കാറ്റിൽ തകർന്നത് കർഷകരുടെ സ്വപ്നങ്ങൾ; ദുരിതബാധിതർക്ക് കൈത്താങ്ങായി ചക്കിട്ടപാറ പഞ്ചായത്ത്.

 

ചക്കിട്ടപാറ: കഴിഞ്ഞ ദിവസം പ്രദേശത്തുണ്ടായ ശക്തമായ കാറ്റിൽ ചക്കിട്ടപാറ ഗ്രാമപഞ്ചായത്തിലെ പൂഴിത്തോട്, മാവെട്ടം, സെന്റ് മേരീസ് പ്രദേശങ്ങളിൽ വൻ കൃഷിനാശം. ദീർഘനാളത്തെ അധ്വാനത്തിന്റെ ഫലമായി വിളവെടുപ്പിന് പാകമായ കൃഷികൾ പ്രകൃതിദുരന്തത്തിൽ നശിച്ചത് കർഷകരെ വലിയ പ്രതിസന്ധിയിലാക്കി.

​വിവരമറിഞ്ഞ ഉടൻ തന്നെ ചക്കിട്ടപാറ ഗ്രാമപഞ്ചായത്ത് പ്രസിഡന്റ് മോളി തോമസ് ആയിത്തമറ്റത്തിൽ ദുരന്തബാധിത പ്രദേശങ്ങൾ സന്ദർശിച്ചു. വീടുകൾക്കും കൃഷിയിടങ്ങൾക്കും സംഭവിച്ച നാശനഷ്ടങ്ങൾ നേരിട്ട് വിലയിരുത്തിയ പ്രസിഡന്റ്, അടിയന്തരമായി ഇടപെടാനും നാശനഷ്ടങ്ങൾ തിട്ടപ്പെടുത്തി റിപ്പോർട്ട് സമർപ്പിക്കാനും ബന്ധപ്പെട്ട വകുപ്പുകൾക്ക് കർശന നിർദേശം നൽകി.

​പ്രസിഡന്റിന്റെ നിർദേശത്തെത്തുടർന്ന് കൃഷിഭവൻ ഉദ്യോഗസ്ഥർ ഇന്ന് തന്നെ സ്ഥലത്തെത്തി നാശനഷ്ടങ്ങളുടെ കണക്കെടുപ്പ് പൂർത്തിയാക്കി. കൃഷിനാശം സംഭവിച്ച കർഷകർക്ക് അർഹമായ നഷ്ടപരിഹാരം എത്രയും വേഗം ലഭ്യമാക്കുന്നതിനായി റവന്യൂ വകുപ്പിന്റെ ഭാഗത്തുനിന്നുള്ള നടപടികൾ വരും ദിവസങ്ങളിൽ തന്നെ പൂർത്തിയാക്കുമെന്ന് വില്ലേജ് അധികൃതരും ഉറപ്പുനൽകിയിട്ടുണ്ട്.

​ദുരിതബാധിതർക്ക് ആവശ്യമായ എല്ലാ സഹായങ്ങളും പഞ്ചായത്തിന്റെ ഭാഗത്തുനിന്നുണ്ടാകുമെന്ന് മോളി തോമസ് ആയിത്തമറ്റത്തിൽ അറിയിച്ചു.