വിവാദങ്ങളുടെ 'ചുഴിയിൽ' പേരാമ്പ്ര; വർഗീയ അനൗൺസ്മെന്റും മലയോര പ്രകടന പത്രികയും

 

ചക്കിട്ടപാറ: വികസന ചർച്ചകൾ വഴിമാറി വർഗീയ വിവാദങ്ങളിലേക്കും ഭരണവിരുദ്ധ വികാരത്തിലേക്കും പേരാമ്പ്ര മണ്ഡലം നീങ്ങുന്നു. വടകരയിലെ 'കാഫിർ' സ്ക്രീൻഷോട്ട് വിവാദത്തിന് സമാനമായി, മണ്ഡലത്തിൽ ഇടതുപക്ഷം നടത്തിയെന്ന് ആരോപിക്കപ്പെടുന്ന വർഗീയ ചുവയുള്ള അനൗൺസ്മെന്റ് എൽ.ഡി.എഫ് കേന്ദ്രങ്ങളെ പ്രതിരോധത്തിലാക്കിയിരിക്കുകയാണ്. തെരഞ്ഞെടുപ്പിന് ദിവസങ്ങൾ മാത്രം ബാക്കി നിൽക്കെ, ഈ വിവാദം യു.ഡി.എഫിന് ശക്തമായ രാഷ്ട്രീയ ആയുധമായി മാറി.

ആദ്യഘട്ടത്തിൽ ആരോപണങ്ങളെ തള്ളിക്കളഞ്ഞെങ്കിലും, കൂടുതൽ തെളിവുകൾ നിരത്തി യു.ഡി.എഫ് രംഗത്തെത്തിയതോടെ എൽ.ഡി.എഫ് പ്രതിരോധത്തിലായി. ജാതി-മത ഭേദമന്യേ സൗഹൃദത്തോടെ കഴിയുന്ന പേരാമ്പ്രയിൽ വർഗീയതയുടെ വിത്തുകൾ പാകി വോട്ട് കൊയ്യാൻ ഇടതുപക്ഷം ശ്രമിക്കുന്നുവെന്നാണ് യു.ഡി.എഫിന്റെ പ്രധാന ആരോപണം.

പരാജയഭീതി പൂണ്ട ഇടതുപക്ഷം ഇറക്കിയ വർഗീയ കാർഡാണിത്. കാലങ്ങളായി എൽ.ഡി.എഫിനൊപ്പം നിന്ന മണ്ഡലത്തിലെ ഭരണവിരുദ്ധ വികാരത്തെ മറികടക്കാൻ ഇത്തരം കുറുക്കുവഴികൾ ജനങ്ങൾ അനുവദിക്കില്ലെന്നും ചക്കിട്ടപാറ യു.ഡി.എഫ് നേതൃത്വം പറഞ്ഞു

സംസ്ഥാനമൊട്ടാകെ പ്രചാരണത്തിന് നേതൃത്വം നൽകേണ്ട എൽ.ഡി.എഫ് കൺവീനർ ടി.പി. രാമകൃഷ്ണൻ പേരാമ്പ്ര മണ്ഡലം വിട്ടു പുറത്തുപോകാതെ ക്യാമ്പ് ചെയ്യുന്നത് മണ്ഡലത്തിലെ ശക്തമായ പോരാട്ടത്തിന്റെ സൂചനയായി വിലയിരുത്തപ്പെടുന്നു. സ്വന്തം തട്ടകത്തിൽ നേരിടുന്ന കനത്ത വെല്ലുവിളിയാണ് കൺവീനറെ മണ്ഡലത്തിൽ തന്നെ തളച്ചിടാൻ കാരണമെന്നാണ് രാഷ്ട്രീയ നിരീക്ഷകർ പറയുന്നത്.

എൽ.ഡി.എഫിന്റെ പ്രകടനപത്രികയിലെ മലയോര മേഖലയുമായി ബന്ധപ്പെട്ട വാഗ്ദാനങ്ങൾ കർഷകർക്കിടയിൽ വലിയ പ്രതിഷേധത്തിന് കാരണമായിട്ടുണ്ട്. മലയോര ജനതയുടെ നിലനിൽപ്പിന് ഭീഷണിയാകുന്ന വന-പരിസ്ഥിതി നിയമങ്ങളെ പിന്തുണയ്ക്കുന്ന രീതിയിലുള്ള പ്രഖ്യാപനങ്ങൾ 'മരണപത്രിക'യാണെന്ന വികാരം ചക്കിട്ടപാറ പോലുള്ള മലയോര മേഖലകളിൽ ശക്തമാണ്.

 എം.എൽ.എയുടെ വികസന മുരടിപ്പിനെതിരെയുള്ള ജനരോഷം. ഷാഫി പറമ്പിലിനെതിരെയുള്ള പോലീസ് നടപടി സൃഷ്ടിച്ച വികാരം.പഞ്ചായത്ത് തെരഞ്ഞെടുപ്പിലെ ട്രെൻഡ് തുടർന്നാൽ എൽ.ഡി.എഫിന് കനത്ത തിരിച്ചടി ലഭിക്കുമെന്ന കണക്കുകൂട്ടലുകൾ.

വികസന ചർച്ചകളിൽ നിന്ന് മാറി വർഗീയതയിലേക്കും വ്യക്തിഹത്യയിലേക്കും പ്രചാരണം നീങ്ങിയതോടെ വോട്ടർമാരുടെ പ്രതികരണം എന്താകുമെന്ന് അറിയാൻ ഇനി ഏതാനും ദിവസങ്ങൾ മാത്രം. സോഷ്യൽ മീഡിയയിലും ചക്കിട്ടപാറയിലെ അങ്ങാടികളിലും ഈ വിവാദങ്ങൾ തന്നെയാണ് പ്രധാന ചർച്ചാവിഷയം