രജിസ്റ്റർ ചെയ്യാത്ത കാറിൻ്റെ മരണപ്പാച്ചിൽ: ജോലി കഴിഞ്ഞ് മടങ്ങിയ 23-കാരിക്ക് ദാരുണാന്ത്യം

 

പനാജി: അമിതവേഗതയിലെത്തിയ ആഡംബര കാർ ബൈക്കിലിടിച്ച് യുവതി കൊല്ലപ്പെട്ടു. പഞ്ചനക്ഷത്ര ഹോട്ടൽ ജീവനക്കാരിയായ ദീക്ഷ പർവാദ്കർ (23) ആണ് മരിച്ചത്. ഗോവയിലെ പ്രമുഖ ബിസിനസുകാരൻ ആൻഡ്രൂ ഡയസിന്റെ മകൻ ഡാരിയസ് ഡയസ് (21) ഓടിച്ച മിനി കൂപ്പർ കാറാണ് അപകടമുണ്ടാക്കിയത്. സംഭവത്തിൽ ഡാരിയസിനെ പോലീസ് കസ്റ്റഡിയിലെടുത്തു.

ഞായറാഴ്ച രാത്രി ജോലി കഴിഞ്ഞ് സഹപ്രവർത്തകനായ അരുൺകുമാറിനൊപ്പം ബൈക്കിൽ വീട്ടിലേക്ക് മടങ്ങുകയായിരുന്നു ദീക്ഷ. മണിപ്പാൽ ആശുപത്രിക്ക് സമീപമുള്ള ബാംബോലിം-ഡോണ പൗള റോഡിൽ വെച്ചായിരുന്നു അപകടം. നിയന്ത്രണം വിട്ടു പാഞ്ഞുവന്ന കാർ ബൈക്കിലേക്ക് ഇടിച്ചുകയറുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ ദീക്ഷയെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ദീക്ഷയ്ക്കൊപ്പമുണ്ടായിരുന്ന അരുൺകുമാർ ഗുരുതര പരിക്കുകളോടെ ചികിത്സയിലാണ്.

അപകടമുണ്ടാക്കിയ ആഡംബര കാർ ഇതുവരെ രജിസ്റ്റർ ചെയ്തിട്ടില്ലാത്തതാണെന്ന് പോലീസ് കണ്ടെത്തിയിട്ടുണ്ട്. ബിസിനസ് പ്രമുഖന്റെ മകനാണ് വാഹനമോടിച്ചിരുന്നത് എന്നതിനാൽ കേസ് അട്ടിമറിക്കപ്പെടാതിരിക്കാൻ കൃത്യമായ നടപടികൾ സ്വീകരിക്കുമെന്ന് പോലീസ് അറിയിച്ചു. അശ്രദ്ധമായും അമിതവേഗത്തിലും വാഹനമോടിച്ച് മരണം സംഭവിക്കാനിടയാക്കിയതിനാണ് കേസ് എടുത്തിരിക്കുന്നത്. ഒരു കുടുംബത്തിന്റെ ഏക പ്രതീക്ഷയായിരുന്ന ദീക്ഷയുടെ വിയോഗം നാട്ടുകാരെയും സഹപ്രവർത്തകരെയും വലിയ ദുഃഖത്തിലാഴ്ത്തി.