വഴിയോര ഫുഡ് സ്റ്റാളിൽ ഓടയിലെ വെള്ളം ഉപയോഗിക്കുന്നതായി പരാതി; നിങ്ങളുടെ പ്ലേറ്റിൽ എത്തുന്നത് മലിനജലത്തിലെ അണുക്കളോ

 

അക്കോള: പുറത്തുനിന്ന് ഭക്ഷണം കഴിക്കാൻ ഇഷ്ടപ്പെടുന്നവരെ ആശങ്കയിലാഴ്ത്തി മഹാരാഷ്ട്രയിലെ അക്കോളയിൽ നിന്ന് ഭീതിയുണർത്തുന്ന ദൃശ്യങ്ങൾ പുറത്തുവന്നു. നഗരത്തിലെ തിരക്കേറിയ ധീംഗ്ര ചൗക്കിലെ ബസ് സ്റ്റാൻഡിന് സമീപമുള്ള ഓടയിൽ (ഡ്രെയിനേജ്) നിന്ന് പ്ലാസ്റ്റിക് കാനുകളിൽ വെള്ളം ശേഖരിക്കുന്ന ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ വ്യാപകമായി പ്രചരിക്കുന്നത്.

​അതിരാവിലെ മുതൽ സജീവമാകുന്ന ഭക്ഷണശാലകൾക്ക് പേരുകേട്ട ഇടമാണ് ധീംഗ്ര ചൗക്ക്. പോഹ, സമോസ, കച്ചോരി തുടങ്ങിയ വിഭവങ്ങൾ വിൽക്കുന്ന നിരവധി വഴിയോരക്കടകൾ ഇവിടെ പ്രവർത്തിക്കുന്നുണ്ട്. ഈ മേഖലയിലെ ഒരു ഓടയിൽ നിന്ന് ഒരാൾ വലിയ പ്ലാസ്റ്റിക് കാനുകളിൽ മലിനജലം മുക്കിയെടുക്കുന്നതാണ് വീഡിയോയിലുള്ളത്.

     ശേ​ഖരിക്കുന്ന ഈ മലിനജലം സമീപത്തെ ഭക്ഷണശാലകളിൽ പാചകത്തിനാണോ അതോ പാത്രങ്ങൾ കഴുകാനാണോ ഉപയോഗിക്കുന്നത് എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണം ലഭിച്ചിട്ടില്ല. എങ്കിലും, അതീവ മലിനമായ ഈ വെള്ളം ഭക്ഷ്യവിൽപ്പന നടത്തുന്ന സ്ഥലങ്ങളിലേക്ക് കൊണ്ടുപോകുന്നത് പൊതുജനാരോഗ്യത്തിന് വലിയ ഭീഷണിയാണ് ഉയർത്തുന്നത്.

​ദൃശ്യങ്ങൾ പുറത്തുവന്നതോടെ പ്രദേശവാസികളും ഭക്ഷണപ്രേമികളും വലിയ ആശങ്കയിലാണ്. ഹെപ്പറ്റൈറ്റിസ്, കോളറ, ടൈഫോയ്ഡ് തുടങ്ങിയ ഗുരുതരമായ രോഗങ്ങൾക്ക് കാരണമാകുന്ന ഇത്തരം പ്രവണതകൾക്കെതിരെ അധികൃതർ കണ്ണടയ്ക്കുകയാണെന്ന ആക്ഷേപം ശക്തമാണ്.

​"അതിരാവിലെ ബസ് കാത്തുനിൽക്കുന്നവരും ജോലിക്കു പോകുന്നവരും പ്രധാനമായും ആശ്രയിക്കുന്ന കടകളാണിവ. ഇത്തരം ദൃശ്യങ്ങൾ കാണുമ്പോൾ പുറത്തുനിന്ന് ഭക്ഷണം കഴിക്കാൻ ഭയം തോന്നുന്നു," എന്ന് ഒരു യാത്രക്കാരൻ പ്രതികരിച്ചു.

​സംഭവം വിവാദമായതോടെ ഭക്ഷ്യസുരക്ഷാ വകുപ്പും നഗരസഭയും വിഷയത്തിൽ അടിയന്തരമായി ഇടപെടണമെന്ന ആവശ്യം ശക്തമായിട്ടുണ്ട്. കുറ്റക്കാർക്കെതിരെ കർശന നടപടി സ്വീകരിക്കണമെന്നും നഗരത്തിലെ വഴിയോരക്കടകളിൽ ഉപയോഗിക്കുന്ന വെള്ളത്തിന്റെ ഗുണനിലവാരം പരിശോധിക്കാൻ സ്ഥിരം സംവിധാനം വേണമെന്നും സോഷ്യൽ മീഡിയയിൽ പ്രതിഷേധം ഉയരുകയാണ്.

​മലിനജലം ശേഖരിച്ച വ്യക്തിയെക്കുറിച്ചും ഇത് ഏത് കടയിലേക്കാണ് കൊണ്ടുപോയതെന്നതിനെക്കുറിച്ചും പോലീസ് അന്വേഷണം ആരംഭിച്ചതായാണ് സൂചന.