കരിഞ്ഞുണങ്ങി പുൽമേടുകൾ; വരൾച്ചയും വിലക്കയറ്റവും: കൂരാച്ചുണ്ട്, ചക്കിട്ടപാറയിലെ ക്ഷീരമേഖല പ്രതിസന്ധിയിൽ

 

കൂരാച്ചുണ്ട്: കത്തിക്കാളുന്ന വേനലിൽ കൂരാച്ചുണ്ട്, ചക്കിട്ടപാറ പഞ്ചായത്തുകളിലെ ക്ഷീരകർഷകർ കടുത്ത ദുരിതത്തിൽ. മഴക്കുറവിനെ തുടർന്ന് പുല്ലുകൾ കരിഞ്ഞുണങ്ങുകയും ജലാശയങ്ങൾ വറ്റിവരളുകയും ചെയ്തതോടെ മേഖലയിലെ ക്ഷീരമേഖല കടുത്ത പ്രതിസന്ധിയിലായി. കൃഷി നാശത്തെ തുടർന്ന് പല കർഷകരും വരുമാനത്തിനായി പ്രധാനമായും ആശ്രയിച്ചിരുന്നത് പശുക്കളെയായിരുന്നു. എന്നാൽ ഇപ്പോൾ അതും വലിയൊരു ബാധ്യതയായി മാറിയിരിക്കുകയാണ്.

​വിലക്കയറ്റവും ഉത്പാദനച്ചെലവും

​കന്നുകാലികളെ പരിപാലിക്കുന്നതിനുള്ള ചിലവ് ദിനംപ്രതി ഉയരുകയാണ്. കാലിത്തീറ്റ, വൈക്കോൽ, പിണ്ണാക്ക് എന്നിവയുടെ വില താങ്ങാനാവുന്നതിലും അപ്പുറമാണ്. ഇതിനു പുറമെ, കർണാടകയിൽ നിന്ന് എത്തിക്കുന്ന ചോളത്തണ്ടിനും വില കുതിച്ചുയർന്നത് കർഷകർക്ക് ഇരട്ടപ്രഹരമായി. ഉത്പാദനച്ചെലവിന് ആനുപാതികമായ വരുമാനം പാൽ വിപണിയിൽ നിന്ന് ലഭിക്കാത്തത് കർഷകരെ കടുത്ത സാമ്പത്തിക ബാധ്യതയിലേക്ക് തള്ളിയിടുന്നു.

തങ്ങളുടെ ജീവിതമാർഗ്ഗമായ ക്ഷീരമേഖലയെ സംരക്ഷിക്കാൻ അധികൃതർ അടിയന്തരമായി ഇടപെടണമെന്നാണ് കർഷകരുടെ ആവശ്യം. സബ്‌സിഡി നിരക്കിൽ കാലിത്തീറ്റ ലഭ്യമാക്കാനും, ചികിത്സാ സൗകര്യങ്ങൾ വർദ്ധിപ്പിക്കാനും സർക്കാർ മുൻകൈ എടുക്കണമെന്നാണ് ഇവരുടെ ആവശ്യം. അല്ലാത്തപക്ഷം ഈ മേഖലയിൽ നിന്ന് കർഷകർക്ക് പിന്മാറേണ്ടി വരുമെന്ന ആശങ്ക ശക്തമാണ്.