ചക്കിട്ടപാറയും പന്തിരിക്കരയും ആവേശക്കടലാകും; മുന്നണികൾക്കിടയിൽ 50 മീറ്റർ ലക്ഷ്മണരേഖ; പെരുവണ്ണാമൂഴിയിൽ കൊട്ടിക്കലാശത്തിന് കർശന നിയന്ത്രണം
പെരുവണ്ണാമൂഴി: നിയമസഭാ തെരഞ്ഞെടുപ്പ് പ്രചാരണത്തിന് ആവേശം പകർന്നുനടക്കുന്ന കൊട്ടിക്കലാശം സമാധാനപരവും മാതൃകാപരവുമായി പൂർത്തിയാക്കാൻ പെരുവണ്ണാമൂഴി പോലീസ് സ്റ്റേഷനിൽ ചേർന്ന സർവകക്ഷി യോഗം തീരുമാനിച്ചു. ക്രമസമാധാന പ്രശ്നങ്ങൾ ഒഴിവാക്കി, ജനങ്ങൾക്ക് ബുദ്ധിമുട്ടില്ലാത്ത രീതിയിൽ ആഘോഷങ്ങൾ സംഘടിപ്പിക്കാനാണ് രാഷ്ട്രീയ പാർട്ടി പ്രതിനിധികളുടെയും പോലീസിന്റെയും ധാരണ. സ്റ്റേഷൻ പരിധിയിലെ പ്രധാന കേന്ദ്രങ്ങളായ ചക്കിട്ടപാറ, മുതുകാട്, പന്തിരിക്കര അങ്ങാടികളിലാണ് കൊട്ടിക്കലാശത്തിന് പ്രത്യേക ക്രമീകരണങ്ങൾ ഏർപ്പെടുത്തിയത്. സംഘർഷ സാധ്യത ഒഴിവാക്കാൻ മൂന്ന് മുന്നണികൾക്കും പരസ്പരം 50 മീറ്റർ ദൂരപരിധിയിൽ പ്രത്യേക സ്ഥലങ്ങൾ നിശ്ചയിച്ചു നൽകി. പോലീസും തിരഞ്ഞെടുപ്പ് കമ്മീഷനും നൽകിയിട്ടുള്ള കർശന നിർദ്ദേശങ്ങൾ മുന്നണി നേതൃത്വങ്ങൾ പാലിക്കണം. ഗതാഗത തടസ്സമോ പൊതുജനങ്ങൾക്ക് അസൗകര്യമോ ഉണ്ടാകാതെ പ്രവർത്തകരെ നിയന്ത്രിക്കാൻ പാർട്ടികൾ ശ്രദ്ധിക്കണം. ഓരോ രാഷ്ട്രീയ പാർട്ടികളും തങ്ങളുടെ പ്രവർത്തകർക്കും അണികൾക്കും പോലീസ് നൽകിയ നിർദ്ദേശങ്ങൾ സംബന്ധിച്ച വ്യക്തമായ വിവരങ്ങൾ നൽകാനും യോഗത്തിൽ തീരുമാനമായി.
പെരുവണ്ണാമൂഴി സ്റ്റേഷൻ ഇൻസ്പെക്ടർ ഇ. എം. സജീർ യോഗത്തിൽ അധ്യക്ഷത വഹിച്ചു. സമാധാനപരമായ അന്തരീക്ഷം നിലനിർത്താൻ എല്ലാവരുടെയും സഹകരണം അദ്ദേഹം അഭ്യർത്ഥിച്ചു. സബ് ഇൻസ്പെക്ടർ ആർ. അനന്തകൃഷ്ണൻ, പി.ആർ.ഒ കെ.കെ. കുഞ്ഞഹമ്മദ് എന്നിവർ സംസാരിച്ചു. പ്രദേശത്തെ വിവിധ രാഷ്ട്രീയ പാർട്ടികളെ പ്രതിനിധീകരിച്ച് പ്രമുഖ നേതാക്കൾ യോഗത്തിൽ പങ്കെടുത്തു.
സമാധാനാന്തരീക്ഷം ലംഘിക്കുന്നവർക്കെതിരെ കർശന നടപടിയുണ്ടാകുമെന്ന് പോലീസ് അറിയിച്ചു. വാഹന റാലികളും വാദ്യമേളങ്ങളും അനുവദിക്കപ്പെട്ട പരിധിക്കുള്ളിൽ നിന്ന് മാത്രമേ നടത്താവൂ എന്നും നിർദ്ദേശമുണ്ട്
Comments
Post a Comment