കണ്ണീരോർമ്മയായി ജിനു; നിയമപഠനം പാതിവഴിയിൽ നിലച്ചു, ചെന്നൈയിൽ വാഹനാപകടത്തിൽ ദാരുണമരണം

 

നാടിനെയും വീടിനെയും ഒരുപോലെ കണ്ണീരിലാഴ്ത്തിക്കൊണ്ട്, ചെന്നൈയിൽ ഉണ്ടായ വാഹനാപകടത്തിൽ പാലക്കാട് സ്വദേശിനിയായ നിയമവിദ്യാർത്ഥിനി ജിനു (21) വിടവാങ്ങി. ചൊവ്വാഴ്ച പുലർച്ചെ മൂന്ന് മണിയോടെ ചെന്നൈ കോട്ടൂർപുരം ഗാന്ധിമണ്ഡപം റോഡിലുണ്ടായ അപകടമാണ് ഒരു കുടുംബത്തിന്റെ പ്രതീക്ഷകൾ തകർത്തുകളഞ്ഞത്.

പാലക്കാട് വടക്കഞ്ചേരി മൂലങ്കോട് സ്വദേശിയായ ജിനു, ചെന്നൈ അംബേദ്കർ ലോ കോളേജിലെ നാലാം വർഷ വിദ്യാർത്ഥിനിയായിരുന്നു. കോളേജ് പരിപാടിയിൽ പങ്കെടുത്ത അതിഥിയെ നുങ്കമ്പാക്കത്തെ വീട്ടിലാക്കി സുഹൃത്തുക്കൾക്കൊപ്പം തിരികെ മടങ്ങുമ്പോഴാണ് വിധി വില്ലനായെത്തിയത്. അണ്ണാ സർവകലാശാലയുടെ ഗേറ്റിന് സമീപം വെച്ച് ഇവർ സഞ്ചരിച്ചിരുന്ന കാറിന് മുന്നിലുണ്ടായിരുന്ന വാഹനം പെട്ടെന്ന് യൂ-ടേൺ എടുക്കുകയും നിയന്ത്രണം വിട്ട കാറുകൾ തമ്മിൽ കൂട്ടിയിടിക്കുകയുമായിരുന്നു.

ഇടിയുടെ ആഘാതത്തിൽ കാറിൽ നിന്നും തെറിച്ചുവീണ ജിനു സംഭവസ്ഥലത്തുതന്നെ മരണത്തിന് കീഴടങ്ങി. കൂടെയുണ്ടായിരുന്ന സുഹൃത്തുക്കളായ പ്രിയ, ജഗദീപ്, ആർത്തിപ് എന്നിവരെയും മറ്റൊരു കാറിലെ ഡ്രൈവർ വെങ്കിടേഷിനെയും പരിക്കുകളോടെ ആശുപത്രിയിൽ പ്രവേശിപ്പിച്ചു.

വടക്കഞ്ചേരി കാവുങ്കൽ വീട്ടിൽ എൻ. വിജയകുമാറിന്റെയും വിജയകുമാരിയുടെയും മകളാണ് ജിനു. മൃതദേഹം പോസ്റ്റ്‌മോർട്ടത്തിന് ശേഷം നാട്ടിലെത്തിച്ചു. ബുധനാഴ്ച രാവിലെ 10 മണിക്ക് തിരുവില്വാമല ഐവർമഠം ശ്മശാനത്തിൽ ജിനുവിന്റെ സംസ്‌കാരം നടക്കും. ഒരു നിയമവിദ്യാർത്ഥിനിയായി നാടിന് സേവനം ചെയ്യേണ്ടിയിരുന്ന ആ മിടുക്കിയുടെ വേർപാട് സഹോദരൻ ജിബിനും മാതാപിതാക്കൾക്കും താങ്ങാനാവുന്നതിലും അപ്പുറമാണ്.