സംസ്ഥാനതലത്തിൽ കൂരാച്ചുണ്ടിന്റെ പെരുമ; വൈഗ പ്രദർശന മത്സരത്തിൽ ജോയ് പനക്കവയലിന് രണ്ടാം സ്ഥാനം
കൂരാച്ചുണ്ട്: സംസ്ഥാന കൃഷി വകുപ്പിന്റെ ആഭിമുഖ്യത്തിൽ തിരുവനന്തപുരത്ത് വെച്ച് നടന്ന 'വൈഗ' (VAIGA) കാർഷിക പ്രദർശന മത്സരത്തിൽ കൂരാച്ചുണ്ട് സ്വദേശി ജോയ് പനക്കവയലിന് സംസ്ഥാനതലത്തിൽ രണ്ടാം സ്ഥാനം. കാർഷിക മേഖലയിൽ നിന്നുള്ള മൂല്യവർദ്ധിത ഉൽപ്പന്നങ്ങളുടെ നിർമ്മാണവും വിപണനവും പ്രോത്സാഹിപ്പിക്കുന്നതിനായി സംഘടിപ്പിച്ച മത്സരത്തിലാണ് ഈ നേട്ടം.
സംസ്ഥാന സർക്കാരിന്റെ സുഭിക്ഷം സുരക്ഷിതം പദ്ധതിയുടെ ഭാഗമായാണ് കാർഷിക വികസന കർഷക ക്ഷേമവകുപ്പ് വൈഗ പ്രോഗ്രാം സംഘടിപ്പിച്ചത്. കാർഷിക ഉൽപ്പന്നങ്ങളിൽ നിന്ന് അധിക വരുമാനം കണ്ടെത്താനുള്ള നൂതന ആശയങ്ങളും പ്രദർശനവുമാണ് മത്സരത്തിന്റെ പ്രധാന ആകർഷണം.
വിജയിയായ ജോയ് പനക്കവയലിനുള്ള അവാർഡ് കൂരാച്ചുണ്ട് കൃഷി ഓഫീസിൽ വെച്ച് നടന്ന പ്രത്യേക ചടങ്ങിൽ കൃഷി ഓഫീസർ രാജി പി.പി. വിതരണം ചെയ്തു. കാർഷിക മേഖലയിലെ മികച്ച പ്രവർത്തനങ്ങൾക്കും മൂല്യവർദ്ധിത ഉൽപ്പന്നങ്ങൾ തയ്യാറാക്കുന്നതിലെ മികവിനുമുള്ള അംഗീകാരമായാണ് ഈ പുരസ്കാരം.
ചടങ്ങിൽ കൃഷി അസിസ്റ്റന്റുമാരായ ദൃശ്യ, ഷൈജ, സജി തെക്കയിൽ, ട്രെയിനർ സിദ്ധീഖ് തുടങ്ങിയവർ പങ്കെടുത്തു. പ്രാദേശിക കർഷകർക്ക് ആവേശമാകുന്ന നേട്ടമാണ് ജോയ് പനക്കവയലിലൂടെ കൂരാച്ചുണ്ടിന് ലഭിച്ചിരിക്കുന്നത്.
Comments
Post a Comment