വോട്ടർമാരുടെ ഹൃദയം കവർന്ന് വി.ടി. സൂരജ്; കൂരാച്ചുണ്ടിൽ ആവേശകരമായ പര്യടനം

 

​കൂരാച്ചുണ്ട്: ബാലുശ്ശേരി നിയോജക മണ്ഡലം യുഡിഎഫ് സ്ഥാനാർത്ഥി വി.ടി. സൂരജിന്റെ ആദ്യഘട്ട പ്രചാരണ പരിപാടികൾ കൂരാച്ചുണ്ട് പഞ്ചായത്തിൽ ആവേശകരമായി പൂർത്തിയായി. വോട്ടർമാരെ നേരിൽ കണ്ടും സ്ഥാപനങ്ങൾ സന്ദർശിച്ചും വോട്ട് അഭ്യർത്ഥിച്ച സ്ഥാനാർത്ഥിക്ക് വലിയ സ്വീകരണമാണ് വിവിധ കേന്ദ്രങ്ങളിൽ ലഭിച്ചത്.

​ രാവിലെ കൂരാച്ചുണ്ട് സെന്റ് തോമസ് ഫൊറോന പള്ളി സന്ദർശിച്ചുകൊണ്ടാണ് പര്യടനം ആരംഭിച്ചത്. തുടർന്ന് സെന്റ് ജോസഫ്സ് ഓൾഡ് ഏജ് ഹോമിലെത്തിയ സ്ഥാനാർത്ഥി അന്തേവാസികളുമായി സമയം ചെലവഴിക്കുകയും അവരുടെ അനുഗ്രഹം തേടുകയും ചെയ്തു. കല്ലാനോട് സെന്റ് മേരീസ് പള്ളി, കരിയാത്തുംപാറ സെന്റ് ജോസഫ്സ് പള്ളി എന്നിവിടങ്ങളിലും സന്ദർശനം നടത്തി വികാരിമാരുമായും വിശ്വാസികളുമായും അദ്ദേഹം സംവദിച്ചു.

​കൂരാച്ചുണ്ട്, കല്ലാനോട്, പൂവത്തുംചോല അങ്ങാടികളിൽ നടന്ന പ്രചാരണ പരിപാടിയിൽ നൂറുകണക്കിന് വോട്ടർമാരെ നേരിൽ കണ്ട് വി.ടി. സൂരജ് വോട്ട് അഭ്യർത്ഥിച്ചു. വരാനിരിക്കുന്ന ചെറിയ പെരുന്നാളിനോടനുബന്ധിച്ച് ഈദ് ആശംസകൾ അച്ചടിച്ച പ്രത്യേക കാർഡുകൾ വോട്ടർമാർക്ക് കൈമാറിയത് ശ്രദ്ധേയമായി.

​

പര്യടനത്തിന് യുഡിഎഫ് പ്രാദേശിക നേതാക്കളുടെ വലിയ നിര തന്നെ നേതൃത്വം നൽകി. യുഡിഎഫ് ചെയർമാൻ ജോസ് വെളിയത്ത്, കൺവീനർ ഒ.കെ. അമ്മദ്, കോൺഗ്രസ് മണ്ഡലം പ്രസിഡന്റ് ഷാജു കാരക്കട, മുസ്ലിം ലീഗ് പഞ്ചായത്ത് പ്രസിഡന്റ് വി.എസ്. ഹമീദ്, പഞ്ചായത്ത് പ്രസിഡന്റ് സിനി ജിനോ എന്നിവർ സ്ഥാനാർത്ഥിക്കൊപ്പമുണ്ടായിരുന്നു.

​കൂടാതെ, യുഡിവൈഎഫ് ചെയർമാൻ സന്ദീപ് കളപ്പുരക്കൽ, ക്ഷേമകാര്യ സ്റ്റാൻഡിങ്ങ് കമ്മിറ്റി ചെയർമാൻ ചെറിയാൻ ജോസഫ് അറക്കൽ, ബ്ലോക്ക് മെമ്പർ അരുൺ ജോസ്, പഞ്ചായത്ത് മെമ്പർമാരായ സണ്ണി ജോസഫ് കാനാട്ട്, സജി കൂനന്താനം, സൂപ്പി തെരുവത്ത് എന്നിവരും പ്രചാരണ പ്രവർത്തനങ്ങൾക്ക് കരുത്തേകി. മണ്ഡലത്തിലെ വികസന മുരടിപ്പിനെതിരെയും യുഡിഎഫിന്റെ വിജയസാധ്യതകളെക്കുറിച്ചും നേതാക്കൾ സംസാരിച്ചു. വരും ദിവസങ്ങളിൽ മണ്ഡലത്തിലെ മറ്റു പഞ്ചായത്തുകളിലും സ്ഥാനാർത്ഥി പര്യടനം തുടരും.