മലയോര മണ്ണിൽ വോട്ടഭ്യർത്ഥിച്ച് സി.പി. സതീഷ്; വന്യമൃഗശല്യത്തിന് പരിഹാരം വേണമെന്ന് കർഷകർ

   

​കൂരാച്ചുണ്ട്: ബാലുശ്ശേരി നിയോജക മണ്ഡലം എൻ.ഡി.എ സ്ഥാനാർത്ഥി സി.പി. സതീഷ് കൂരാച്ചുണ്ട് പഞ്ചായത്തിന്റെ വിവിധ ഭാഗങ്ങളിൽ പര്യടനം നടത്തി. മലയോര കുടിയേറ്റ ഗ്രാമമായ കൂരാച്ചുണ്ടിലെത്തിയ സ്ഥാനാർത്ഥിയോട് വന്യമൃഗശല്യം ഉയർത്തുന്ന വെല്ലുവിളികളാണ് കർഷകർ പ്രധാനമായും പങ്കുവെച്ചത്.

​കൃഷി ചെയ്തും സമാധാനമായും ജീവിക്കാൻ സാഹചര്യമൊരുക്കണമെന്നും, വന്യമൃഗശല്യത്തിന് ശാശ്വത പരിഹാരം വേണമെന്നും കർഷകർ ഒറ്റക്കെട്ടായി ആവശ്യപ്പെട്ടു. സർക്കാരിനോട് പലതവണ പരാതിപ്പെട്ടിട്ടും നടപടിയുണ്ടായില്ലെന്ന് ഇവർ കുറ്റപ്പെടുത്തി. ജില്ലയിൽ നിന്നുള്ള എം.എൽ.എ തന്നെ വനംമന്ത്രിയായിരുന്നിട്ടും പ്രശ്നപരിഹാരത്തിന് ശ്രമമുണ്ടാകാത്തതിലും, ഗ്രാമപഞ്ചായത്തിന്റെ അവഗണനയിലും കർഷകർ പ്രതിഷേധം അറിയിച്ചു. ഈ വിഷയം കേന്ദ്ര സർക്കാരിന്റെ ശ്രദ്ധയിൽപ്പെടുത്തുമെന്ന് സ്ഥാനാർത്ഥി കർഷകർക്ക് ഉറപ്പ് നൽകി.

​

​പര്യടനത്തിനിടെ കൂരാച്ചുണ്ട് സെന്റ് തോമസ് ഫൊറോന പള്ളിയിലെത്തിയ സി.പി. സതീഷ്, വികാരി ഫാ. വിൻസെന്റ് കണ്ടത്തിലിനെ കണ്ട് അനുഗ്രഹം തേടി. തുടർന്ന് പ്രദേശത്തെ പഴയകാല പ്രവർത്തകരെ സന്ദർശിച്ച അദ്ദേഹം കൂരാച്ചുണ്ട് ടൗണിൽ വോട്ടഭ്യർത്ഥിച്ചു.

​സ്ഥാനാർത്ഥിക്കൊപ്പം ബിജെപി നേതാക്കളായ ജയപ്രകാശ് കായണ്ണ, ജയൻ കെ. ജോസ്, ജിങ്കോ ശരത്, സുബിൻ നെടുമല, രാജൻ അമ്പാടി, രവി മറ്റപ്പള്ളി, അനിൽ കുന്നുമ്മൽ, സി.എം. ശാരദ, മനോഹരൻ, മയൂഷ ജോസഫ് തുടങ്ങിയവർ പങ്കെടുത്തു.