നീതി തേടിയെത്തിയ യുവാവിന് മർദ്ദനം; എസ്.ഐക്കെതിരെ ഗുരുതര ആരോപണം

 

കാക്കനാട്: കുടുംബപ്രശ്‌നം പരിഹരിക്കാനെന്ന വ്യാജേന സ്റ്റേഷനിലേക്ക് വിളിച്ചുവരുത്തിയ ദലിത് യുവാവിന് ഇൻഫോപാർക്ക് പോലീസ് സ്റ്റേഷനിൽ ക്രൂരമർദനമേറ്റതായി പരാതി. കാക്കനാട് സ്വദേശി അഭിലാഷിനാണ് (34) മർദനമേറ്റത്. പരിക്കേറ്റ യുവാവിനെ കാക്കനാട് സഹകരണ ആശുപത്രിയിൽ പ്രവേശിപ്പിച്ചു.

ഇന്ന് രാവിലെ 11:30-ഓടെയായിരുന്നു സംഭവം. അഭിലാഷിന്റെ ഭാര്യ ജീന നൽകിയ കുടുംബപരാതിയിൽ കാര്യങ്ങൾ സംസാരിക്കാനാണെന്ന് പറഞ്ഞാണ് ഇൻഫോപാർക്ക് എസ്.ഐ യുവാവിനെ സ്റ്റേഷനിലേക്ക് വിളിപ്പിച്ചത്. എസ്.ഐയുടെ ക്യാബിനിൽ സംസാരം നടന്നുകൊണ്ടിരിക്കെ, പെട്ടെന്ന് പ്രകോപിതനായ ഉദ്യോഗസ്ഥൻ അഭിലാഷിനെ വലിച്ചിഴച്ച് കൊണ്ടുപോയെന്നാണ് ആരോപണം.

​സ്റ്റേഷനിലെ സി.സി.ടി.വി ക്യാമറകൾ ഇല്ലാത്ത പ്രത്യേക മുറിയിലേക്ക് കൊണ്ടുപോയി തന്നെ ക്രൂരമായി മർദിച്ചുവെന്ന് ചികിത്സയിൽ കഴിയുന്ന അഭിലാഷ് പറഞ്ഞു. ശരീരമാസകലം മർദനമേറ്റ യുവാവിനെ പിന്നീട് ബന്ധുക്കളെത്തിയാണ് ആശുപത്രിയിൽ എത്തിച്ചത്.

ദലിത് യുവാവിനെതിരെ പോലീസ് കാട്ടിയത് കടുത്ത മനുഷ്യാവകാശ ലംഘനമാണെന്ന് ആരോപിച്ച് വിവിധ ദലിത് സംഘടനകൾ രംഗത്തെത്തിയിട്ടുണ്ട്. പരാതി പരിഹരിക്കേണ്ടതിന് പകരം മർദനമുറകൾ അഴിച്ചുവിട്ട ഉദ്യോഗസ്ഥനെതിരെ ഉന്നത പോലീസ് അധികാരികൾക്ക് പരാതി നൽകാനാണ് ബന്ധുക്കളുടെ തീരുമാനം.

​അതേസമയം, സംഭവത്തിൽ ഉന്നത ഉദ്യോഗസ്ഥരുടെ ഭാഗത്തുനിന്ന് ഇതുവരെ ഔദ്യോഗിക വിശദീകരണമൊന്നും ലഭ്യമായിട്ടില്ല. കുറ്റക്കാരനായ ഉദ്യോഗസ്ഥനെതിരെ നടപടി ആവശ്യപ്പെട്ട് വരുംദിവസങ്ങളിൽ പ്രതിഷേധം ശക്തമാക്കാനാണ് പ്രദേശവാസികളുടെ തീരുമാനം.