ഡയാലിസിസ് കിടക്കയിൽ നിന്ന് അച്ഛൻ പകർന്നു തന്ന ഊർജ്ജം.. കുടുംബശ്രീയിൽ നിന്ന് ലോണെടുത്ത് മകളെ പഠിപ്പിച്ച അമ്മ.. വൈകാരിക കുറിപ്പുമായി തൃശൂർ കളക്ടർ ശിഖ സുരേന്ദ്രൻ

 

തൃശ്ശൂരിന്റെ പുതിയ കളക്ടറായി ശിഖ സുരേന്ദ്രൻ ഐഎഎസ് ഇന്ന് ചുമതലയേറ്റു. എന്നാൽ ഇതൊരു പുതിയ കളക്ട്ടറുടെ ചാർജ് എടുക്കൽ എന്നതിലുപരി, ഒരു കുടുംബത്തിന്റെ പോരാട്ടത്തിന്റെയും ഒരു അച്ഛന്റെയും മകളുടെയും സ്വപ്നത്തിന്റെയും സാക്ഷാത്കാരമായിരുന്നു. തന്റെ ജീവിതത്തിലെ ഈ സന്തോഷ നിമിഷത്തെ കുറിച്ച് കളക്ടർ പങ്കുവെച്ച വാക്കുകൾ ആരുടെയും കണ്ണുനിറയിക്കുന്നതാണ്. 

ഐഎഎസ് എന്ന സ്വപ്നം തന്നിലേക്ക് ആദ്യം നട്ടുനനച്ചത് അച്ഛനാണെന്ന് അവർ ഓർക്കുന്നു. ഇന്ന് ആ കസേരയിൽ ഇരിക്കുമ്പോൾ സാക്ഷ്യം വഹിക്കാൻ അച്ഛൻ കൂടെയില്ലാത്തതിന്റെ സങ്കടം ആ വാക്കുകളിൽ നിഴലിക്കുന്നുണ്ട്. രോഗബാധിതനായി ഡയാലിസിസ് കിടക്കയിൽ കിടക്കുമ്പോഴും അച്ഛൻ പകർന്നു നൽകിയ ആത്മവിശ്വാസമാണ് തന്നെ മുന്നോട്ട് നയിച്ചതെന്ന് അവർ പറയുന്നു. കളക്ടറേറ്റിലേക്ക് ഇറങ്ങുന്ന നേരം അമ്മയുടെ കാൽ തൊട്ട് വന്ദിച്ചപ്പോൾ, അച്ഛന്റെ അഭാവം ഓർത്ത് അമ്മ വിതുമ്പിപ്പോയതും സങ്കടം കൊണ്ട് ഒന്നും മിണ്ടാതെ അമ്മ കൂടെയിരുന്നതുമെല്ലാം ആ വരികളിൽ തെളിയുന്നുണ്ട്.

അച്ഛൻ തളർന്നു പോയപ്പോൾ നീണ്ട ഇരുപത് വർഷം ആ കുടുംബത്തെ തോളിലേറ്റിയത് അമ്മയാണ്. ഒരു കമ്പനിയിൽ മണിക്കൂറുകളോളം നിന്നുകൊണ്ട് ജോലി ചെയ്ത് തളർന്നു വരുന്ന അമ്മയ്ക്ക് മകളെ പഠിപ്പിക്കാൻ വലിയ അറിവുകളൊന്നും ഉണ്ടായിരുന്നില്ല. പക്ഷേ മകളുടെ സ്വപ്നങ്ങൾക്ക് വേണ്ടി അവർ ലോകത്തോട് പൊരുതി. കുടുംബശ്രീയിൽ നിന്നും സഹകരണ ബാങ്കിൽ നിന്നും ലോണെടുത്താണ് അവർ മകളെ സിവിൽ സർവീസ് കോച്ചിംഗിന് അയച്ചത്. വീടിന്റെ സാഹചര്യം കണ്ട് പഠനം നിർത്തി ജോലിക്ക് പോകാൻ മകൾ ആലോചിച്ചപ്പോൾ പോലും, ലക്ഷ്യത്തിൽ നിന്ന് പിന്മാറരുതെന്ന് പറഞ്ഞ് കരുത്ത് നൽകിയത് ആ മാതാവാണ്.

താൻ വായിച്ചു പഠിച്ച പുസ്തകങ്ങൾ മാത്രമല്ല, മടുപ്പ് തോന്നുമ്പോഴും പരാജയപ്പെടുമെന്ന് ഭയക്കുമ്പോഴും തന്റെ മകൾ ഇത് നേടിയെടുക്കുമെന്ന് ഉറച്ചു വിശ്വസിച്ച ഒരു അച്ഛനും അമ്മയുമാണ് തന്നെ ഈ നിലയിൽ എത്തിച്ചതെന്ന് ശിഖ സുരേന്ദ്രൻ വികാരാധീനയായി കുറിച്ചു. അമ്മയ്ക്കും സഹോദരിക്കുമൊപ്പം ചുമതലയേറ്റ ആ നിമിഷം ശിഖ സുരേന്ദ്രനെ സംബന്ധിച്ചിടത്തോളം വലിയൊരു അതിജീവനത്തിന്റെ കഥയാണ്. കഠിനാധ്വാനവും നിശ്ചയദാർഢ്യവും ഉണ്ടെങ്കിൽ ഏതൊരു സാധാരണക്കാരനും വലിയ സ്വപ്നങ്ങൾ കീഴടക്കാം എന്നതിന്റെ തെളിവായി മാറുകയാണ് തൃശ്ശൂരിന്റെ ഈ പുതിയ കളക്ടർ.