വേനൽച്ചൂടിലും ഓല മേയുന്ന അച്ഛൻ; ജനവിധി തേടി മകൻ: അതിജീവനത്തിന്റെ കഥ പറഞ്ഞ് ബാലുശ്ശേരി

 ബാലുശ്ശേരി: പൊരിവെയിലത്ത് പറമ്പിൽ ഓല മേയുന്ന തിരക്കിലാണ് നാരായണൻ. മകൻ നിയമസഭയിലേക്ക് മത്സരിക്കുമ്പോൾ ആവേശത്തോടെ പ്രചാരണത്തിന് ഇറങ്ങാനല്ല, മറിച്ച് തന്റെ പതിവ് ജോലികൾ പൂർത്തിയാക്കാനാണ് ഈ അച്ഛന് താല്പര്യം. "പണിക്ക് പോയില്ലെങ്കിൽ ജീവിക്കണ്ടേ.." എന്ന നാരായണന്റെ ലളിതമായ ചോദ്യം ഒരു നാടിന്റെയാകെ ഹൃദയം തൊടുകയാണ്.

ബാലുശ്ശേരി മണ്ഡലത്തിലെ യുഡിഎഫ് സ്ഥാനാർത്ഥി വി.ടി. സൂരജിന്റെ അച്ഛനാണ് നാരായണൻ. മകൻ വലിയൊരു രാഷ്ട്രീയ പോരാട്ടത്തിന് ഇറങ്ങുമ്പോഴും തന്റെ വിയർപ്പൊഴുക്കിയുള്ള അധ്വാനത്തിന് അവധി നൽകാൻ അദ്ദേഹം തയ്യാറല്ല. പത്താം ക്ലാസിൽ പഠിക്കുമ്പോൾ അച്ഛൻ മരിച്ചതിനെ തുടർന്ന് കുടുംബത്തിന്റെ ഭാരം ചുമലിലേറ്റിയ നാരായണൻ, സഹോദരിമാരുടെ വിവാഹമടക്കമുള്ള ഉത്തരവാദിത്തങ്ങൾ നിറവേറ്റിയത് ഈ കൂലിപ്പണിയിലൂടെയാണ്.

ആധുനിക കാലത്തെ തിരഞ്ഞെടുപ്പ് രാഷ്ട്രീയത്തിൽ അത്ഭുതപ്പെടുത്തുന്നതാണ് സൂരജിന്റെ ആസ്തി വിവരങ്ങൾ. നാമനിർദ്ദേശ പത്രിക പ്രകാരം കൈവശം കേവലം 6300 രൂപ മാത്രമാണുള്ളത്. ബാങ്ക് നിക്ഷേപവും ഒരു ഇരുചക്ര വാഹനവും ഉൾപ്പെടെ ആകെ ആസ്തി 25,200 രൂപ മാത്രം.

നാമനിർദ്ദേശ പത്രിക സമർപ്പിക്കാൻ പോകുന്ന ദിവസം രാവിലെ അച്ഛൻ നൽകിയ 3000 രൂപയിൽ നിന്ന് ആയിരം രൂപ മാത്രം വാങ്ങി ബാക്കി തുക അച്ഛന് തന്നെ തിരികെ നൽകിയ സൂരജിന്റെ ചിത്രം സോഷ്യൽ മീഡിയയിലും ഇതിനോടകം ചർച്ചയായിക്കഴിഞ്ഞു.

കെഎസ് യു ജില്ലാ പ്രസിഡന്റായ സൂരജ്, സിറ്റിംഗ് എംഎൽഎ കെ.എം. സച്ചിൻ ദേവിനെതിരെയാണ് മത്സരിക്കുന്നത്. നാരായണൻ - പുഷ്പലത ദമ്പതികളുടെ മകനായി വളർന്ന സൂരജ്, സാധാരണക്കാരുടെ ജീവിത സാഹചര്യങ്ങൾ അറിഞ്ഞുതന്നെയാണ് ജനവിധി തേടുന്നത്. ബാലുശ്ശേരിയിലെ വോട്ടർമാർക്ക് ഇതൊരു തിരഞ്ഞെടുപ്പ് എന്നതിലുപരി, തങ്ങളിൽ ഒരാളെ നിയമസഭയിലേക്ക് അയക്കാനുള്ള അവസരം കൂടിയായി മാറുകയാണ്.