മാതൃകയായി സാന്ദ്ര മരിയ; കൂരാച്ചുണ്ട് നാലാം വാർഡിൽ പെൺകരുത്തിന്റെ ആദരം

കൂരാച്ചുണ്ട്: ലോക വനിതാ ദിനത്തോടനുബന്ധിച്ച് കൂരാച്ചുണ്ട് ഗ്രാമപഞ്ചായത്ത് നാലാം വാർഡിൽ സ്ത്രീശക്തിയുടെയും ഒത്തുചേരലിന്റെയും സന്ദേശമുയർത്തി വിപുലമായ ആഘോഷപരിപാടികൾ സംഘടിപ്പിച്ചു. വാർഡ് മെമ്പർ അഡ്വ. വി. കെ. ഹസീനയുടെ നേതൃത്വത്തിലാണ് വാർഡിലെ വനിതകളെ പങ്കെടുപ്പിച്ചുകൊണ്ട് പരിപാടികൾ നടന്നത്. സമൂഹത്തിന്റെ വിവിധ മേഖലകളിൽ സ്ത്രീകൾ കൈവരിക്കുന്ന മുന്നേറ്റങ്ങളെ അംഗീകരിക്കാനും അവരെ പ്രോത്സാഹിപ്പിക്കാനുമാണ് ഇത്തരമൊരു സംഗമം ഒരുക്കിയത്.

പരിപാടിയുടെ ഭാഗമായി നടന്ന അനുമോദന ചടങ്ങിൽ, വാർഡിന്റെ അഭിമാനമായ യുവ അഭിഭാഷക സാന്ദ്ര മരിയ ഫ്രാൻസിസിനെ ആദരിച്ചു. നിയമരംഗത്തെ മികച്ച നേട്ടത്തിലൂടെ നാടിന് മാതൃകയായ സാന്ദ്രയെ പൊന്നാട അണിയിച്ചും ഉപഹാരം നൽകിയുമാണ് അനുമോദിച്ചത്. 

'സ്ത്രീ എന്നത് വെറുമൊരു വാക്കല്ല, അത് കരുത്തിന്റെയും സഹനത്തിന്റെയും അതിജീവനത്തിന്റെയും പ്രതീകമാണ്. അടുക്കളമുറ്റങ്ങളിൽ നിന്ന് ഭരണസിരാകേന്ദ്രങ്ങളിലേക്കും നിയമനിർമ്മാണ സഭകളിലേക്കും സ്ത്രീകൾ ചുവടുറപ്പിക്കുന്നത് നാം കാണുന്നു. നമ്മുടെ കൂരാച്ചുണ്ട് നാലാം വാർഡിലും വിദ്യഭ്യാസ-സാമൂഹിക മേഖലകളിൽ പെൺകുട്ടികൾ കൈവരിക്കുന്ന നേട്ടങ്ങൾ ഏറെ അഭിമാനകരമാണ്.പുതിയ കാലഘട്ടത്തിൽ പെൺകുട്ടികൾ ഉന്നത വിദ്യാഭ്യാസത്തിലൂടെയും കഠിനാധ്വാനത്തിലൂടെയും സ്വയംപര്യാപ്തത നേടണമെന്നും സാന്ദ്രയെപ്പോലുള്ളവരുടെ വളർച്ച മറ്റ് യുവതികൾക്ക് വലിയ ആത്മവിശ്വാസം നൽകുന്നതാണ്":-  അഡ്വ. വി. കെ. ഹസീന ചടങ്ങിൽ സംസാരിക്കവെ പറഞ്ഞു.

നാലാം വാർഡ് സി.ഡി.എസ് അംഗം ശ്രുതി ചടങ്ങിന് സ്വാഗതം ആശംസിച്ചു. സ്ത്രീകളുടെ അവകാശങ്ങൾ, സാമൂഹിക സുരക്ഷ, കുടുംബശ്രീ വഴിയുള്ള സ്ത്രീ ശാക്തീകരണം എന്നീ വിഷയങ്ങളിൽ ചടങ്ങിൽ ചർച്ചകൾ നടന്നു. വാർഡിലെ പ്രിയപ്പെട്ട നിരവധി വനിതകൾ പരിപാടിയിൽ സജീവമായി പങ്കെടുത്തു. ഓരോ വീടുകളിലെയും സ്ത്രീകളുടെ ക്ഷേമവും പുരോഗതിയും ഉറപ്പാക്കുന്ന പ്രവർത്തനങ്ങൾ വാർഡിൽ തുടർന്നും ഊർജിതമായി മുന്നോട്ട് കൊണ്ടുപോകുമെന്ന് സംഘാടകർ അറിയിച്ചു.

സ്ത്രീകളുടെ സാമൂഹികവും നിയമപരവുമായ അവകാശങ്ങളെക്കുറിച്ചും, സമൂഹത്തിന്റെ മുഖ്യധാരയിലേക്ക് കടന്നുവരേണ്ടതിന്റെ ആവശ്യകതയെക്കുറിച്ചും ചർച്ചകൾ നടന്നു. വാർഡിലെ പ്രിയപ്പെട്ട വനിതാ അംഗങ്ങളുടെ പങ്കാളിത്തം കൊണ്ട് ചടങ്ങ് ശ്രദ്ധേയമായി.