക്കുകയും ചെയ്തിരുന്നു.

ക്ലാസ് മുറികളിലും ക്യാമ്പസിലും നേരിടേണ്ടി വന്ന കടുത്ത മാനസിക സമ്മർദ്ദത്തെക്കുറിച്ച് നിഖിത നേരത്തെ മാതാപിതാക്കളോട് വെളിപ്പെടുത്തിയിരുന്നു. മാതാപിതാക്കൾ മകൾക്ക് ആത്മവിശ്വാസം നൽകാനും പഠനത്തിൽ ശ്രദ്ധ കേന്ദ്രീകരിക്കാൻ പ്രേരിപ്പിക്കാനും ശ്രമിച്ചുവെങ്കിലും സഹപാഠികളുടെ ഭാഗത്തുനിന്നുള്ള ഉപദ്രവം തുടർന്നുകൊണ്ടേയിരുന്നു.

സംഭവസ്ഥലത്തുനിന്നും നിഖിത എഴുതിയ ആത്മഹത്യാക്കുറിപ്പ് പോലീസ് കണ്ടെടുത്തിട്ടുണ്ട്. തന്റെ മരണത്തിന് ഉത്തരവാദികളായ സഹപാഠികളുടെ പേരുവിവരങ്ങൾ ഇതിൽ പരാമർശിച്ചിട്ടുള്ളതായാണ് സൂചന. നിഖിതയുടെ പിതാവ് ഉമാശങ്കർ നൽകിയ പരാതിയുടെ അടിസ്ഥാനത്തിൽ കുറ്റക്കാരായ വിദ്യാർത്ഥികൾക്കെതിരെ പോലീസ് കേസെടുത്തു.

"എന്റെ മകളുടെ സ്വഭാവത്തെ മോശമായി ചിത്രീകരിച്ച് അവളെ ആത്മഹത്യയിലേക്ക് തള്ളിവിട്ടവർക്കെതിരെ കർശന നിയമനടപടി സ്വീകരിക്കണം. ഇനിയൊരു കുട്ടിക്കും ഈ ഗതി വരാൻ പാടില്ല," - നിഖിതയുടെ പിതാവ് ഉമാശങ്കർ പറഞ്ഞു.

ഒരു മിടുക്കിയായ മെഡിക്കൽ വിദ്യാർത്ഥിനിയുടെ അപ്രതീക്ഷിത വിയോഗം നാടിനെയും കലാലയത്തെയും ഒരുപോലെ ഞെട്ടിച്ചിരിക്കുകയാണ്. സംഭവത്തിൽ വിശദമായ അന്വേഷണം ആരംഭിച്ചതായും കുറ്റക്കാർക്കെതിരെ ശക്തമായ നടപടി ഉണ്ടാകുമെന്നും പോലീസ് അറിയിച്ചു.