പേരാമ്പ്ര മണ്ഡലത്തിൽ 'കാഫിർ' മോഡൽ? വർഗീയ അനൗൺസ്‌മെന്റുമായി എൽഡിഎഫ് പ്രചാരണ വാഹനം; തെളിവുപുറത്തുവിട്ട് യുഡിഎഫ്

 

​ചക്കിട്ടപാറ: ആവേശകരമായ തിരഞ്ഞെടുപ്പ് പോരാട്ടം നടക്കുന്ന പേരാമ്പ്ര നിയോജക മണ്ഡലത്തിൽ വർഗീയ ധ്രുവീകരണം ലക്ഷ്യമിട്ട് ഇടതുമുന്നണി വ്യാജ പ്രചാരണം നടത്തുന്നതായി യുഡിഎഫ്. യുഡിഎഫ് സ്ഥാനാർത്ഥി തഹലിയ ഫാത്തിമക്കെതിരെ അങ്ങേയറ്റം വർഗീയ പരാമർശങ്ങൾ അടങ്ങിയ ശബ്ദരേഖ എൽഡിഎഫിന്റെ പ്രചാരണ വാഹനത്തിലൂടെ അനൗൺസ് ചെയ്തതാണ് പുതിയ വിവാദത്തിന് തിരികൊളുത്തിയിരിക്കുന്നത്. സംഭവത്തിൽ യുഡിഎഫ്, കെഎസ് യു, യൂത്ത് കോൺഗ്രസ് കമ്മിറ്റികൾ തിരഞ്ഞെടുപ്പ് കമ്മീഷനും പൊലീസിനും പരാതി നൽകി.

​ആവളയിൽ ദൃശ്യങ്ങൾ പകർത്തി; സാക്ഷിയായി യുവാവ്

​ബുധനാഴ്ച രാവിലെ ഒമ്പതരക്കും പത്തിനും ഇടയിൽ ആവള മടത്തിൽമുക്ക് ഓഡിറ്റോറിയത്തിന് സമീപത്ത് വെച്ചാണ് വിവാദമായ അനൗൺസ്മെന്റ് നടന്നത്. എൽഡിഎഫിന്റെ പ്രചാരണ വാഹനത്തിൽ നിന്നും വർഗീയ പരാമർശങ്ങൾ ഉയരുന്നത് ശ്രദ്ധയിൽപ്പെട്ട സലീൽ ആവള എന്ന യുവാവ് ഇതിന്റെ ദൃശ്യങ്ങൾ മൊബൈലിൽ പകർത്തുകയായിരുന്നു. സമാനമായ രീതിയിലുള്ള അനൗൺസ്മെന്റ് വീഡിയോകൾ വാട്‌സ്ആപ്പ് ഗ്രൂപ്പുകളിലും പ്രചരിക്കുന്നുണ്ടെന്ന് സലീൽ മീഡിയ വണ്ണിനോട് പ്രതികരിച്ചു. ഈ ദൃശ്യങ്ങൾ പുറത്തുവന്നതോടെ എൽഡിഎഫ് പ്രതിരോധത്തിലായിരിക്കുകയാണ്.

​വികസനം പറയാനില്ലാതെ വർഗീയതയിലേക്ക്

​പത്തുവർഷമായി കേരളം ഭരിക്കുന്ന പിണറായി സർക്കാരിന്റെ പ്രവർത്തനങ്ങളോ, മണ്ഡലത്തിലെ വികസന നേട്ടങ്ങളോ ഉയർത്തിക്കാട്ടാൻ എൽഡിഎഫിന് സാധിക്കുന്നില്ലെന്ന് യുഡിഎഫ് ആരോപിച്ചു. വികസന ചർച്ചകളിൽ നിന്ന് ജനശ്രദ്ധ തിരിക്കാനാണ് എൽഡിഎഫ് ഇത്തരത്തിലുള്ള തരംതാണ പ്രചാരണങ്ങളിലേക്ക് കടന്നിരിക്കുന്നത്. കഴിഞ്ഞ ലോക്‌സഭാ തിരഞ്ഞെടുപ്പ് കാലത്ത് ഏറെ ചർച്ചയായ 'കാഫിർ' സ്ക്രീൻഷോട്ട് വിവാദത്തിന് പിന്നിൽ പ്രവർത്തിച്ചവർ തന്നെയാണ് ഈ വർഗീയ കളികൾക്കും പിന്നിലെന്ന് യുഡിഎഫ് നേതാക്കൾ ആരോപിച്ചു.

​തഹലിയ ഫാത്തിമയ്ക്ക് വർദ്ധിക്കുന്ന ജനപിന്തുണ

​മുസ്ലിം ലീഗിലെ യുവനേതാവ് തഹലിയ ഫാത്തിമ സ്ഥാനാർത്ഥിയായി എത്തിയ നാൾ മുതൽ എൽഡിഎഫ് വ്യക്തിഹത്യയും വർഗീയ ആരോപണങ്ങളുമാണ് ഉന്നയിക്കുന്നത്. ജമാഅത്തെ ഇസ്‌ലാമി ബന്ധം ആരോപിച്ചുള്ള ചോദ്യങ്ങൾക്ക് തഹലിയ കൃത്യമായ മറുപടി നൽകിയതോടെ എൽഡിഎഫ് പ്രതിരോധത്തിലായിരുന്നു. രാഹുൽ ഗാന്ധിയുടെ മണ്ഡല സന്ദർശനത്തോടെ യുഡിഎഫ് ക്യാമ്പുകളിൽ വലിയ ആവേശമാണ് പ്രകടമാകുന്നത്. കുറഞ്ഞ സമയം കൊണ്ട് നാനാജാതി മതസ്ഥർക്കിടയിൽ തന്റേതായ ഇടം കണ്ടെത്താൻ തഹലിയക്ക് സാധിച്ചിട്ടുണ്ട്.

​കർശന നടപടി വേണമെന്ന് യുഡിഎഫ് ആവശ്യപെട്ടു

​ബിജെപിയെ സഹായിക്കാനാണ് എൽഡിഎഫ് ഇത്തരം വർഗീയ കുതന്ത്രങ്ങൾ പയറ്റുന്നതെന്ന് യുഡിഎഫ് ആരോപിച്ചു. വിവാദ അനൗൺസ്മെന്റിനെതിരെ എൽഡിഎഫ് സ്ഥാനാർത്ഥി മൗനം വെടിഞ്ഞ് പ്രതികരിക്കണം. ഇതിന് പിന്നിൽ പ്രവർത്തിച്ചവർക്കെതിരെ കേസെടുക്കണമെന്നും തിരഞ്ഞെടുപ്പ് കമ്മീഷൻ അടിയന്തരമായി ഇടപെടണമെന്നും യുഡിഎഫ് നേതാക്കൾ ആവശ്യപ്പെട്ടു. എല്ലാ കുപ്രചാരണങ്ങളെയും അതിജീവിച്ച് പേരാമ്പ്രയിലെ ജനങ്ങൾ യുഡിഎഫിന് വൻ വിജയം സമ്മാനിക്കുമെന്ന് നേതാക്കൾ മാധ്യമങ്ങളോട് പറഞ്ഞു.