മകളുടെ അഭിമാനത്തിനായി ഏതറ്റം വരെയും;കണ്മുന്നിൽ മകളെ ഉപദ്രവിക്കാൻ ശ്രമിച്ചയാളെ വകവരുത്തി ഒരച്ഛന്റെ പോരാട്ടം

 ഒഡീഷ: ഏതൊരു അച്ഛന്റെയും ഏറ്റവും വലിയ ദൗർബല്യമാണ് പെൺമക്കൾ. അവർക്കൊരപകടം വന്നാൽ സ്വന്തം ജീവനോ ഭാവിയോ നോക്കാതെ പോരാടാൻ അവർ മടികാണിക്കില്ല. അത്തരത്തിലൊരു അച്ഛന്റെ സ്നേഹവും നിസ്സഹായതയും പ്രതികാരമായി മാറിയ ഒരു വാർത്തയാണ് ഒഡീഷയിലെ ധേൻകനാൽ ജില്ലയിലുള്ള പത്രികപസി ഗ്രാമത്തിൽ നിന്നും പുറത്തുവരുന്നത്.

സംഭവത്തെക്കുറിച്ച് പോലീസ് പറയുന്നത്:

കഴിഞ്ഞ ദിവസം വൈകുന്നേരം വീടിനടുത്തുള്ള  പറമ്പിൽ കളിച്ചുകൊണ്ടിരിക്കുകയായിരുന്നു പത്തുവയസ്സുകാരി. ഈ സമയം അവിടെയെത്തിയ പ്രതി കുട്ടിയെ ബലമായി അടുത്തുള്ള കുറ്റിക്കാട്ടിലേക്ക് വലിച്ചിഴച്ചുകൊണ്ടുപോയി ഉപദ്രവിക്കാൻ ശ്രമിച്ചു. കുട്ടിയുടെ നിലവിളി കേട്ട് ജോലി കഴിഞ്ഞ് മടങ്ങുകയായിരുന്ന പിതാവ് ഓടിയെത്തുകയായിരുന്നു.

തന്റെ കണ്മുന്നിൽ മകൾ ആക്രമിക്കപ്പെടുന്നത് കണ്ട പിതാവ് പ്രകോപിതനായി അവിടെക്കിടന്ന വലിയൊരു കല്ലെടുത്ത് പ്രതിയുടെ തലയ്ക്കടിക്കുകയായിരുന്നു. ഗുരുതരമായി പരിക്കേറ്റ പ്രതി സംഭവസ്ഥലത്തുതന്നെ മരണപ്പെട്ടു.

പ്രതി മരിച്ചുവെന്ന് ഉറപ്പായതോടെ ഓടി രക്ഷപ്പെടാനോ ഒളിവിൽ പോകാനോ ആ അച്ഛൻ ശ്രമിച്ചില്ല. പകരം രക്തം പുരണ്ട വസ്ത്രങ്ങളുമായി നേരെ അടുത്തുള്ള പോലീസ് സ്റ്റേഷനിലേക്ക് നടന്നുചെന്നു. നടന്ന കാര്യങ്ങൾ വിശദീകരിച്ച അദ്ദേഹം പോലീസിനു മുന്നിൽ കീഴടങ്ങുകയായിരുന്നു.

അറസ്റ്റ് രേഖപ്പെടുത്തി ജയിലിലേക്ക് കൊണ്ടുപോകുമ്പോഴും ആ പിതാവിന്റെ മുഖത്ത് കുറ്റബോധമോ ഭയമോ ഉണ്ടായിരുന്നില്ലെന്ന് ദൃക്സാക്ഷികൾ പറയുന്നു. "എന്റെ മകൾ സുരക്ഷിതയാണ്" എന്ന ആശ്വാസം മാത്രമായിരുന്നു ആ മുഖത്ത്. നിയമത്തിന് മുന്നിൽ ഇതൊരു കൊലപാതകമാണെങ്കിലും, മകളുടെ അഭിമാനം കാക്കാൻ ഏതറ്റം വരെയും പോകാൻ തയ്യാറായ ഒരച്ഛന്റെ നിശ്ചയദാർഢ്യമാണ് ഗ്രാമവാസികൾക്കിടയിൽ ചർച്ചയാകുന്നത്.

 ഒരു പിതാവ് എന്ന നിലയിൽ അദ്ദേഹം ചെയ്തത് മകൾക്ക് വേണ്ടിയുള്ള പോരാട്ടമാണെന്നാണ് പ്രാദേശിക ജനതയുടെ പക്ഷം. കേസിൽ കൂടുതൽ അന്വേഷണം നടന്നു വരികയാണെന്ന് ധേൻകനാൽ പോലീസ് അറിയിച്ചു