ഗൂഗിൾ മാപ്പ് കാട്ടിയ വഴി 'ചതിക്കുഴി; പെരുവണ്ണാമൂഴി; ജാനകിക്കാട് കണ്ട് വയനാട്ടിലേക്ക് പോയ കാർ പറമ്പിലേക്ക് പാഞ്ഞുകയറി
പെരുവണ്ണാമൂഴി: ഗൂഗിൾ മാപ്പ് നോക്കിയുള്ള യാത്ര വീണ്ടും അപകടക്കെണിയായി. പെരുവണ്ണാമൂഴി ജാനകിക്കാട് സന്ദർശിച്ച ശേഷം വയനാട്ടിലേക്ക് തിരിക്കുകയായിരുന്ന വിനോദസഞ്ചാരികളുടെ കാർ നിയന്ത്രണം വിട്ട് പറമ്പിലേക്ക് പാഞ്ഞുകയറി. കാവിലുംപാറ കുഴിക്കാട് വളവിൽ രാത്രി എട്ടരയോടെയായിരുന്നു അപകടം. കാസർകോട് സ്വദേശികളായ യാത്രികർ പരിക്കേൽക്കാതെ അത്ഭുതകരമായി രക്ഷപ്പെട്ടു.
പെരുവണ്ണാമൂഴി ജാനകിക്കാട്ടിലെ വിനോദസഞ്ചാരം കഴിഞ്ഞ് വയനാട്ടിലേക്ക് പോകാൻ ഗൂഗിൾ മാപ്പിന്റെ സഹായം തേടിയതായിരുന്നു സംഘം. എന്നാൽ, നിരവധി വളവുകളും കയറ്റിറക്കങ്ങളുമുള്ള കുഴിക്കാട് മേഖലയിലെ പരിചയമില്ലാത്ത റോഡിൽ രാത്രികാലത്ത് ഗൂഗിൾ മാപ്പ് നോക്കി ഡ്രൈവ് ചെയ്തത് വിനയായി. കുഴിക്കാട് വളവിൽ വെച്ച് നിയന്ത്രണം നഷ്ടപ്പെട്ട കാർ റോഡരികിലെ മതിൽ ഇടിച്ച് തകർത്ത് താഴെയുള്ള പറമ്പിലേക്ക് പാഞ്ഞുകയറുകയായിരുന്നു. മതിലിൽ തട്ടി വേഗത കുറഞ്ഞതിനാൽ വലിയൊരു താഴ്ചയിലേക്ക് കാർ മറിയാതിരുന്നത് വൻ ദുരന്തം ഒഴിവാക്കി.
പ്രദേശത്തെ റോഡുകളെക്കുറിച്ച് കൃത്യമായ ധാരണയില്ലാത്തവർക്ക് ഗൂഗിൾ മാപ്പ് പലപ്പോഴും ഈ റൂട്ടിൽ വെല്ലുവിളിയാകാറുണ്ട്. കുത്തനെയുള്ള ഇറക്കവും അപകടകരമായ വളവുകളുമുള്ള ഭാഗമാണിത്. രാത്രി വെളിച്ചം കുറവായതും ഡ്രൈവർക്ക് വഴി കൃത്യമായി മനസ്സിലാക്കാൻ സാധിക്കാത്തതും അപകടത്തിന് കാരണമായതായി നാട്ടുകാർ പറയുന്നു. അപകടശബ്ദം കേട്ട് ഓടിക്കൂടിയ നാട്ടുകാരാണ് കാറിലുണ്ടായിരുന്നവരെ പുറത്തെടുത്തത്. ആർക്കും കാര്യമായ പരിക്കുകളില്ല.
കാറിന് വൻതോതിൽ കേടുപാടുകൾ സംഭവിച്ചിട്ടുണ്ട്. രാത്രി വൈകിയും കാർ പറമ്പിൽ നിന്നും മാറ്റാനുള്ള ശ്രമങ്ങൾ തുടർന്നു. പരിചയമില്ലാത്ത മലയോര മേഖലകളിൽ രാത്രികാലങ്ങളിൽ ഗൂഗിൾ മാപ്പിനെ മാത്രം ആശ്രയിക്കുന്നത് അപകടങ്ങൾ ക്ഷണിച്ചുവരുത്തുമെന്ന് പോലീസ് മുന്നറിയിപ്പ് നൽകി.
Comments
Post a Comment