അടിച്ചുമാറ്റി, പക്ഷേ ഒന്ന് ഉറങ്ങിപ്പോയി; കണ്ണ് തുറന്നപ്പോൾ മുന്നിൽ പോലീസും നാട്ടുകാരും
വെള്ളറട: സിനിമയെ വെല്ലുന്ന നാടകീയ രംഗങ്ങൾക്കാണ് കഴിഞ്ഞ ദിവസം വെള്ളറട കോവിൽവിള ഭഗവതി ക്ഷേത്രം സാക്ഷ്യം വഹിച്ചത്. മോഷണത്തിനായി ക്ഷേത്രത്തിൽ അതിക്രമിച്ചു കയറിയ തമിഴ്നാട് സ്വദേശിയായ കള്ളൻ, കൃത്യത്തിന് ശേഷം ക്ഷീണം മാറ്റാൻ ഒന്ന് മയങ്ങിയതാണ് ഒടുവിൽ പോലീസിന്റെ കൈകളിൽ എത്തിച്ചത്. തമിഴ്നാട് സ്വദേശിയായ സെന്തിൽ എന്നയാളാണ് പിടിയിലായത്.
കഴിഞ്ഞ ദിവസം രാത്രിയിലാണ് സെന്തിൽ മതിൽ ചാടിക്കടന്ന് ക്ഷേത്ര പരിസരത്ത് എത്തിയത്. ക്ഷേത്രത്തിന്റെ വാതിൽ കുത്തിത്തുറന്ന് അകത്തുകയറിയ ഇയാൾ, പൂജാ സാമഗ്രികളും സോപ്പ്, എണ്ണ, വാഷിങ് പൗഡർ തുടങ്ങിയവയും കൈക്കലാക്കി കൃത്യമായി ഒരു കവറിലാക്കി മാറ്റി വെച്ചു. മോഷണമുതലുമായി കടന്നുകളയാൻ ശ്രമിക്കുന്നതിനിടെയാണ് കടുത്ത ക്ഷീണം അനുഭവപ്പെട്ടത്. തുടർന്ന് ക്ഷേത്രത്തിനുള്ളിൽ തന്നെ ഇത്തിരി നേരം ഒന്ന് വിശ്രമിക്കാമെന്ന് കരുതി ഇയാൾ ഇരുന്നു.
എന്നാൽ വിശ്രമം ഗാഢനിദ്രയിലേക്ക് വഴിമാറിയതോടെ കള്ളൻ നേരം വെളുത്തത് അറിഞ്ഞില്ല. പുലർച്ചെ ക്ഷേത്രനട തുറക്കാനായി എത്തിയ ശാന്തിക്കാരനാണ് ക്ഷേത്രത്തിനുള്ളിൽ അപരിചിതനായ ഒരാൾ ഉറങ്ങിക്കിടക്കുന്നത് കണ്ട് ഞെട്ടിയത്. തുടർന്ന് അദ്ദേഹം നാട്ടുകാരെ വിവരം അറിയിക്കുകയായിരുന്നു. നാട്ടുകാർ ഓടിക്കൂടി ബഹളം വെച്ചിട്ടും കള്ളൻ ഉണർന്നില്ല. ഒടുവിൽ നാട്ടുകാരും പോലീസും ചേർന്ന് വിളിച്ചുണർത്തിയപ്പോഴാണ് താൻ അകപ്പെട്ട കാര്യം കക്ഷി മനസ്സിലാക്കുന്നത്.
സംസാരശേഷിയില്ലാത്ത സെന്തിൽ, നാട്ടുകാരുടെ ചോദ്യങ്ങൾക്ക് കടലാസിൽ എഴുതിയാണ് മറുപടി നൽകിയത്. താൻ ക്ഷേത്രത്തിനുള്ളിൽ എത്തിയ വഴി മറന്നുപോയെന്നും ക്ഷീണം കാരണം അറിയാതെ ഉറങ്ങിപ്പോയതാണെന്നുമാണ് ഇയാൾ എഴുതി നൽകിയത്. മോഷണവസ്തുക്കൾ അടങ്ങിയ ബാഗും ഇയാളുടെ പക്കൽ നിന്നും കണ്ടെടുത്തു.
വിവരം ലഭിച്ചതിനെ തുടർന്ന് വെള്ളറട പോലീസ് സ്ഥലത്തെത്തി സെന്തിലിനെ കസ്റ്റഡിയിലെടുത്തു. ഇയാൾ മുൻപും പല ക്ഷേത്രങ്ങളിലും ഇത്തരത്തിൽ മോഷണശ്രമം നടത്തിയിട്ടുള്ളതായാണ് പ്രാദേശിക അന്വേഷണത്തിൽ ലഭിക്കുന്ന വിവരം. പ്രതിയെ കൂടുതൽ ചോദ്യം ചെയ്യുന്നതിനായി പോലീസ് സ്റ്റേഷനിലേക്ക് മാറ്റി.
മോഷണത്തിനിടയിലെ ഈ 'ഉറക്കപ്പിരാന്ത്' ഇപ്പോൾ സോഷ്യൽ മീഡിയയിൽ വലിയ ചർച്ചയാവുകയാണ്. 'ഉറക്കം ഒരു വലിയ പാപമാണ്' എന്ന ഗുണപാഠത്തോടെയാണ് നാട്ടുകാർ ഈ വിചിത്ര സംഭവത്തെ വിശേഷിപ്പിക്കുന്നത്.
Comments
Post a Comment