ടാബിനെ ഉപേക്ഷിച്ചു, കുട്ടിപ്പീടിക തുറന്നു: അവധിക്കാലം ആഘോഷമാക്കി കൂരാച്ചുണ്ടിലെ കുട്ടിപ്പട്ടാളം!

 

കൂരാച്ചുണ്ട്: മൊബൈൽ ഫോണുകളിലും ടാബുകളിലും അവധിക്കാലം തളച്ചിടുന്ന കുട്ടികൾക്കിടയിൽ വ്യത്യസ്തമായൊരു കാഴ്ചയാണ് കൂരാച്ചുണ്ട്-വട്ടച്ചിറ റോഡരികിൽ ഇപ്പോൾ കാണാനാവുക. ഗാഡ്‌ജെറ്റുകളുടെ ലോകത്ത് നിന്ന് പുറത്തിറങ്ങി, സ്വന്തമായി കച്ചവടം തുടങ്ങി വേനലവധി അവിസ്മരണീയമാക്കുകയാണ് നമ്മുടെ കൊച്ചു മിടുക്കികൾ

​പഴയകാലത്തെ നാട്ടിൻപുറത്തെ ആ മനോഹരമായ . അടുത്ത അധ്യയന വർഷത്തേക്കാവശ്യമായ പാഠപുസ്തകങ്ങളും പഠനോപകരണങ്ങളും സ്വന്തം അധ്വാനത്തിലൂടെ കണ്ടെത്തുക എന്ന ലക്ഷ്യത്തോടെയാണ് ഈ കൊച്ചു സംരംഭകർ കച്ചവടത്തിനിറങ്ങിയിരിക്കുന്നത്.

​ഈ കുട്ടിപ്പീടികകൾക്ക് നേതൃത്വം നൽകുന്ന ഒരു കൂട്ടം കുട്ടികൾ ഇപ്പോൾ നാട്ടിലെ താരങ്ങളാണ്. കൂരാച്ചുണ്ട്  യുപി സ്കൂൾ വിദ്യാർഥികളായ സഹോദരിമാരായ മിൻഹയും, മെഹ്റയും, കൂട്ടുകാരി സഫ്നയും കൂടി   നടത്തുന്ന കട നാട്ടുകാരുടെ പ്രശംസ പിടിച്ചുപറ്റുകയാണ്. സ്വന്തമായി എഴുതിയ ബോർഡും വിലവിവരപ്പട്ടികയും ഉൾപ്പെടെ കടയുടെ കെട്ടും മട്ടുമെല്ലാം കാണാൻ നല്ല ഭംഗിയാണ്. 

​മൊബൈൽ ഫോണുകളിൽ സമയം കളയുന്നതിനേക്കാൾ നല്ലതാണ് കുട്ടികൾ സാമൂഹികമായി ഇടപെടുന്ന ഇത്തരം സംരംഭങ്ങളെന്ന് രക്ഷിതാക്കളും കരുതുന്നു. മുതിർന്നവരുടെ മേൽനോട്ടത്തിലും സഹകരണത്തിലും തന്നെയാണ് പല കച്ചവടങ്ങളും നടക്കുന്നത്. സ്‌കൂൾ തുറക്കുന്നതോടെ ഈ കടകൾ പൂട്ടും. കച്ചവടത്തിലെ കണക്കുകളും ലാഭവുമെല്ലാം കൃത്യമായി നോക്കുന്ന ഈ കുഞ്ഞു വ്യാപാരികൾ, പഠനത്തോടൊപ്പം ജീവിതപാഠങ്ങളും ഈ അവധിക്കാലത്ത് സ്വന്തമാക്കുകയാണ്.

​മൊബൈൽ ഫോണിന്റെ വരവോടെ വിസ്മൃതിയിലായ നാട്ടിൻപുറത്തെ ഇത്തരം മനോഹരമായ കാഴ്ചകൾ തിരിച്ചു കൊണ്ടുവന്ന ഈ കുട്ടിപ്പട്ടാളത്തിന് വലിയ കൈയടിയാണ് നാട്ടുകാരിൽ നിന്ന് ലഭിക്കുന്നത്. വെറും കച്ചവടത്തിനപ്പുറം, കൂട്ടായ്മയുടെയും അധ്വാനത്തിന്റെയും വലിയൊരു സന്ദേശം കൂടിയാണ് ഈ കൊച്ചു കൂട്ടുകാർ നമുക്ക് പകർന്നു നൽകുന്നത്.