കുരുന്നുകളുടെ പുഞ്ചിരിക്കൊപ്പം സാഹോദര്യത്തിന്റെ മധുരവും; കൂരാച്ചുണ്ടിലെ ബഡ്‌സ് സ്കൂൾ മുറ്റത്ത് വിരിഞ്ഞത് സ്നേഹത്തിന്റെ ഇഫ്താർ പൂക്കൾ.

 

സാഹോദര്യത്തിന്റെ സന്ദേശവുമായി ബഡ്സ് സ്കൂളിൽ ഇഫ്താർ വിരുന്ന്

​കൂരാച്ചുണ്ട്: ഭിന്നശേഷിക്കാരായ കുട്ടികൾക്കും അവരുടെ കുടുംബാംഗങ്ങൾക്കുമൊപ്പം സാഹോദര്യത്തിന്റെ മധുരം പങ്കുവെച്ച് കൂരാച്ചുണ്ട് ബഡ്‌സ് സ്കൂളിൽ സംഘടിപ്പിച്ച ഇഫ്താർ വിരുന്ന് മാതൃകയായി. വാർഡ് മെമ്പർ ജലീൽ കുന്നുംപുറത്തിലിന്റെ നേതൃത്വത്തിൽ നടന്ന സംഗമം സ്നേഹത്തിന്റെയും ഒത്തൊരുമയുടെയും വലിയൊരു സന്ദേശമാണ് സമൂഹത്തിന് നൽകിയത്.

​പഞ്ചായത്ത് പ്രസിഡന്റ് സിനി ജിനോ ചടങ്ങ് ഉദ്ഘാടനം ചെയ്തു. ഭിന്നശേഷിക്കാരായ കുട്ടികളുടെ ജീവിതത്തിൽ പ്രകാശം പരത്താൻ ഇത്തരം ഒത്തുചേരലുകൾ അത്യാവശ്യമാണെന്നും, ജാതിമത ചിന്തകൾക്കപ്പുറം മനുഷ്യത്വത്തിനാണ് നാം മുൻഗണന നൽകേണ്ടതെന്നും അവർ തന്റെ പ്രസംഗത്തിൽ ഓർമ്മിപ്പിച്ചു.

​വൈസ് പ്രസിഡന്റ് ബിജു കടലാശ്ശേരി ചടങ്ങിൽ അധ്യക്ഷത വഹിച്ചു. നോമ്പുകാലം ക്ഷമയുടെയും കരുതലിന്റെയും കാലമാണെന്നും അത് ഇത്തരം ജീവകാരുണ്യ പ്രവർത്തനങ്ങളിലൂടെ അന്വർത്ഥമാക്കുകയാണെന്നും അദ്ദേഹം പറഞ്ഞു.

 സബ് ഇൻസ്‌പെക്ടർ ഗ്രീഷ്മ മുഖ്യാതിഥിയായി പങ്കെടുത്തു. സാമൂഹിക സുരക്ഷയും സാഹോദര്യവും നിലനിർത്താൻ ഇത്തരം കൂട്ടായ്മകൾ വഹിക്കുന്ന പങ്കിനെ അവർ പ്രശംസിച്ചു.

പരിമിതികളുള്ള കുട്ടികളെയും അവരുടെ കുടുംബങ്ങളെയും ചേർത്തുപിടിക്കുമ്പോഴാണ് ആഘോഷങ്ങൾ അർത്ഥപൂർണ്ണമാകുന്നതെന്നും,   സ്നേഹവും സമാധാനവും നിറഞ്ഞ ഒരു സമൂഹത്തെ കെട്ടിപ്പടുക്കുന്നതിൽ ഇത്തരം ഒത്തുചേരലുകൾക്ക് വലിയ പങ്കുണ്ടെന്നും, ബഡ്‌സ് സ്കൂൾ കുടുംബത്തിന്റെ സന്തോഷങ്ങളിൽ പങ്കുചേരേണ്ടത് എല്ലാവരുടെയും കടമയാണെന്നും വാർഡ് മെമ്പർ ജലീൽ കുന്നുംപുറത്ത് ഓർമ്മിപ്പിച്ചു

ക്ഷേമകാര്യ സ്റ്റാൻഡിങ്ങ് കമ്മിറ്റി ചെയർമാൻ ചെറിയാൻ ജോസഫ് അറക്കൽ, വാർഡ് മെമ്പർ ജലീൽ കുന്നുംപുറത്ത്, പഞ്ചായത്ത് സെക്രട്ടറി മനിൽകുമാർ കെ.പി., കുടുംബശ്രീ ചെയർപേഴ്സൺ സുനിത ജോബ് എന്നിവർ ആശംസകൾ നേർന്നു സംസാരിച്ചു. കൂടാതെ ആകാശ്, അംജത്, സ്കൂൾ അധ്യാപിക അനുപ്രിയ എന്നിവരും ചടങ്ങിൽ പങ്കെടുത്തു സംസാരിച്ചു.

വികസനകാര്യ സ്റ്റാൻഡിങ്ങ് കമ്മിറ്റി ചെയർപേഴ്സൺ ബിന്ദുമോൾ തോമസ് കളപ്പുരക്കൽ, ആരോഗ്യ-വിദ്യാഭ്യാസ സ്റ്റാൻഡിങ്ങ് കമ്മിറ്റി ചെയർപേഴ്സൺ ഡാർളി അബ്രാഹാം പുല്ലൻകുന്നേൽ, മെമ്പർമാരായ സണ്ണി ജോസഫ് കാനാട്ട്, ബിന്ദു കുര്യൻ ആനിക്കാട്ട് എന്നിവർ പരിപാടികൾക്ക് നേതൃത്വം നൽകി. പരിപാടിയുടെ വിജയത്തിനായി സഹകരിച്ച സ്പോൺസർ സുഹൈൽ കരിമ്പിൻതെരി, സന്ദീപ് കളപ്പുരക്കൽ, ജോളി എന്നിവരെ ചടങ്ങിൽ അഭിനന്ദിച്ചു. നോമ്പുതുറ വിരുന്നിനോടൊപ്പം കുട്ടികളുടെയും രക്ഷിതാക്കളുടെയും ഒത്തുചേരൽ പരിപാടിയെ കൂടുതൽ ഹൃദ്യമാക്കി

.