ഹരിതകർമസേനയുടെ സത്യസന്ധത; ചെരുപ്പിനടിയിൽ നിന്ന് കണ്ടെത്തിയ താലി ഉടമയ്ക്ക് തിരികെ നൽകി

 

പള്ളിക്കര: ഉപേക്ഷിക്കപ്പെട്ട ചെരുപ്പുകൾക്കിടയിൽ നിന്ന് അപ്രതീക്ഷിതമായി നഷ്ടപ്പെട്ട ഒരു പവൻ സ്വർണ്ണത്താലി കണ്ടെത്തി ഹരിതകർമസേന അംഗങ്ങൾ മാതൃകയായി. ചെരുപ്പിനടിയിൽ ഒട്ടിപ്പിടിച്ച നിലയിലായിരുന്ന താലി, ഹരിതകർമസേന അംഗങ്ങളായ സുജയും സുനിതയുമാണ് കണ്ടെത്തിയത്.

ഒരു ആഴ്ച മുൻപ് വിഷുവിന് മുന്നോടിയായി എണ്ണപ്പാറ സ്വദേശി ജിഷ ബന്ധുവായ കനകയുടെ (ചെർക്കാപ്പാറയിലെ കടയുടമ) വീട്ടിലെത്തിയപ്പോഴാണ് അപ്രതീക്ഷിതമായി താലി നഷ്ടപ്പെട്ടത്. വീട്ടുകാരും നാട്ടുകാരും ഉൾപ്പെടെ എല്ലാവരും ചേർന്ന് വീടും പരിസരവും അരിച്ചുപെറുക്കിയെങ്കിലും താലി കണ്ടെത്താനായില്ല. നിരാശയോടെയും സങ്കടത്തോടെയുമാണ് ജിഷ മടങ്ങിയത്. അന്ന് തിരച്ചിലിന് സഹായിക്കാൻ എത്തിയ സമീപവാസി സുധയുടെ ചെരുപ്പ് അബദ്ധത്തിൽ പൊട്ടിയിരുന്നു. പിന്നീട് ഹരിതകർമസേനയ്ക്ക് നൽകാനായി സുധ ഇത് ഒരു വശത്തേക്ക് മാറ്റിയിട്ടിരുന്നു.

ഈ മാസം ഹരിതകർമസേനയുടെ പ്രവർത്തനങ്ങളുടെ ഭാഗമായി സുജയും സുനിതയും പഴയതും ഉപയോഗശൂന്യവുമായ ചെരുപ്പുകൾ ശേഖരിക്കാൻ സുധയുടെ വീട്ടിലെത്തി. സുധ ചാക്കിലാക്കിയ ചെരുപ്പുകൾക്കൊപ്പം, താൻ മാറ്റിയിട്ടിരുന്ന ചെരുപ്പും കാലുകൊണ്ട് തട്ടിനീക്കി അവർക്ക് കൈമാറി. ഹരിതകർമസേനാംഗങ്ങൾ ഈ ചെരുപ്പുകൾ വൃത്തിയാക്കി ശേഖരിക്കുന്നതിനിടെയാണ് അസാധാരണമായ ആ കാഴ്ച കണ്ടത്. ചെരുപ്പിന്റെ അടിഭാഗത്ത് സിമന്റ് തറയിൽ ഉരസി അഴുക്ക് കളയുന്നതിനിടെ, ചെരുപ്പിൽ പറ്റിപ്പിടിച്ചിരുന്ന ബബിൾഗമിൽ ഭദ്രമായി ഒട്ടിയിരിക്കുന്ന നിലയിൽ ഒരു സ്വർണ്ണത്താലി!

ഉടൻ തന്നെ സുജയും സുനിതയും വിവരം സുധയെയും മറ്റ് സഹപ്രവർത്തകരെയും അറിയിച്ചു. അപ്പോഴാണ് ജിഷയ്ക്ക് താലി നഷ്ടപ്പെട്ട കാര്യം ഇവർ പരസ്പരം സംസാരിക്കുന്നതും, കനകയെ വിവരം അറിയിക്കുന്നതും. ഉടൻ തന്നെ താലിയുടെ ഫോട്ടോ അയച്ചു കൊടുത്തതോടെ, അത് ജിഷയുടെ നഷ്ടപ്പെട്ട താലി തന്നെയാണെന്ന് ഉറപ്പിച്ചു. വിവരമറിഞ്ഞ് സന്തോഷത്തോടെ എത്തിയ ജിഷ, തന്റെ താലി തിരികെ വാങ്ങി മാലയിൽ കോർത്തിട്ടു.

​നഷ്ടപ്പെട്ടെന്ന് കരുതിയ ആഭരണം അപ്രതീക്ഷിതമായി തിരികെ ലഭിച്ചതിന്റെ ആശ്വാസത്തിലാണ് ജിഷ. ഹരിതകർമസേന അംഗങ്ങളുടെ സത്യസന്ധതയെയും ജാഗ്രതയെയും നാട്ടുകാർ ഒന്നടങ്കം അഭിനന്ദിക്കുകയാണ്.