മൃതദേഹത്തോട് അനാദരവ്: ഫ്രീസറിന്റെ സ്വിച്ചിടാൻ മറന്നു; അഞ്ചലിൽ യുവാവിന്റെ മൃതദേഹം മോർച്ചറിയിൽ അഴുകി വീർത്ത നിലയിൽ
അഞ്ചൽ: സ്വകാര്യ ആശുപത്രിയിലെ മോർച്ചറിയിൽ സൂക്ഷിച്ചിരുന്ന മൃതദേഹം ഫ്രീസറിന്റെ സ്വിച്ച് ഓൺ ചെയ്യാൻ മറന്നതിനെത്തുടർന്ന് അഴുകി വീർത്ത നിലയിൽ കണ്ടെത്തി. പൂനെയിൽ പ്രോജക്ട് മാനേജറായിരുന്ന ആയുർ തോട്ടത്തറ സ്വദേശി ജോയൽ ജോർജ് മാത്യുവിന്റെ (32) മൃതദേഹത്തോടാണ് ആശുപത്രി അധികൃതർ അനാദരവ് കാട്ടിയത്. സംഭവത്തിൽ പ്രതിഷേധവുമായി ബന്ധുക്കൾ രംഗത്തെത്തി.
സംഭവത്തെക്കുറിച്ച് പൊലീസ് പറയുന്നത്:
കഴിഞ്ഞ ദിവസം സുഹൃത്തുക്കളോടൊപ്പം ഡാമിൽ കുളിക്കാനിറങ്ങവേ മുങ്ങിമരിച്ച ജോയലിന്റെ മൃതദേഹം പോസ്റ്റ്മോർട്ടത്തിന് ശേഷം അഞ്ചലിലെ സെന്റ് ജോസഫ് മിഷൻ ഹോസ്പിറ്റലിലെ മോർച്ചറിയിൽ സൂക്ഷിക്കുകയായിരുന്നു. ഇന്ന് രാവിലെ സംസ്കാര ചടങ്ങുകൾക്കായി മൃതദേഹം കൊണ്ടുപോകാൻ ബന്ധുക്കൾ എത്തിയപ്പോഴാണ് ദാരുണമായ കാഴ്ച കണ്ടത്. മൃതദേഹം പൂർണ്ണമായും അഴുകി ദുർഗന്ധം വമിച്ച് വീർത്ത നിലയിലായിരുന്നു.
മൃതദേഹം മോർച്ചറിയിൽ വെച്ചപ്പോൾ ഫ്രീസറിന്റെ സ്വിച്ച് ഓൺ ചെയ്യാൻ ജീവനക്കാർ മറന്നുപോയതാണ് ഈ ദുരവസ്ഥയ്ക്ക് കാരണമായതെന്ന് പറയപ്പെടുന്നു. മൃതദേഹം ഫ്രീസറിൽ നിന്ന് പുറത്തെടുക്കാൻ പോലും കഴിയാത്ത വിധം അഴുകിയിരുന്നു.
ജീവനക്കാരുടെ മോശം പെരുമാറ്റമെന്ന് പരാതി
വീഴ്ച ചോദ്യം ചെയ്ത ബന്ധുക്കളോട് ആശുപത്രി ജീവനക്കാർ മോശമായി പെരുമാറിയതായും പരാതിയുണ്ട്. നാലോ അഞ്ചോ മൃതദേഹങ്ങൾ സൂക്ഷിക്കാൻ സൗകര്യമുണ്ടെന്ന് അവകാശപ്പെടുന്ന മോർച്ചറിയിലെ ഫ്രീസറുകൾ ഭൂരിഭാഗവും പ്രവർത്തനക്ഷമമല്ലെന്ന് ആക്ഷേപമുണ്ട്. ആശുപത്രി അധികൃതരുടെ ഭാഗത്തുനിന്നുണ്ടായ ഈ ഗുരുതരമായ അനാസ്ഥയ്ക്കെതിരെ കടുത്ത പ്രതിഷേധമാണ് ഉയരുന്നത്.
നിയമനടപടിയുമായി കുടുംബം
മൃതദേഹത്തോട് കാണിച്ച അനാദരവിനെതിരെ ജോയലിന്റെ ബന്ധുക്കൾ അഞ്ചൽ പൊലീസിൽ പരാതി നൽകി. സംഭവത്തിൽ വിശദമായ അന്വേഷണം വേണമെന്നും കുറ്റക്കാർക്കെതിരെ കർശന നടപടി സ്വീകരിക്കണമെന്നുമാണ് കുടുംബത്തിന്റെ ആവശ്യം. ആരോഗ്യവകുപ്പ് ഉന്നത ഉദ്യോഗസ്ഥർക്കും പരാതി നൽകാൻ കുടുംബം തീരുമാനിച്ചിട്ടുണ്ട്.
Comments
Post a Comment