പെട്രോൾ തീർന്ന് വഴിയിലായി, പിന്നെ നേരിട്ടത് നരകയാതന; ദമ്പതികൾക്ക് നേരെ അതിക്രൂരമായ മർദ്ദനം.

 

തിരുവനന്തപുരം നെടുമങ്ങാട് മുല്ലശ്ശേരിയിൽ വെച്ച് ദമ്പതികൾക്ക് നേരെ നടന്നത് അതിക്രൂരമായ സദാചാര ആക്രമണം. നെടുമങ്ങാട് സ്വദേശികളായ സുദീഷും ഭാര്യ ശ്രുതിയും രാത്രി വീട്ടിലേക്ക് മടങ്ങുന്നതിനിടെയാണ് ഈ ദുരനുഭവം ഉണ്ടായത്.

ദമ്പതികൾ സഞ്ചരിച്ചിരുന്ന ബൈക്കിൽ പെട്രോൾ തീർന്നതിനെ തുടർന്ന് വഴിയിൽ നിർത്തേണ്ടി വന്നു. ഈ സമയത്ത് ഇവർ തമ്മിലുണ്ടായ ചെറിയ സംസാരം ശ്രദ്ധയിൽപ്പെട്ട നാട്ടുകാരനായ ഒരാൾ പ്രകോപിതനാവുകയും ബഹളം വെക്കുകയും ചെയ്തു. മദ്യപിച്ചെത്തിയ ഇയാൾ തന്റെ വീടിന് മുന്നിൽ നിൽക്കാൻ പാടില്ലെന്ന് പറഞ്ഞ് തട്ടിക്കയറുകയായിരുന്നു.

സുദീഷ് പെട്രോൾ വാങ്ങാൻ പോയ സമയത്ത്, ഈ വ്യക്തിയും കൂടെയുള്ളവരും ചേർന്ന് ശ്രുതിയെ വളയുകയും അസഭ്യം പറയുകയും ചെയ്തു. വണ്ടിയുടെ താക്കോൽ ബലാൽക്കാരമായി തട്ടിയെടുക്കാൻ ശ്രമിക്കുകയും അത് തടഞ്ഞ ശ്രുതിയുടെ വസ്ത്രം വലിച്ചുകീറുകയും നെഞ്ചത്തടക്കം മർദ്ദിക്കുകയും ചെയ്തു. തടയാൻ ശ്രമിച്ചപ്പോൾ മുഖത്തടിക്കുകയും നിലത്തിട്ട് വയറ്റിലും കാലിലും ചവിട്ടുകയും ചെയ്തതായി ശ്രുതി പറഞ്ഞു.

പെട്രോളുമായി തിരിച്ചെത്തിയ സുദീഷിനെയും സംഘം ക്രൂരമായി മർദ്ദിച്ചു. തങ്ങൾ ഭാര്യഭർത്താക്കന്മാരാണെന്ന് പറഞ്ഞിട്ടും ഫോട്ടോകൾ കാണിച്ചിട്ടും അക്രമികൾ അത് കേൾക്കാൻ തയ്യാറായില്ല. 

"ജീവനോടെ നീ പോകില്ല" എന്ന് ഭീഷണിപ്പെടുത്തുകയും സദാചാര വിരുദ്ധമായി പെരുമാറുന്നു എന്ന് ആരോപിച്ചായിരുന്നു മർദ്ദനം 

സംഭവസ്ഥലത്തെത്തിയ പോലീസ് കൃത്യമായ നടപടി സ്വീകരിക്കുന്നില്ലെന്ന് ദമ്പതികൾ ആരോപിക്കുന്നു. 24 മണിക്കൂർ കഴിഞ്ഞിട്ടും എഫ്.ഐ.ആർ രജിസ്റ്റർ ചെയ്യാനോ പ്രതികളെ പിടികൂടാനോ പോലീസ് തയ്യാറായില്ല. പരാതി നൽകാൻ ചെന്നപ്പോൾ ഒത്തുതീർപ്പിനാണ് പോലീസ് ശ്രമിച്ചതെന്നും ഇവർ പരാതിപ്പെടുന്നു.

നിലവിൽ നെടുമങ്ങാട് ജില്ലാ ആശുപത്രിയിൽ ചികിത്സയിലാണ് ഈ ദമ്പതികൾ. ശ്രുതിയുടെ ചുണ്ടിൽ മൂന്ന് സ്റ്റിച്ച് ഉണ്ട്.

കേരളം പോലുള്ള ഒരു സംസ്ഥാനത്ത് 2026-ലും ഇത്തരം സദാചാര ഗുണ്ടായിസം നടക്കുന്നത് അങ്ങേയറ്റം ദൗർഭാഗ്യകരമാണ്.