സ്നേഹിച്ചവനെ കിട്ടാനായി പ്രസവിച്ചു കിടന്ന ഭാര്യയെ കൊലപ്പെടുത്താൻ നഴ്സിന്റെ രൂപത്തിലെത്തി; സിനിമയിലെ കൊലപാതക രീതി ജീവിതത്തില് പയറ്റാൻ ശ്രമിച്ച ബി.ഫാം കാരി
പത്തനംതിട്ട പരുമലയിലെ സെന്റ് ഗ്രിഗോറിയോസ് മിഷൻ ആശുപത്രിയിലെ 102-ാം നമ്പർ മുറിയില് മായ എന്ന യുവതിയെ കാത്തിരുന്നത് സ്വന്തം ജീവൻ അപഹരിക്കാൻ വേഷം മാറി എത്തിയ ഒരു ‘യമദൂതി’യെ ആയിരുന്നു. സ്നേഹബന്ധങ്ങള്ക്കിടയില് പകയുടെ കരിനിഴല് വീഴുമ്പോള്, മരുന്നിന് പകരം മരണത്തിന്റെ വായു സിരകളിലേക്ക് പടർത്താൻ തുനിഞ്ഞ ഒരു സ്ത്രീയുടെ ഞെട്ടിക്കുന്ന കഥയാണിത്.
പ്രസവം കഴിഞ്ഞ് നാലാം ദിവസം വീട്ടിലേക്ക് മടങ്ങാനിരുന്നതായിരുന്നു കായംകുളം സ്വദേശിനിയായ മായ. എന്നാല് കുഞ്ഞിന് ചെറിയൊരു നിറംമാറ്റം കണ്ടതിനാല് ഡോക്ടർമാർ ലൈറ്റ് തെറാപ്പി നിർദ്ദേശിച്ചു. കുഞ്ഞ് തെറാപ്പി യൂണിറ്റിലായതിനാല് മുറിയില് മായയും അമ്മയും മാത്രമായി. വൈകുന്നേരം മൂന്ന് മണിയോടെ നഴ്സിന്റെ വേഷമണിഞ്ഞ ഒരു യുവതി മുറിയിലേക്ക് കടന്നുവന്നു. “ഒരു ഇഞ്ചക്ഷൻ കൂടി ബാക്കിയുണ്ട്” എന്ന് പറഞ്ഞ് അവർ മായയുടെ കൈയ്യില് സിറിഞ്ച് കുത്തിയിറക്കി. എന്നാല് ആ കുത്തില് സാധാരണയല്ലാത്ത ഒരു വേദന മായയ്ക്ക് അനുഭവപ്പെട്ടു.
ഒന്നല്ല, രണ്ടുതവണ ആ നഴ്സ് മായയുടെ കൈയ്യില് സിറിഞ്ച് ആഴ്ത്തി. മൂന്നാം തവണയും അവർ സിറിഞ്ച് തയ്യാറാക്കിയപ്പോള് സംശയം തോന്നിയ മായ അവരെ ചോദ്യം ചെയ്തു. പരിഭ്രമിച്ച നഴ്സ് വേഗത്തില് മുറിക്ക് പുറത്തേക്ക് കടന്നു. എന്നാല് അവർ നഴ്സുമാരുടെ ഡ്യൂട്ടി റൂമിലേക്കല്ല, മറിച്ച് ലിഫ്റ്റിന് അടുത്തേക്കാണ് ഓടിയത്. മായയുടെ അമ്മ ഉടൻ തന്നെ യഥാർത്ഥ നഴ്സുമാരെ വിവരം അറിയിച്ചു. ആശുപത്രിയില് അങ്ങനെ ഒരു നഴ്സിനെ ആരും നിയോഗിച്ചിട്ടില്ലെന്ന് അറിഞ്ഞതോടെ സെക്യൂരിറ്റി ജീവനക്കാർ ഓടിയെത്തി ലിഫ്റ്റിന് സമീപം വെച്ച് ആ സ്ത്രീയെ തടഞ്ഞു.
പോലീസിന്റെ ചോദ്യം ചെയ്യലിലാണ് നാടിനെ നടുക്കിയ ആ സത്യം പുറത്തുവന്നത്. പിടിയിലായ രേവതി എന്ന ബി.ഫാം ബിരുദധാരി, മായയുടെ ഭർത്താവ് രവിയെ സ്വന്തമാക്കാൻ വേണ്ടിയാണ് ഈ ക്രൂരതയ്ക്ക് മുതിർന്നത്. ‘ഹെവൻ’ എന്ന സിനിമയിലെ കൊലപാതക രീതിയാണ് രേവതി ഇവിടെ അനുകരിക്കാൻ ശ്രമിച്ചത്. സിറിഞ്ചില് മരുന്നിന് പകരം വായു നിറച്ച് സിരകളിലേക്ക് കടത്തിവിട്ട് മരണം സംഭവിക്കുന്ന ‘എയർ എംബോളിസം’ എന്ന തന്ത്രമാണ് അവള് പ്രയോഗിച്ചത്. ഇതിനായി നേഴ്സിന്റെ കോട്ടും സിറിഞ്ചും അവള് നേരത്തെ വാങ്ങി കരുതിയിരുന്നു.
സിരകളില് വായു പ്രവേശിച്ചതിനെത്തുടർന്ന് മായയ്ക്ക് ചെറിയൊരു ഹൃദയാഘാതം ഉണ്ടായെങ്കിലും വിദഗ്ധ ചികിത്സയിലൂടെ അവള് ജീവിതത്തിലേക്ക് തിരികെ വന്നു. പ്രണയവും പകയും മനുഷ്യനെ എത്രത്തോളം ക്രൂരനാക്കുമെന്നതിന്റെ ജീവിക്കുന്ന തെളിവായി ഈ സംഭവം ഇന്നും നിലനില്ക്കുന്നു. ഒരു സിനിമയിലെ രംഗം പോലെ അവിശ്വസനീയമെങ്കിലും, മായയുടെയും അമ്മയുടെയും മനക്കരുത്തും ജാഗ്രതയുമാണ് അന്ന് ആ കൊലപാതക ശ്രമത്തെ പരാജയപ്പെടുത്തിയത്.
Comments
Post a Comment