പെരുവണ്ണാമൂഴി റിസർവോയർ കടന്നെത്തുന്ന 'ഗജഭീതി'; കൂരാച്ചുണ്ടിൽ കൃഷിനാശം പതിവാകുന്നു

 

​കൂരാച്ചുണ്ട്: പഞ്ചായത്തിലെ അഞ്ചാം വാർഡിൽപ്പെട്ട മണ്ടോപ്പാറ മേഖലയിൽ കാട്ടാനശല്യം അതിരൂക്ഷമാകുന്നു. ജനവാസ മേഖലയിലിറങ്ങുന്ന ആനക്കൂട്ടം വ്യാപകമായി കൃഷിനാശം വരുത്തുന്നത് പതിവാകുകയാണ്. കഴിഞ്ഞ ഒരു മാസത്തിനിടെ പലതവണ ഈ പ്രദേശത്ത് കാട്ടാനകൾ ഇറങ്ങി നാശനഷ്ടങ്ങൾ വരുത്തിയിട്ടുണ്ട്.

കഴിഞ്ഞ രാത്രി ജനവാസ മേഖലയിലിറങ്ങിയ കാട്ടാനകൾ പാലക്കാട്ട് ജോസ് എന്ന കർഷകന്റെ കൃഷിയിടം തകർത്തു. വിളവെടുപ്പിന് പാകമായ വാഴകൾ, കമുക്, പ്ലാവ് എന്നിവയെല്ലാം ആനക്കൂട്ടം നശിപ്പിച്ചു. വീടിന് തൊട്ടടുത്ത് വരെ ആനകൾ എത്തിയതോടെ കുടുംബങ്ങൾ വലിയ ഭീതിയിലാണ് കഴിയുന്നത്. പെരുവണ്ണാമൂഴി ഡാമിന്റെ റിസർവോയർ നീന്തിക്കടന്നാണ് ആനകൾ കൃഷിയിടങ്ങളിലേക്ക് എത്തുന്നത്.

പ്രദേശത്ത് കാട്ടാനശല്യം തുടർക്കഥയായിട്ടും അധികൃതർ വേണ്ടത്ര ഗൗരവത്തോടെ ഇടപെടുന്നില്ലെന്നാണ് നാട്ടുകാരുടെ പരാതി. വന്യമൃഗങ്ങളെ പ്രതിരോധിക്കാൻ ഫെൻസിംഗ് ഉൾപ്പെടെയുള്ള സുരക്ഷാ സംവിധാനങ്ങൾ ഇല്ലാത്തത് കർഷകരെ കടുത്ത പ്രതിസന്ധിയിലാക്കുന്നു.

​ കാട്ടാനശല്യത്തിന് പരിഹാരമായി സർക്കാർ പ്രഖ്യാപിച്ച സോളാർ തൂക്കുവേലി പദ്ധതി ഇതുവരെ യാഥാർഥ്യമായിട്ടില്ല.

​ പ്രഖ്യാപനങ്ങൾ കടലാസിലൊതുങ്ങുന്നതല്ലാതെ പ്രായോഗികമായ നടപടികൾ ഉണ്ടാകുന്നില്ലെന്ന് കർഷകർ കുറ്റപ്പെടുത്തുന്നു.

​വന്യമൃഗ ശല്യം കാരണം ജീവനും സ്വത്തിനും സംരക്ഷണമില്ലാത്ത അവസ്ഥയാണെന്നും, സർക്കാർ എത്രയും വേഗം ഫെൻസിംഗ് സംവിധാനം നടപ്പിലാക്കി ഈ ദുരിതത്തിന് അറുതി വരുത്തണമെന്നുമാണ് മണ്ടോപ്പാറയിലെ കർഷകരുടെ ആവശ്യം.