പൈപ്പിലെ തടസ്സം നീക്കാൻ ഒഴിച്ച ആസിഡ് വില്ലനായി; റിയാദിൽ മലയാളി യുവാവിന്റെ ജീവൻ കവർന്നു.
റിയാദ്: താമസസ്ഥലത്തെ ബാത്റൂമിലെ പൈപ്പ് തടസ്സം നീക്കാൻ ഉപയോഗിച്ച ആസിഡിൽ നിന്നുള്ള വിഷവാതകം ശ്വസിച്ച് മലയാളി പ്രവാസി റിയാദിൽ അന്തരിച്ചു. മലപ്പുറം വേങ്ങര നെടുംപറമ്പ് സ്വദേശി കാങ്കട കടവൻ ഈസ്മായീൽ (51) ആണ് മരിച്ചത്. റിയാദിലെ അൽഈമാൻ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലിരിക്കെ ചൊവ്വാഴ്ചയായിരുന്നു അന്ത്യം.
അസീസിയയിലെ താമസസ്ഥലത്തുവെച്ചാണ് അപകടമുണ്ടായത്. ഫ്ലാറ്റിലെ മലിനജല പൈപ്പിലെ തടസ്സം മാറ്റാനായി ശക്തമായ വീര്യമുള്ള സൾഫ്യൂരിക് ആസിഡ് പൈപ്പിൽ ഒഴിച്ചിരുന്നു. എന്നാൽ ഈ വിവരം അറിയാതെ ബാത്റൂമിൽ പ്രവേശിച്ച ഈസ്മായീൽ, ആസിഡ് രാസപ്രവർത്തനം വഴി പുറത്തുവിട്ട അതിശക്തമായ വിഷവാതകം ശ്വസിക്കുകയായിരുന്നു.
ഗന്ധം ശ്വസിച്ച ഉടൻ തന്നെ ശ്വാസംമുട്ടൽ അനുഭവപ്പെടുകയും ബോധരഹിതനായി വീഴുകയുമായിരുന്നു. ഉടൻ തന്നെ കൂടെയുള്ളവർ അൽഈമാൻ ആശുപത്രിയിൽ എത്തിച്ച് വെന്റിലേറ്റർ സഹായത്തോടെ ചികിത്സ നൽകിയെങ്കിലും ജീവൻ രക്ഷിക്കാനായില്ല.
ജാഗ്രത വേണം
ബാത്റൂമുകളിലും സിങ്കുകളിലും തടസ്സം നീക്കാൻ വീര്യമേറിയ ആസിഡുകൾ ഉപയോഗിക്കുമ്പോൾ അതീവ ജാഗ്രത പാലിക്കണമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു. സൾഫ്യൂരിക് ആസിഡ് പോലുള്ളവ അഴുക്കുകളുമായി കലരുമ്പോൾ മാരകമായ വാതകങ്ങൾ പുറന്തള്ളാൻ സാധ്യതയുണ്ട്.
അടച്ചിട്ട മുറികളിൽ ആസിഡ് ഉപയോഗിക്കുമ്പോൾ വായുസഞ്ചാരം ഉറപ്പുവരുത്തുക. ആസിഡ് ഒഴിച്ച വിവരം മറ്റുള്ളവരെ അറിയിക്കുകയും ബാത്റൂം ഉപയോഗിക്കുന്നത് തടയുകയും ചെയ്യുക.സാധ്യമാണെങ്കിൽ ഇത്തരം ആവശ്യങ്ങൾക്ക് വിദഗ്ധരായ പ്ലംബർമാരുടെ സഹായം തേടുക.
നിയമനടപടികൾ പൂർത്തിയാക്കി മൃതദേഹം നാട്ടിലെത്തിക്കാനുള്ള ശ്രമങ്ങൾ റിയാദിലെ സാമൂഹിക പ്രവർത്തകരുടെ നേതൃത്വത്തിൽ നടന്നു വരുന്നു. പരേതനായ കാങ്കട കടവൻ മുഹമ്മദ് കുട്ടി ഹാജിയുടെ മകനാണ്
ഈസ്മായീൽ.
Comments
Post a Comment