അധ്വാനത്തിന്റെ വിയർപ്പിൽ തിളങ്ങുന്ന ആത്മവിശ്വാസം; 70-ാം വയസ്സിലും വഴിയോരത്ത് ചെരുപ്പുകുത്തിയായി ഒരു കോടീശ്വരൻ

 

​കൊല്ലം: വഴിയോരത്ത് ചെരുപ്പും ബാഗും തുന്നുന്ന വയോധികനെ നമ്മളിൽ പലരും കണ്ടിട്ടുണ്ടാകാം. എന്നാൽ ഇടുക്കിയിൽ മൂന്ന് ഏക്കർ ഏലത്തോട്ടവും വീടുള്ള, റിട്ടയേർഡ് കെ.എസ്.ഇ.ബി ഉദ്യോഗസ്ഥനാണ് തങ്ങളുടെ മുന്നിലിരിക്കുന്നതെന്ന്ആരും കരുതില്ല. കൊല്ലം നഗരത്തിൽ വഴിയോരത്ത് ചെരുപ്പ് തുന്നി ഉപജീവനം നടത്തുന്ന പരാശക്തി എന്ന 70 വയസ്സുകാരന്റെ ജീവിതം ഇന്ന് സമൂഹമാധ്യമങ്ങളിൽ വലിയ ചർച്ചയായിരിക്കുകയാണ്. ഡോ. ആഷ ഉല്ലാസ് പങ്കുവെച്ച അനുഭവക്കുറിപ്പിലൂടെയാണ് ഈ കർമ്മയോഗിയുടെ ജീവിതകഥ പുറംലോകമറിയുന്നത്.

തന്റെ ബാഗ് നന്നാക്കാൻ എത്തിയ ഡോ. ആഷ ഉല്ലാസിനോട് വളരെ ഭവ്യതയോടെ തമിഴ് കലർന്ന മലയാളത്തിൽ സംസാരിക്കുന്ന പരാശക്തിയെക്കുറിച്ചാണ് അവർ ഫേസ്ബുക്കിൽ കുറിച്ചത്. സംസാരത്തിനിടയിൽ തെളിഞ്ഞുവന്നത് അസാധാരണമായ ഒരു ജീവിതചിത്രമായിരുന്നു. ബി.എസ്.സി ബിരുദധാരിയായ അദ്ദേഹം കെ.എസ്.ഇ.ബിയിൽ നിന്ന് വിരമിച്ച ഉദ്യോഗസ്ഥനാണ്. വിരമിച്ച ശേഷം ഇടുക്കിയിൽ മൂന്ന് ഏക്കർ ഏലത്തോട്ടവും വീടും വാങ്ങി. എന്നാൽ വിശ്രമജീവിതം നയിക്കുന്നതിന് പകരം ജോലി തേടി അദ്ദേഹം കൊല്ലത്തേക്ക് വണ്ടി കയറുകയായിരുന്നു.

കൊല്ലത്തെത്തിയ ശേഷം കെട്ടിടപ്പണി ഉൾപ്പെടെയുള്ള കഠിനമായ ജോലികൾ അദ്ദേഹം ചെയ്തു. പിന്നീട് വഴിയോരത്ത് ചെരുപ്പും ബാഗും നന്നാക്കുന്ന ആശാന്റെ കൂടെ ചേർന്ന് ജോലി പഠിച്ചു. ഇന്ന് ആ ആശാൻ കൂടെയില്ലെങ്കിലും, അതേ സ്ഥലത്ത് പരാശക്തി തന്റെ ഉപജീവനം തുടരുന്നു. കെ.എസ്.ഇ.ബി പെൻഷൻ ഉണ്ടായിട്ടും രാവിലെ 6 മുതൽ വൈകിട്ട് 6 വരെ വെയിലും മഴയും സഹിച്ച് അദ്ദേഹം ജോലി ചെയ്യുന്നു. സ്വന്തം അധ്വാനത്തിലൂടെ കൊല്ലത്ത് 5 സെന്റ് സ്ഥലം വാങ്ങി വീട് വെച്ചു. നിലവിൽ മകൾ പോണ്ടിച്ചേരിയിൽ നഴ്സായി ജോലി ചെയ്യുമ്പോഴും മകൾക്ക് ഭാരമാകാതെ സ്വന്തം കാലിൽ നിൽക്കാനാണ് അദ്ദേഹം ആഗ്രഹിക്കുന്നത്.

''വിശ്രമം ശരീരത്തിനാണ്, മനസ്സിനല്ല'' എന്ന് വിശ്വസിക്കുന്ന പരാശക്തി, തന്റെ ഏലത്തോട്ടം മഹീന്ദ്ര കമ്പനി വാങ്ങാൻ സമീപിച്ചപ്പോഴും കൃത്യമായ വില ലഭിച്ചാൽ മാത്രമേ വിൽക്കൂ എന്ന ഉറച്ച നിലപാടിലാണ്. ഭാര്യ മരിച്ചിട്ട് അഞ്ച് വർഷം പിന്നിടുമ്പോഴും തളരാതെ, നട്ടെല്ല് നിവർന്നു നിൽക്കുന്ന അദ്ദേഹത്തിന്റെ ജീവിതം പുതുതലമുറയ്ക്ക് വലിയൊരു പാഠമാണ്.

​''നമ്മളിൽ പലരും 25 വയസ്സിൽ ജീവിതം മടുത്തു എന്ന് പറയുമ്പോൾ, പരാശക്തി സാറിനെപ്പോലെയുള്ളവർ ജീവിതം കൊണ്ട് കാണിച്ചുതരുന്നത് വാർദ്ധക്യം ഒരു അസുഖമല്ല, ഒഴികഴിവുകൾ മാത്രമാണ് അസുഖം എന്നാണ്. ഇങ്ങനെയുള്ള മനുഷ്യരാണ് നമ്മുടെ നാടിന്റെ നട്ടെല്ല്,'' ഡോ. ആഷ ഉല്ലാസ് കുറിക്കുന്നു.

​പ്രായത്തെയും സാഹചര്യങ്ങളെയും അതിജീവിച്ച്, അധ്വാനത്തിന്റെ അന്തസ്സ് ഉയർത്തിപ്പിടിക്കുന്ന പരാശക്തി ഒരു പ്രചോദനമാണ്. ഈ ജീവിതം പാഠപുസ്തകങ്ങളിൽ ഇടംപിടിക്കേണ്ടതാണെന്നാണ് ഡോ. ആഷയുടെ അഭിപ്രായം.