വനം മന്ത്രിക്കെതിരെ കർഷക പ്രതിനിധി മത്സരരംഗത്ത്; കൂരാച്ചുണ്ട് സ്വദേശി അഡ്വ. സുമിൻ നെടുങ്ങാടൻ പത്രിക സമർപ്പിച്ചു.

കൂരാച്ചുണ്ട്: നിയമസഭാ തിരഞ്ഞെടുപ്പിന്റെ പത്രികാ സമർപ്പണവും സൂക്ഷ്മപരിശോധനയും പൂർത്തിയായതോടെ എലത്തൂർ മണ്ഡലത്തിൽ പോരാട്ടം മുറുകുന്നു. വനംവകുപ്പ് മന്ത്രിക്കെതിരെ മലയോര കർഷകരുടെ പ്രതിനിധിയായി അഡ്വ. സുമിൻ എസ്. നെടുങ്ങാടൻ സ്വതന്ത്ര സ്ഥാനാർത്ഥിയായി മത്സരിക്കും. കേരള കർഷക മഹാപഞ്ചായത്തിന്റെയും വി.ഫാം ഫാർമേഴ്സ് ഫൗണ്ടേഷന്റെയും സംയുക്ത തീരുമാനപ്രകാരമാണ് ഈ നീക്കം.

കഴിഞ്ഞ അഞ്ച് വർഷത്തെ വനംവകുപ്പിന്റെ പ്രവർത്തനങ്ങളിലെ പാളിച്ചകൾ ഉയർത്തിക്കാട്ടിയാണ് കർഷക സംഘടനകൾ തിരഞ്ഞെടുപ്പിനെ നേരിടുന്നത്. എ.കെ. ശശീന്ദ്രൻ വനം മന്ത്രിയായിരുന്ന കാലയളവിൽ സംസ്ഥാനത്ത് 600-ലധികം പേർ വന്യജീവി ആക്രമണങ്ങളിൽ കൊല്ലപ്പെട്ടുവെന്ന് കർഷക മഹാപഞ്ചായത്ത് കുറ്റപ്പെടുത്തി. കൊല്ലപ്പെട്ടവരിൽ ഭൂരിഭാഗവും ആദിവാസികളും സാധാരണക്കാരായ കർഷകരുമാണ്. ഇവർക്ക് അർഹമായ നഷ്ടപരിഹാരം നൽകുന്നതിൽ വനംവകുപ്പ് വൻ പരാജയമാണെന്ന് യോഗം വിലയിരുത്തി.

മലയോര മേഖലയുടെ വികസനത്തിന് വനംവകുപ്പ് തടസ്സം നിൽക്കുന്നു എന്നതാണ് സ്ഥാനാർത്ഥിത്വത്തിലേക്ക് നയിച്ച പ്രധാന കാരണങ്ങളിലൊന്ന്.

 സംസ്ഥാനത്തെ സ്വപ്ന പദ്ധതിയായ മലയോര ഹൈവേയുടെ പൂർത്തീകരണത്തിന് വനംവകുപ്പ് തടസ്സം സൃഷ്ടിക്കുന്നു. ദേശീയ-സംസ്ഥാന പാതകളുടെ വികസനത്തിലും സമാനമായ നിലപാടാണ് വകുപ്പ് സ്വീകരിക്കുന്നത്.

 കർഷകർ വർഷങ്ങളായി കൈവശം വച്ചിരിക്കുന്നതും കൃത്യമായ റവന്യൂ രേഖകളുള്ളതുമായ ഭൂമിയിൽ വനംവകുപ്പ് അവകാശവാദം ഉന്നയിച്ച് കർഷകരെ ദ്രോഹിക്കുകയാണ്.

 വന്യമൃഗശല്യം മൂലം കോടിക്കണക്കിന് രൂപയുടെ കൃഷിനാശം സംഭവിച്ചിട്ടും മാന്യമായ നഷ്ടപരിഹാരം നൽകാനോ ജനങ്ങളുടെ ജീവനും സ്വത്തിനും സംരക്ഷണം നൽകാനോ മന്ത്രിയോ ഉദ്യോഗസ്ഥരോ തയ്യാറാകുന്നില്ല.

മന്ത്രിയുടെ അറിവോടെ നടക്കുന്ന കർഷക വിരുദ്ധ നടപടികൾക്കെതിരെയുള്ള പ്രതിഷേധമാണ് ഈ മത്സരമെന്ന് വി.ഫാം കോഴിക്കോട് ജില്ലാ കമ്മിറ്റി അറിയിച്ചു. മലയോര ജനതയുടെ അതിജീവനത്തിനായുള്ള പോരാട്ടമാണിതെന്ന് ഭാരവാഹികൾ വ്യക്തമാക്കി.

വി.ടി. തോമസ് വെളിയംകുളം അദ്ധ്യക്ഷത വഹിച്ച യോഗത്തിൽ ജോയി കണ്ണൻചിറ, രാജു പൈകയിൽ, മാർഗരറ്റ് ടീച്ചർ, സെമിലി സുനിൽ, സണ്ണി കൊമ്മറ്റം, ടോമി മുതുകാട്, ലീലാമ്മ, ബാബു വിലങ്ങാട് തുടങ്ങിയ പ്രമുഖർ സംസാരിച്ചു. മണ്ഡലത്തിലെ നിർണ്ണായകമായ കർഷക വോട്ടുകൾ സുമിൻ നെടുങ്ങാടന് ലഭിക്കുമെന്ന ഉറച്ച വിശ്വാസത്തിലാണ് സംഘടനകൾ.