ചക്കിട്ടപാറ ചെറുകുന്നിൽ കത്തിയെരിഞ്ഞ് കർഷകന്റെ സ്വപ്നങ്ങൾ; കൃഷിഭൂമിയിൽ തീപിടുത്തം

ചക്കിട്ടപ്പാറ: വേനൽ കടുത്തതോടെ നാട് വെന്തുരുകുന്നതിനിടെ ചക്കിട്ടപ്പാറ ചെറുകുന്ന് മേഖലയിൽ ഉണ്ടായ തീപിടുത്തത്തിൽ കർഷകർക്ക് വൻ നാശനഷ്ടം. സ്വകാര്യ വ്യക്തികളുടെ പറമ്പുകളിലെ തെങ്ങ്, കമുക്, റബ്ബർ ഉൾപ്പെടെയുള്ള കാർഷിക വിളകൾ പൂർണ്ണമായും കത്തിനശിച്ചു. 

ചൊവ്വാഴ്ച ഉച്ചയോടെയാണ് ചെറുകുന്ന് ഭാഗത്തെ സ്വകാര്യ ഭൂമികളിൽ തീ പടരുന്നത് ശ്രദ്ധയിൽപ്പെട്ടത്. ഉണങ്ങിക്കിടന്ന പുല്ലിന് പിടിച്ച തീ ശക്തമായ കാറ്റിൽ അതിവേഗം അയൽപക്കത്തെ പറമ്പുകളിലേക്കും വ്യാപിക്കുകയായിരുന്നു. വേനൽച്ചൂട് കടുത്തതും കാറ്റും രക്ഷാപ്രവർത്തനത്തെ പ്രതികൂലമായി ബാധിച്ചു. വനമേഖലയല്ലെങ്കിലും കൃഷി സമൃദ്ധമായ ഈ പ്രദേശത്ത് ജനവാസ മേഖലയോട് ചേർന്നാണ് തീ പടർന്നത് എന്നത് നാട്ടുകാരെ പരിഭ്രാന്തിയിലാഴ്ത്തി.

പ്രദേശത്തെ കർഷകരുടെ പ്രധാന വരുമാനമാർഗ്ഗമായ തെങ്ങ്, കമുക് കൃഷികളാണ് തീയിൽ വെണ്ണീറായത്. റബ്ബർ മരങ്ങൾക്കും കാര്യമായ കേടുപാടുകൾ സംഭവിച്ചിട്ടുണ്ട്. തീയണയ്ക്കാൻ നാട്ടുകാർ കിണഞ്ഞു പരിശ്രമിച്ചെങ്കിലും മിക്കയിടങ്ങളിലും കൃഷി ഇതിനോടകം നശിച്ചിരുന്നു.  പണം കടം വാങ്ങിയും മറ്റും കൃഷിയിറക്കിയ സാധാരണക്കാരായ കർഷകർക്ക്  നഷ്ടമാണ് ഉണ്ടായത്.

നാശനഷ്ടങ്ങളുടെ വ്യാപ്തി കണക്കിലെടുത്ത് റവന്യൂ അധികൃതരും കൃഷി വകുപ്പും ഉടൻ സ്ഥലം സന്ദർശിച്ച് റിപ്പോർട്ട് തയ്യാറാക്കണമെന്ന് നാട്ടുകാർ ആവശ്യപ്പെട്ടു.

വേനൽ കടുക്കുന്ന സാഹചര്യത്തിൽ ഇത്തരം അപകടങ്ങൾ ആവർത്തിക്കാതിരിക്കാൻ ഫയർഫോഴ്സും തദ്ദേശ സ്ഥാപനങ്ങളും ജാഗ്രത പാലിക്കണമെന്നും നാട്ടുകാർ പറഞ്ഞു.