മലബാർ കുടിയേറ്റത്തിൻ്റെ സ്മരണ പുതുക്കി കുളത്തുവയലിലേക്ക് പീഡാനുഭവ തീർത്ഥയാത്ര

 

കുളത്തുവയൽ: മലബാറിൻ്റെ കുടിയേറ്റ തീർത്ഥാടന കേന്ദ്രമായ കുളത്തുവയൽ സെൻ്റ് ജോർജ്ജ് ദൈവാലയത്തിലേക്ക് താമരശ്ശേരി രൂപതയുടെ ആഭിമുഖ്യത്തിൽ നടത്തുന്ന ഒൻപതാമത് നാൽപ്പതാം വെള്ളി തീർത്ഥയാത്ര മാർച്ച് 26, 27 തീയതികളിൽ നടക്കും. താമരശ്ശേരി രൂപതയുടെ റൂബി ജൂബിലി വർഷത്തിലും മലബാർ കുടിയേറ്റ ശതാബ്ദി വേളയിലും നടക്കുന്ന ഈ തീർത്ഥയാത്രയ്ക്ക് ഏറെ പ്രാധാന്യമുണ്ട്.

യാത്രാ വിവരങ്ങൾ

മാർച്ച് 26-ാം തീയതി വ്യാഴാഴ്ച രാത്രി 10 മണിക്ക് താമരശ്ശേരി കത്തീഡ്രൽ പള്ളിയിൽ നിന്നും അഭിവന്ദ്യ മാർ റെമീജിയോസ് ഇഞ്ചനാനിയിൽ പിതാവിൻ്റെ നേതൃത്വത്തിൽ തീർത്ഥയാത്ര ആരംഭിക്കും. കട്ടിപ്പാറ, തലയാട്, കല്ലാനോട്, കൂരാച്ചുണ്ട് വഴി സഞ്ചരിച്ച് മാർച്ച് 27 വെള്ളിയാഴ്ച രാവിലെ 7.30-ന് കുളത്തുവയൽ തീർത്ഥാടന കേന്ദ്രത്തിൽ എത്തിച്ചേരും. നൂറുകണക്കിന് വൈദികരും സന്യസ്തരും വിശ്വാസികളും ഈ പ്രാർത്ഥനാ യാത്രയിൽ പങ്കുചേരും.

വിലങ്ങാട് സെൻ്റ് ജോർജ്ജ് ഫൊറോന ദൈവാലയത്തിൽ നിന്ന് വ്യാഴാഴ്ച രാത്രി 12 മണിക്ക് ആരംഭിക്കുന്ന തീർത്ഥയാത്ര, പുലർച്ചെ 5 മണിയോടെ ചെമ്പനോടയിൽ വെച്ച് മരുതോങ്കര ഫൊറോനയിലെ തീർത്ഥാടകരുമായി സംഗമിക്കും. ബഹു. ഫാ. ആൻ്റോ ജോൺ മൂലയിലും  മറ്റ് വൈദികരുടെയും നേതൃത്വത്തിൽ രാവിലെ 7.30-ഓടെ ഇവർ കുളത്തുവയലിൽ എത്തും.

രാവിലെ 7.30: പീഡാനുഭവ സന്ദേശം – വെരി റവ. ഫാ. കുര്യൻ താന്നിക്കൽ (റെക്ടർ, സെൻ്റ് അൽഫോൻസ മൈനർ സെമിനാരി, താമരശ്ശേരി).

രാവിലെ 7.45: ആഘോഷമായ വിശുദ്ധ കുർബാന – താമരശ്ശേരി രൂപതാ മെത്രാൻ അഭിവന്ദ്യ മാർ റെമീജിയോസ് ഇഞ്ചനാനിയിൽ.

ഈശോയുടെ പീഡാനുഭവ വഴികളിലെ ത്യാഗസ്മരണകൾ പുതുക്കാനും ദണ്ഡവിമോചനം പ്രാപിക്കാനും എല്ലാ വിശ്വാസികളെയും കുളത്തുവയൽ തീർത്ഥാടന കേന്ദ്രത്തിലേക്ക് സ്വാഗതം ചെയ്യുന്നതായി അധികൃതർ അറിയിച്ചു.