ജീവിതം തന്നെയൊരു അഗ്നിപരീക്ഷ; സ്വന്തം സുരക്ഷയേക്കാൾ മറ്റൊരാളുടെ ജീവന് വിലകല്പിച്ച ഹരി

 

തൃശ്ശൂർ: വെടിക്കെട്ടിന്റെ അപകടസാധ്യതകൾ കൃത്യമായി അറിഞ്ഞിട്ടും, കുടുംബത്തിന്റെ വിശപ്പടക്കാൻ ആ ജോലിയിലേക്ക് ഇറങ്ങിയതായിരുന്നു മതിലകം സ്വദേശിയായ ഹരി മുണ്ടത്തിക്കോട്. എന്നാൽ, വിധി ഒരു അഗ്നിപരീക്ഷയായി മുന്നിലെത്തിയപ്പോൾ, സ്വന്തം ജീവനേക്കാൾ വലുത് മറ്റൊരാളുടെ ജീവനാണെന്ന് ഹരി തെളിയിച്ചു. വെടിക്കെട്ട് അപകടത്തിൽപ്പെട്ട് മരണത്തോട് മല്ലടിച്ച കരാറുകാരനെ രക്ഷിക്കാൻ സ്വന്തം ശരീരം പോലും മറന്ന ഹരിയുടെ ആർജ്ജവം ഇപ്പോൾ നാടിന് തന്നെ അഭിമാനമാകുകയാണ്.

വെടിക്കെട്ട് അപകടം നടന്ന സമയം കരാറുകാരൻ സതീഷിന്റെ ശരീരമാസകലം തീ പടർന്നിരുന്നു. കൺമുന്നിൽ തീ ആളിപ്പടരുന്നത് കണ്ട ഹരി, ഒട്ടും ആലോചിക്കാതെയാണ് സതീഷിനെ രക്ഷിക്കാൻ പാഞ്ഞടുത്തത്. താൻ വന്ന ബൈക്ക് അരികിൽ കിടന്ന് കത്തുന്നത് ഹരി കണ്ടിരുന്നുവെങ്കിലും, അതെല്ലാം അവഗണിച്ച് സതീഷിനെ തോളിലേറ്റുകയായിരുന്നു. ഈ രക്ഷാപ്രവർത്തനത്തിനിടെ കാലിൽ ഇരുമ്പ് കമ്പി തുളച്ചു കയറുകയും ശരീരത്തിന്റെ പല ഭാഗങ്ങളിലും പൊള്ളലേൽക്കുകയും ചെയ്തു. എങ്കിലും, വേദന കടിച്ചുപിടിച്ച് സതീഷിനെ സുരക്ഷിത സ്ഥാനത്തേക്ക് എത്തിക്കാൻ ഹരി ഓടിക്കൊണ്ടിരുന്നു.

രക്ഷാപ്രവർത്തനത്തിനിടയിൽ സതീഷിന്റെ സ്വർണ്ണമാല ഹരിയുടെ ശരീരത്തിൽ കുടുങ്ങിയിരുന്നു. വലിയൊരു അപകടത്തിന് നടുവിലും, വേദനയിലും ചോരയിലും കുളിച്ചുനിൽക്കുമ്പോഴും, അന്യന്റെ മുതൽ സ്വന്തമാക്കാൻ ആ മനസ്സ് അനുവദിച്ചില്ല. ആശുപത്രിയിൽ വെച്ച് സതീഷിന്റെ ബന്ധുവിനെ കണ്ടെത്തിയ ഹരി, ആ മാലയും മൊബൈൽ ഫോണും അവർക്ക് ഭദ്രമായി തിരികെ നൽകി. കഷ്ടപ്പാടിന്റെ നടുവിലും സത്യസന്ധത കൈവിടാത്ത ഹരിയുടെ ഈ പ്രവൃത്തി എല്ലാവർക്കും വലിയൊരു പാഠമാണ്.

രോഗിയായ അമ്മയും ഭിന്നശേഷിക്കാരായ രണ്ട് മക്കളും അടങ്ങുന്നതാണ് ഹരിയുടെ കുടുംബം. ജീവിത പ്രാരാബ്ധങ്ങൾക്കിടയിലും, മക്കളെയും കുടുംബത്തെയും നോക്കാൻ മടിയില്ലാതെ ഏത് തൊഴിലിനും ഹരി ഇറങ്ങുമായിരുന്നു. സതീഷിനെ രക്ഷിക്കാനുള്ള ശ്രമത്തിൽ ഗുരുതരമായി പരിക്കേറ്റ ഹരിയെ ആദ്യം തൃശ്ശൂർ മെഡിക്കൽ കോളേജ് ആശുപത്രിയിലെ ഐ.സി.യുവിൽ പ്രവേശിപ്പിച്ചിരുന്നു. നിലവിൽ ആരോഗ്യനിലയിൽ പുരോഗതിയുണ്ടെന്നും റൂമിലേക്ക് മാറ്റിയതായും ബന്ധുക്കൾ അറിയിച്ചു.

​മനുഷ്യത്വം മരവിച്ചു പോകുന്ന കാലത്ത്, സ്വന്തം ജീവൻ പണയം വെച്ച് മറ്റൊരാൾക്ക് തുണയാവുകയും, ആ പ്രതിസന്ധിയിലും സത്യസന്ധത ഉയർത്തിപ്പിടിക്കുകയും ചെയ്ത ഹരി മുണ്ടത്തിക്കോടിന് നാട് ആദരവോടെ സല്യൂട്ട് നൽകുകയാണ്.