80-ാം വയസ്സിൽ കന്നി വോട്ട്; വോട്ടർ പട്ടികയിൽ ഇനി നാരായണനും; എട്ടു പതിറ്റാണ്ടിന്റെ കാത്തിരിപ്പിന് വിരാമം

 

ആനമങ്ങാട്: ജനാധിപത്യത്തിന്റെ വലിയ ഉത്സവത്തിൽ എൺപതാം വയസ്സിൽ ആദ്യമായി വോട്ട് രേഖപ്പെടുത്തി മുഴന്നമണ്ണയിലെ എരുമത്തൊടി നാരായണൻ മാതൃകയായി. ജീവിതത്തിന്റെ പ്രതിസന്ധികളിൽ ഒറ്റപ്പെട്ടുപോയ ഈ എൺപതുകാരൻ ഇന്നലെ നടന്ന നിയമസഭാ തിരഞ്ഞെടുപ്പിൽ ആനമങ്ങാട് എ.എൽ.പി സ്‌കൂളിലെ 149-ാം നമ്പർ ബൂത്തിലെത്തിയാണ് തന്റെ സമ്മതിദാനാവകാശം വിനിയോഗിച്ചത്.

​ആനമങ്ങാട് സ്വദേശികളായ എരുമതടത്തിൽ രാമന്റെയും കോതമ്മയുടെയും മകനായ നാരായണൻ, മാതാപിതാക്കളുടെയും സഹോദരങ്ങളുടെയും മരണശേഷം കഴിഞ്ഞ 40 വർഷമായി തീർത്തും ഒറ്റപ്പെട്ട ജീവിതമാണ് നയിക്കുന്നത്. വിവാഹജീവിതം പരാജയപ്പെട്ടതോടെ ഒറ്റമുറി ഷീറ്റ് മേഞ്ഞ വീട്ടിലായി താമസം. ആധാർ കാർഡോ റേഷൻ കാർഡോ ഇല്ലാത്തതിനാൽ ക്ഷേമ പെൻഷൻ ഉൾപ്പെടെയുള്ള യാതൊരു ആനുകൂല്യങ്ങളും ഇദ്ദേഹത്തിന് ലഭിച്ചിരുന്നില്ല. തിരിച്ചറിയൽ രേഖകൾ ഇല്ലാത്തതുകൊണ്ട് തന്നെ ഇതുവരെ വോട്ട് ചെയ്യാനും കഴിഞ്ഞിരുന്നില്ല.

​രേഖകളില്ലാത്തതിനാൽ ദുരിതമനുഭവിക്കുന്ന വിവരം സി.പി.ഐ പ്രതിനിധി ജ്യോതി നാരായണൻകുട്ടിയുടെ ശ്രദ്ധയിൽപ്പെട്ടതോടെയാണ് നാരായണന്റെ ജീവിതത്തിൽ മാറ്റം തുടങ്ങിയത്. അദ്ദേഹത്തിന്റെ കൃത്യമായ ഇടപെടലിലൂടെ ആവശ്യമായ രേഖകൾ തയ്യാറാക്കുകയും വോട്ടർ പട്ടികയിൽ പേര് ചേർക്കുകയും ചെയ്തു. സഹായിച്ചവരോടുള്ള നന്ദിസൂചകമായി തന്റെ കന്നി വോട്ട് എൽ.ഡി.എഫ് സ്ഥാനാർത്ഥിക്കാണ് രേഖപ്പെടുത്തിയതെന്ന് നാരായണൻ പറഞ്ഞു.

​പഴയ പത്രങ്ങളും ആക്രി സാധനങ്ങളും ശേഖരിച്ചു വിറ്റ് കിട്ടുന്ന തുച്ഛമായ വരുമാനം കൊണ്ടാണ് നാരായണൻ വിശപ്പടക്കുന്നത്. വീട്ടിൽ വൈദ്യുതി ഇല്ലാത്തതിനാൽ മണ്ണെണ്ണയ്ക്ക് പകരം ഡീസൽ ഉപയോഗിച്ചാണ് വിളക്ക് കത്തിക്കുന്നത്. വോട്ട് ചെയ്തതോടെ തന്റെ വീടിനും വൈകാതെ വെളിച്ചം ലഭിക്കുമെന്ന പ്രതീക്ഷയിലാണ് ഈ വൃദ്ധൻ. 80-ാം വയസ്സിലെ ഈ വോട്ട് ചെയ്യൽ നാരായണന് വെറുമൊരു വോട്ടല്ല, മറിച്ച് താൻ ഈ നാടിന്റെ പൗരനാണെന്ന വലിയൊരു അംഗീകാരം കൂടിയാണ്.