അവസാന സന്ദേശത്തിന് മറുപടിയില്ല; യുദ്ധഭൂമിയിൽ കുടുങ്ങിയ ജെറിനായി ഒരു കുടുംബം കണ്ണീരോടെ

 

അയ്യപ്പൻകോവിൽ: "നാളെ വിളിക്കാം, ഇവിടെ ചെറിയ പ്രശ്‌നങ്ങളുണ്ട്..." ഫെബ്രുവരി 27-ന് അയച്ച ഈ ഒരു വാചകത്തിൽ ജെറിൻ ജോസഫിന്റെ (23) സന്ദേശങ്ങൾ അവസാനിച്ചു.  പിന്നെ മകന്റെ ഫോൺ പിന്നീട് ബെല്ലടിച്ചിട്ടില്ല. ഇറാനിലെ യുദ്ധഭൂമിയിൽ അകപ്പെട്ടുപോയ ഇടുക്കി അയ്യപ്പൻകോവിൽ സ്വദേശിയായ ജെറിനെ കാത്ത് കണ്ണീരോടെ കഴിയുകയാണ് ഒരു കുടുംബം.

സ്വപ്നങ്ങളുമായി മറുനാട്ടിലേക്ക്

മർച്ചന്റ് നേവി എന്ന വലിയ സ്വപ്നവുമായാണ് ജെറിൻ വിദേശത്തേക്ക് വിമാനം കയറിയത്. ചെന്നൈയിലെ ഇൻസ്റ്റിറ്റ്യൂട്ടിൽ നിന്ന് ഒൻപത് മാസത്തെ ഇന്റേൺഷിപ്പിനായി 2025 ജൂലൈയിലാണ് ജെറിൻ ഇറാനിലെത്തിയത്. ഇറാനിലെ പോർട്ട് ഓഫ് ബുഷറിലുള്ള 'ലിയൻ ഓഷ്യൻ സ്റ്റാർ ഷിപ്പിങ് കമ്പനി'യിലായിരുന്നു ജോലി. എന്നാൽ പശ്ചിമേഷ്യയിൽ യുദ്ധം രൂക്ഷമായതോടെ ജെറിനുമായുള്ള ആശയവിനിമയം പൂർണ്ണമായും നിലച്ചു.

കാത്തിരിപ്പിന്റെ നോവിൽ  ജോസും ലൈസാമ്മയും

ആലടിയിൽ ഒരു ചെറിയ ചായക്കട നടത്തിയാണ് ജോസും ലൈസാമ്മയും മകനെ പഠിപ്പിച്ചത്. കഠിനാധ്വാനം ചെയ്ത് വളർത്തി വലുതാക്കിയ മകൻ സുരക്ഷിതനായി തിരിച്ചെത്തുമെന്ന പ്രതീക്ഷയിൽ പ്രാർത്ഥനയോടെ കഴിയുകയാണ് ഇവർ. ജെറിൻ സുരക്ഷിതനാണെന്ന് ഇൻസ്റ്റിറ്റ്യൂട്ട് അധികൃതർ ആവർത്തിച്ചു പറയുന്നുണ്ടെങ്കിലും മാസങ്ങളായി മകന്റെ ശബ്ദം കേൾക്കാത്തത് ഇവരുടെ ആധി വർദ്ധിപ്പിക്കുന്നു.

അധികൃതരുടെ ഇടപെടലിനായി കുടുംബം

മകനെ തിരികെ എത്തിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയൻ, കേന്ദ്രമന്ത്രി സുരേഷ് ഗോപി, ഡീൻ കുര്യാക്കോസ് എം.പി എന്നിവർക്ക് കുടുംബം പരാതി നൽകിയിട്ടുണ്ട്. ഇന്ത്യൻ എംബസി അടിയന്തരമായി ഇടപെട്ട് ജെറിനെ സുരക്ഷിതമായി നാട്ടിലെത്തിക്കുമെന്ന പ്രതീക്ഷയിലാണ് ഈ നിർദ്ധന കുടുംബം.