കൂരാച്ചുണ്ടിൽ ആവേശമായി യൂത്ത് കോൺഗ്രസ് ലൈവ് ക്വിസ് മത്സരം
കൂരാച്ചുണ്ട്: 20-20 ലോകകപ്പ് ക്രിക്കറ്റ് ടൂർണമെന്റിനോട് അനുബന്ധിച്ച് യൂത്ത് കോൺഗ്രസ് മണ്ഡലം കമ്മിറ്റി കൂരാച്ചുണ്ട് അങ്ങാടിയിൽ സംഘടിപ്പിച്ച ലൈവ് ക്വിസ് മത്സരം ജനശ്രദ്ധയാകർഷിച്ചു. കായിക പ്രേമികളും നാട്ടുകാരും സജീവമായി പങ്കെടുത്ത മത്സരത്തിൽ ഓരോ ചോദ്യത്തിനും ശരിയുത്തരം നൽകുന്നവർക്ക് തത്സമയം തന്നെ സമ്മാനങ്ങൾ വിതരണം ചെയ്തത് വേറിട്ട അനുഭവമായി.
ലോകകപ്പ് ആവേശം ജനങ്ങളിലെത്തിക്കാൻ യൂത്ത് കോൺഗ്രസ് നടത്തിയ ഈ വേറിട്ട നീക്കം പ്രദേശവാസികളുടെ ഇടയിൽ വലിയ പ്രശംസ പിടിച്ചുപറ്റി.
ആകെ 50 വിജയികൾക്കാണ് മത്സരത്തിലൂടെ സമ്മാനങ്ങൾ കൈമാറിയത്. യു.ഡി.വൈ.എഫ് മണ്ഡലം ചെയർമാൻ സന്ദീപ് കളപ്പുരയ്ക്കൽ ക്വിസ് മത്സരം നിയന്ത്രിച്ചു. ഓരോ ഓവറുകൾക്കും പിന്നാലെ ഉയർന്ന ആവേശകരമായ ചോദ്യങ്ങൾ മത്സരത്തെ കൂടുതൽ കൊഴുപ്പിച്ചു.
യൂത്ത് കോൺഗ്രസ് മണ്ഡലം പ്രസിഡന്റ് നിസാം കക്കയം ചടങ്ങിൽ അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്റ് ബിജു കടലാശേരി പരിപാടി ഉദ്ഘാടനം ചെയ്തു. കോൺഗ്രസ് നേതാക്കളായ കുര്യൻ ചെമ്പനാനി, ജെറിൻ കുര്യാക്കോസ്, സരീഷ് ഹരിദാസ്, സണ്ണി കുന്നുമ്മൽ എന്നിവർ വിജയികൾക്കുള്ള സമ്മാനങ്ങൾ വിതരണം ചെയ്തു.
വിഷ്ണു തണ്ടോറ, അഭിനവ് ബാവോസ്, ജാക്സ് കരിമ്പനക്കുഴി, ജ്യോതിഷ് രാരപ്പൻകണ്ടി, രാഹുൽ രാഘവൻ, ഷാരോൺ ചാലിക്കോട്ടയിൽ തുടങ്ങിയവർ പരിപാടിക്ക് നേതൃത്വം നൽകി. ടൂർണമെന്റ് ആവേശം ജനങ്ങളിലെത്തിക്കാൻ സംഘടിപ്പിച്ച ഈ പരിപാടി മികച്ച ജനപങ്കാളിത്തം കൊണ്ട് ശ്രദ്ധേയമായി.
Comments
Post a Comment