ഹാങ്ങിങ് സോളാർ വേലി ഉദ്ഘാടനം വെറും പൊറാട്ട് നാടകം; മലയോര ജനതയെ പരിഹസിക്കരുതെന്ന് യുഡിഎഫ്

 

കൂരാച്ചുണ്ട്: തിരഞ്ഞെടുപ്പ് മുന്നിൽക്കണ്ട് എൽഡിഎഫ് സർക്കാരും സച്ചിൻ ദേവ് എംഎൽഎയും ചേർന്ന് നടത്തുന്ന 'പൊറാട്ടുനാടകമാണ്' ഹാങ്ങിങ് സോളാർ വേലി ഉദ്ഘാടനമെന്ന് ആരോപിച്ച് കൂരാച്ചുണ്ടിൽ യുഡിഎഫ് ജനപ്രതിനിധികളും നേതാക്കളും ചടങ്ങ് ബഹിഷ്കരിച്ചു. പഞ്ചായത്ത് പ്രസിഡന്റ് ഉൾപ്പെടെയുള്ള യുഡിഎഫ് പ്രതിനിധികളാണ് പ്രതിഷേധസൂചകമായി ഉദ്ഘാടന ചടങ്ങിൽ നിന്നും വിട്ടുനിന്നത്.

കണ്ണിൽ പൊടിയിടാനുള്ള തന്ത്രമെന്ന് ആരോപണം

പദ്ധതിയുടെ എസ്റ്റിമേറ്റ് നടപടികൾ പോലും പൂർത്തിയാക്കാതെയും ടെൻഡർ നടപടികളിലേക്ക് കടക്കാതെയും തിരഞ്ഞെടുപ്പ് പ്രഖ്യാപനത്തിന്  മണിക്കൂറുകൾ  തൊട്ടുമുമ്പ് നടത്തുന്ന ഈ നീക്കം മലയോര ജനതയെ വിഡ്ഢികളാക്കാനാണെന്ന് യുഡിഎഫ് നേതാക്കൾ കുറ്റപ്പെടുത്തി. കൃത്യമായ നടപടിക്രമങ്ങൾ പാലിക്കാതെ വെറും പ്രചാരണത്തിന് വേണ്ടി മാത്രമാണ് ഇത്തരമൊരു ഉദ്ഘാടനം സംഘടിപ്പിച്ചതെന്നാണ് യുഡിഎഫ് വാദം.

കക്കയത്തെ വാഗ്ദാനം എവിടെ?

രണ്ട് വർഷം മുമ്പ് കക്കയത്ത് കാട്ടുപോത്തിന്റെ ആക്രമണത്തിൽ കർഷകൻ കൊല്ലപ്പെട്ട വേളയിൽ, യുദ്ധകാലാടിസ്ഥാനത്തിൽ സൗരവേലി നിർമ്മിക്കുമെന്ന് സർക്കാർ പ്രഖ്യാപിച്ചിരുന്നു. എന്നാൽ വർഷങ്ങൾ പിന്നിട്ടിട്ടും ആ പദ്ധതിയുടെ പ്രവൃത്തികൾ തുടങ്ങാൻ പോലും അധികൃതർക്ക് കഴിഞ്ഞിട്ടില്ല. ഈ സാഹചര്യത്തിൽ പുതിയൊരു പദ്ധതിയുമായി വരുന്നത് മലയോര ജനതയോടുള്ള വെല്ലുവിളിയാണെന്ന് നേതാക്കൾ പറഞ്ഞു.

നേതാക്കളുടെ പ്രതികരണം

"മലയോര മേഖലയിലെ ജനങ്ങളുടെ ജീവനും സ്വത്തിനും സംരക്ഷണം നൽകുന്ന കാര്യത്തിൽ സർക്കാർ പൂർണ്ണ പരാജയമാണ്. ഇപ്പോൾ നടക്കുന്നത് വെറും തിരഞ്ഞെടുപ്പ് സ്റ്റണ്ട് മാത്രമാണ്," എന്ന്  യുഡിഎഫ് ചെയർമാൻ ജോസ് വെളിയത്ത്, കൺവീനർ ഒ.കെ. അമ്മദ്, കോൺഗ്രസ് മണ്ഡലം പ്രസിഡന്റ് ഷാജു കാരക്കട, മുസ്‌ലിം ലീഗ് പ്രസിഡന്റ് വി.എസ്. ഹമീദ് എന്നിവർ  സംയുക്ത പ്രസ്താവനയിൽ അറിയിച്ചു