കള്ളിന്മേൽ വിശ്വസിച്ച് രഹസ്യം പറഞ്ഞു; ഒടുവിൽ കള്ളൻ കപ്പലിൽ തന്നെ

 

തൃശ്ശൂർ വടക്കാഞ്ചേരിയിൽ എട്ടു മാസം മുൻപ് നടന്ന ഒരു ക്രൂരമായ സംഭവത്തിന്റെ പ്രതിയെ പോലീസ് വലയിലാക്കിയത് സിനിമാ സ്റ്റൈലിലായിരുന്നു. കഴിഞ്ഞ തിരുവോണ നാളിലായിരുന്നു കേസിനാസ്പദമായ സംഭവം. വഴിയിലരികിൽ കിടക്കുകയായിരുന്ന ശശി എന്ന 62-കാരന്റെ ദേഹത്ത് തിളച്ച വെള്ളമൊഴിച്ച് പൊള്ളിക്കുകയായിരുന്നു. ശരീരത്തിന്റെ പിൻഭാഗം പൂർണമായും പൊള്ളലേറ്റ ശശി മാസങ്ങളോളം ചികിത്സയിലായിരുന്നു.

ആരാണ് ഈ ക്രൂരതയ്ക്ക് പിന്നിലെന്ന് പോലീസിന് കൃത്യമായ വിവരമൊന്നും ലഭിച്ചിരുന്നില്ല. എട്ടു മാസത്തോളം തെളിവുകളില്ലാതെ ഇരുന്ന കേസിൽ അവസാനം ഒരു ഫോൺ കോൾ പോലീസിന് തുമ്പായി. പ്രതിയെക്കുറിച്ച് ലഭിച്ച നേരിയ സംശയം വച്ച് പോലീസ് ഒരു പ്ലാൻ തയ്യാറാക്കി. പ്രതി രാജന്റെ സുഹൃത്തുക്കളെ നിരീക്ഷിക്കാനും അവരിലൂടെ വിവരങ്ങൾ ചോർത്താനും പോലീസ് തീരുമാനിച്ചു.

ഒരു കള്ളുഷാപ്പിലിരുന്ന് ഒരുമിച്ച് കള്ളുകുടിക്കുന്നതിനിടെ സുഹൃത്തുക്കളോട് രാജൻ തന്റെ 'വീരസാഹസം' പറഞ്ഞു. "വഴിയരികിൽ വസ്ത്രമില്ലാതെ കള്ളുകുടിച്ചു കിടക്കുന്നത് കണ്ടപ്പോൾ ഒരു ദേഷ്യത്തിന് ചെയ്തതാണ്" എന്നായിരുന്നു രാജന്റെ മറുപടി. ഉടനെ തന്നെ സുഹൃത്തുക്കൾ വിവരം പോലീസിനെ അറിയിച്ചു. തുടർന്ന് നടന്ന രഹസ്യമൊഴി രേഖപ്പെടുത്തലിലും പ്രതിയുടെ അറസ്റ്റിലും ഈ കേസ് പരിസമാപ്തിയായി.