സ്വയം ചികിത്സ വിനയായി?അഞ്ചാം ക്ലാസ്സുകാരന് ദാരുണാന്ത്യം

 

മംഗളൂരു: കഠിനമായ തലവേദനയെത്തുടർന്ന് വീട്ടിൽ സൂക്ഷിച്ചിരുന്ന മരുന്ന് കഴിച്ച പത്തുവയസ്സുകാരൻ മരിച്ചു. കടബ രാമകുഞ്ച ഗ്രാമത്തിലെ കൊടിയാടി സ്വദേശി സഞ്ജീവ പൂജാരിയുടെ മകൻ എസ്. ചിരാഗ് ആണ് മരിച്ചത്. രാമകുഞ്ചയിലെ സ്വകാര്യ സ്കൂളിലെ അഞ്ചാം ക്ലാസ് വിദ്യാർത്ഥിയായിരുന്നു ചിരാഗ്

കഴിഞ്ഞ ദിവസം കുട്ടിക്ക് കഠിനമായ തലവേദന അനുഭവപ്പെട്ടതിനെത്തുടർന്നാണ് വീട്ടിലുണ്ടായിരുന്ന മരുന്ന് നൽകിയത്. എന്നാൽ മരുന്ന് കഴിച്ചതിന് പിന്നാലെ കുട്ടിക്ക് കഠിനമായ ശാരീരിക അസ്വസ്ഥതകൾ അനുഭവപ്പെടുകയായിരുന്നു. നില വഷളായതിനെത്തുടർന്ന് ഉടൻ തന്നെ സമീപത്തെ ആശുപത്രിയിലും, തുടർന്ന് വിദഗ്ധ ചികിത്സയ്ക്കായി പുത്തൂരിലെ സ്വകാര്യ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തുന്നതിന് മുൻപേ മരണം സംഭവിച്ചതായി ഡോക്ടർമാർ സ്ഥിരീകരിച്ചു.

കുട്ടിയുടെ പിതാവ് സഞ്ജീവ പൂജാരി നൽകിയ പരാതിയുടെ അടിസ്ഥാനത്തിൽ കടബ പോലീസ് കേസെടുത്ത് അന്വേഷണം ആരംഭിച്ചു. നിലവിൽ അസ്വാഭാവിക മരണത്തിനാണ് കേസെടുത്തിരിക്കുന്നത്. കുട്ടി കഴിച്ച മരുന്ന് ഏതായിരുന്നുവെന്നും മരണത്തിലേക്ക് നയിച്ച കൃത്യമായ കാരണം എന്താണെന്നും കണ്ടെത്താൻ രാസപരിശോധനാ ഫലവും പോസ്റ്റ്‌മോർട്ടം റിപ്പോർട്ടും അനിവാര്യമാണെന്ന് പോലീസ് അറിയിച്ചു.

മൃതദേഹം പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുകൊടുത്തു. മിടുക്കനായ വിദ്യാർത്ഥിയുടെ അപ്രതീക്ഷിത വിയോഗം രാമകുഞ്ച ഗ്രാമത്തെയും വിദ്യാലയത്തെയും ഒന്നടങ്കം ദുഃഖത്തിലാഴ്ത്തിയിരിക്കുകയാണ്.