കല്ലാനോട് ജൂബിലി സ്റ്റേഡിയത്തിൽ ക്രിക്കറ്റ് വിസ്മയം; ആവേശം വാനോളം; കൂരാച്ചുണ്ട് പ്രീമിയർ ലീഗിൽ ഐഡർ ക്യാപിറ്റൽസ് കപ്പുയർത്തി
കൂരാച്ചുണ്ട്: കൂരാച്ചുണ്ട് ക്രിക്കറ്റ് അക്കാദമിയുടെ നേതൃത്വത്തിൽ നടന്ന കൂരാച്ചുണ്ട് പ്രീമിയർ ലീഗ് ക്രിക്കറ്റ് ടൂർണമെന്റിൽ ഐഡർ ക്യാപിറ്റൽസ് ജേതാക്കളായി. കല്ലാനോട് ജൂബിലി സ്റ്റേഡിയത്തിൽ വെച്ച് നടന്ന ആവേശകരമായ മത്സരത്തിനൊടുവിലാണ് ഐഡർ ക്യാപിറ്റൽസ് കിരീടം സ്വന്തമാക്കിയത്. കേരള ഡെസ്റ്റിനേഷൻ ഹോളിഡേയ്സ് ആണ് ടൂർണമെന്റിൽ രണ്ടാം സ്ഥാനം കരസ്ഥമാക്കിയത്.
ടൂർണമെന്റിന്റെ ഉദ്ഘാടനം കൂരാച്ചുണ്ട് പഞ്ചായത്ത് പ്രസിഡന്റ് സിനി ജിനോ നിർവഹിച്ചു. ഒമ്പതാം വാർഡ് മെമ്പർ സണ്ണി ജോസഫ് കാനാട്ട് അധ്യക്ഷത വഹിച്ച ചടങ്ങിൽ ബ്ലോക്ക് മെമ്പർ അരുൺ ജോസ് മുഖ്യാതിഥിയായിരുന്നു. കായികരംഗത്തെ പ്രോത്സാഹിപ്പിക്കുന്ന ഇത്തരം ടൂർണമെന്റുകൾ ഗ്രാമീണ മേഖലയിൽ വലിയ ആവേശമാണ് സൃഷ്ടിക്കുന്നതെന്ന് ഉദ്ഘാടകർ അഭിപ്രായപ്പെട്ടു.
സമാപന സമ്മേളനത്തിലും സമ്മാനദാന ചടങ്ങിലും കല്ലാനോട് സെന്റ് മേരീസ് പള്ളി വികാരി ഫാ. ജിനോ ചുണ്ടയിൽ മുഖ്യഅതിഥിയായി എത്തി വിജയികൾക്കുള്ള ട്രോഫികളും സമ്മാനങ്ങളും വിതരണം ചെയ്തു. പഞ്ചായത്ത് വൈസ് പ്രസിഡന്റ് ബിജു കടലാശ്ശേരി, എട്ടാം വാർഡ് മെമ്പർ ബിന്ദുമോൾ തോമസ് കളപ്പുരക്കൽ, സന്ദീപ് കളപ്പുരക്കൽ എന്നിവർ ടൂർണമെന്റിനെ അഭിനന്ദിച്ചുകൊണ്ട് സംസാരിച്ചു.
ടൂർണമെന്റിന്റെ വിജയകരമായ നടത്തിപ്പിന് ഷിജോ ജേക്കബ്, സുൽഫിക്കർ, മജൻ പാറച്ചാലിൽ, പ്രശാന്ത്, സുർജിത് ഇകെ, ജെൻസിൽ, ഷാൻ റഹ്മാൻ, ധനൂപ്, ധനേഷ്, അർജുൻ, മനാഫ് എന്നിവർ നേതൃത്വം നൽകി. വൻ കായിക പ്രേമികളാണ് ആവേശകരമായ മത്സരങ്ങൾ കാണാൻ കല്ലാനോട് ജൂബിലി സ്റ്റേഡിയത്തിൽ തടിച്ചു കൂടിയത്.
Comments
Post a Comment