വിശ്വാസമല്ല, പച്ചയായ ക്രൂരത! പെൺകുട്ടിയെ ചൂരലിന് അടിച്ചു പരിക്കേൽപ്പിച്ച ഉസ്താദ് പിടിയിൽ
കായംകുളം: ബാധയൊഴിപ്പിക്കാനെന്ന വ്യാജേന 15 വയസ്സുകാരിയെ ക്രൂരമായി മർദിച്ച സംഭവത്തിൽ മന്ത്രവാദി പോലീസ് പിടിയിലായി. ചങ്ങനാശ്ശേരി സ്വദേശിയായ യൂസഫ് കുട്ടി (56) ആണ് കായംകുളം പോലീസിന്റെ പിടിയിലായത്. വിശ്വാസത്തിന്റെ മറവിൽ പ്രായപൂർത്തിയാകാത്ത പെൺകുട്ടിയോട് കാട്ടിയ മൃഗീയമായ ക്രൂരതയുടെ വിവരങ്ങളാണ് ഇപ്പോൾ പുറത്തുവരുന്നത്.
ഹരിപ്പാട് സ്വദേശിനിയായ പെൺകുട്ടിക്കാണ് ഈ ദുരനുഭവം ഉണ്ടായത്. കായംകുളത്തെ ബന്ധുവീട്ടിൽ വെച്ചായിരുന്നു സംഭവം. ബാധയൊഴിപ്പിക്കാനെന്ന പേരിൽ പെൺകുട്ടിയുടെ കൈകാലുകൾ കെട്ടിയിട്ട ശേഷം പ്രതി ചൂരൽ ഉപയോഗിച്ച് തല്ലിച്ചതയ്ക്കുകയായിരുന്നു. കുട്ടിയുടെ ശരീരമാസകലം മർദനമേറ്റ പാടുകളുണ്ട്. കരഞ്ഞുവിളിച്ചിട്ടും ദയ കാട്ടാതെയായിരുന്നു ഉസ്താദെന്ന് സ്വയം വിശേഷിപ്പിച്ച ഇയാളുടെ പീഡനം.
കേസിലെ ഒന്നാം പ്രതി പെൺകുട്ടിയുടെ ബന്ധുവായ യുവതിയാണ്. കുട്ടിയെ മന്ത്രവാദത്തിന് വിട്ടുകൊടുത്തതും പീഡനത്തിന് കൂട്ടുനിന്നതും ഇവരാണെന്ന് പോലീസ് കണ്ടെത്തിയിരുന്നു. എന്നാൽ, ഇവർ നിലവിൽ മറ്റൊരു പോക്സോ കേസിൽ പ്രതിയായി ജയിലിൽ കഴിയുകയാണ്. ഈ സാഹചര്യത്തിലാണ് രണ്ടാം പ്രതിയായ യൂസഫ് കുട്ടിയെ തേടി പോലീസ് അന്വേഷണം ഊർജിതമാക്കിയത്.
സംഭവത്തിന് ശേഷം ഒളിവിൽ പോയ പ്രതിയെ സൈബർ സെല്ലിന്റെ സഹായത്തോടെയാണ് കായംകുളം പോലീസ് പിന്തുടർന്നത്. ഇയാൾ ഒളിച്ചു താമസിച്ചിരുന്ന കേന്ദ്രം വളഞ്ഞാണ് അറസ്റ്റ് രേഖപ്പെടുത്തിയത്. പ്രതിയെ ഇന്ന് കോടതിയിൽ ഹാജരാക്കും.
വിശ്വാസത്തിന്റെ പേരിൽ ഇത്തരം അനാചാരങ്ങളും ക്രൂരതകളും തുടരുന്നത് പ്രദേശത്ത് വലിയ പ്രതിഷേധത്തിന് കാരണമായിട്ടുണ്ട്. കുറ്റവാളികൾക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു.
Comments
Post a Comment