മഴക്കൊപ്പം ആഞ്ഞടിച്ച കാറ്റ്;കൂരാച്ചുണ്ട് ചാലിടത്ത് വീടിന്റെ മേൽക്കൂര തകർന്നു വീണു, ഒഴിവായത് വൻ ദുരന്തം

 

കൂരാച്ചുണ്ട്: വേനൽ മഴയോടൊപ്പം ഉണ്ടായ ശക്തമായ കാറ്റിൽ കൂരാച്ചുണ്ടിൽ വീടിന്റെ മേൽക്കൂര തകർന്നു വീണു. കൂരാച്ചുണ്ട് ചാലിടം മസ്ജിദിന് സമീപം താമസിക്കുന്ന നടുക്കണ്ടി മൊയ്തുവിന്റെ വീടാണ് അപകടത്തിൽപ്പെട്ടത്. ഇന്നലെ വൈകുന്നേരമുണ്ടായ ശക്തമായ കാറ്റിലും മഴയിലുമാണ് വീടിന്റെ മേൽക്കൂര പൂർണ്ണമായും തകർന്ന് താഴേക്ക് വീണത്.

സംഭവം നടക്കുമ്പോൾ വീട്ടുകാർ അകത്തുണ്ടായിരുന്നെങ്കിലും അത്ഭുതകരമായി രക്ഷപ്പെട്ടു. മേൽക്കൂര തകർന്ന് വീണെങ്കിലും ആളപായം സംഭവിക്കാത്തത് വലിയ ആശ്വാസമായി. വീടിന്റെ അകത്തെ ഫർണിച്ചറുകൾക്കും മറ്റ് വീട്ടുപകരണങ്ങൾക്കും നാശനഷ്ടങ്ങൾ സംഭവിച്ചിട്ടുണ്ട്.

​

അപകടവിവരമറിഞ്ഞ് വാർഡ് മെമ്പറും കൂരാച്ചുണ്ട് പഞ്ചായത്ത് വൈസ് പ്രസിഡന്റുമായ ബിജു കടലാശ്ശേരി സ്ഥലം സന്ദർശിച്ചു. നാശനഷ്ടങ്ങൾ വിലയിരുത്തിയ അദ്ദേഹം, ദുരിതബാധിതനായ മൊയ്തുവിനും കുടുംബത്തിനും പഞ്ചായത്തിന്റെ ഭാഗത്തുനിന്ന് അടിയന്തരമായി നൽകാൻ കഴിയുന്ന എല്ലാ സഹായങ്ങളും വാഗ്ദാനം ചെയ്തു. റവന്യൂ അധികൃതരെ വിവരം അറിയിച്ചിട്ടുണ്ടെന്നും അർഹമായ നഷ്ടപരിഹാരം ലഭ്യമാക്കാൻ നടപടികൾ സ്വീകരിക്കുമെന്നും അദ്ദേഹം അറിയിച്ചു.