കൂരാച്ചുണ്ടിൽ ക്ഷീരവകുപ്പിന്റെ പരിശീലനത്തിന് തുടക്കമായി

കൂരാച്ചുണ്ട്: ക്ഷീരവികസന വകുപ്പിന്റെയും കല്ലാനോട്, കൂരാച്ചുണ്ട് ക്ഷീരോൽപാദക സംഘങ്ങളുടെയും സംയുക്താഭിമുഖ്യത്തിൽ ക്ഷീരകർഷകർക്കായി സംഘടിപ്പിക്കുന്ന ത്രിദിന ശാസ്ത്രീയ പശുപരിപാലന പരിശീലന പരിപാടിക്ക് തുടക്കമായി. കൂരാച്ചുണ്ട് പാരീഷ് ഹാളിൽ നടന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് സിനി ജിനോ പരിശീലനത്തിന്റെ ഉദ്ഘാടനം നിർവഹിച്ചു.

പഞ്ചായത്ത് വൈസ് പ്രസിഡന്റ് ബിജു കടലാശ്ശേരി അധ്യക്ഷത വഹിച്ച ചടങ്ങിൽ നടുവട്ടം ക്ഷീരപരിശീലന കേന്ദ്രത്തിലെ വിദഗ്ധ ട്രെയിനർമാരാണ് ക്ലാസുകൾക്ക് നേതൃത്വം നൽകുന്നത്. പശുപരിപാലനത്തിലെ ആധുനിക രീതികൾ, രോഗനിയന്ത്രണം, ഗുണമേന്മയുള്ള പാൽ ഉൽപാദനം തുടങ്ങിയ വിഷയങ്ങളിലാണ് കർഷകർക്ക് പരിശീലനം നൽകുന്നത്.

ക്ഷീരമേഖലയിലെ നൂതന സാങ്കേതികവിദ്യകളും ശാസ്ത്രീയ പരിപാലന രീതികളും കർഷകരിലേക്ക് എത്തിക്കുക എന്ന ലക്ഷ്യത്തോടെയാണ് ഈ ക്യാമ്പ് സംഘടിപ്പിച്ചിരിക്കുന്നത്.  നടുവട്ടം ക്ഷീരപരിശീലന കേന്ദ്രത്തിലെ വിദഗ്ധ ട്രെയിനർമാരാണ് വിവിധ വിഷയങ്ങളിൽ ക്ലാസുകൾ നയിക്കുന്നത്.

ചടങ്ങിൽ ജനപ്രതിനിധികളും ഉദ്യോഗസ്ഥരും ആശംസകൾ നേർന്നു. ബ്ലോക്ക് മെമ്പർ അരുൺ ജോസ്, വാർഡ് മെമ്പറും കല്ലാനോട് ക്ഷീരോൽപാദക സംഘം പ്രസിഡന്റുമായ സണ്ണി ജോസഫ് കാനാട്ട്, ബാലുശ്ശേരി ഡയറി എക്സ്റ്റൻഷൻ ഓഫീസർ ആബിദ, കോഴിക്കോട് ഡയറി ട്രെയിനിങ്ങ് സെന്റർ പ്രിൻസിപ്പാൾ വർക്കി ജോർജ്, വൈസ് പ്രിൻസിപ്പാൾ ലാവണ്യ സി. എന്നിവർ സംസാരിച്ചു.

കൂടാതെ കട്ടിപ്പാറ വെറ്ററിനറി സർജൻ ഡോ. എം. മുഹമ്മദ് ആസിഫ്, ക്ഷീരവികസന ഓഫീസർ മുഹമ്മദ് നവാസ് എന്നിവർ കർഷകർക്ക് ആവശ്യമായ മാർഗ്ഗനിർദ്ദേശങ്ങൾ നൽകി. കൂരാച്ചുണ്ട് ക്ഷീരോൽപാദക സംഘം പ്രസിഡന്റ് ജോർജ് പൊട്ടുകുളം സ്വാഗതവും സെക്രട്ടറി ബെസ്‌ലിൻ ജോസഫ് നന്ദിയും രേഖപ്പെടുത്തി. മൂന്ന് ദിവസം നീണ്ടുനിൽക്കുന്ന പരിശീലനത്തിൽ പ്രദേശത്തെ നിരവധി ക്ഷീരകർഷകർ പങ്കെടുക്കുന്നുണ്ട്

.