പിറവം - കൂരാച്ചുണ്ട് - ചക്കിട്ടപ്പാറ സ്വിഫ്റ്റ് ബസ് സർവീസ് പ്രതിസന്ധിയിൽ; മലയോര മേഖലയുടെ യാത്രാ സ്വപ്നങ്ങൾക്ക് തിരിച്ചടി

 

കൂരാച്ചുണ്ട്/ ചക്കിട്ടപാറ: കോഴിക്കോടിന്റെ കിഴക്കൻ മലയോര മേഖലയിലെ കൂരാച്ചുണ്ടിലെയും, ചക്കിട്ടപാറയിലെയും  യാത്രാക്ലേശത്തിന് പരിഹാരമായി പ്രഖ്യാപിച്ച പിറവം - കൂരാച്ചുണ്ട് - ചക്കിട്ടപ്പാറ കെ.എസ്.ആർ.ടി.സി സ്വിഫ്റ്റ് (KS) ഫാസ്റ്റ് പാസഞ്ചർ ബസ് സർവീസ് അനിശ്ചിതത്വത്തിൽ. പിറവം ഡിപ്പോയ്ക്ക് അനുവദിച്ച ഈ സർവീസ് ചില സാങ്കേതിക കാരണങ്ങൾ ചൂണ്ടിക്കാട്ടി കോഴിക്കോട് വരെ മാത്രമായി പരിമിതപ്പെടുത്തിയതാണ് മലയോര നിവാസികളെ ആശങ്കയിലാഴ്ത്തുന്നത്.

പ്രതീക്ഷകൾക്ക് മുകളിൽ കരിനിഴൽ

നേരത്തെ ഈ റൂട്ടിൽ സർവീസ് നടത്തിയിരുന്ന ബസ് നിർത്തലാക്കിയതോടെയാണ് മേഖലയിൽ കടുത്ത യാത്രാക്ലേശം അനുഭവപ്പെട്ടു തുടങ്ങിയത്. ഇതിന് പരിഹാരമായാണ് പിറവം ഡിപ്പോയിൽ നിന്നും ചക്കിട്ടപ്പാറയിലേക്ക് പുതിയ സ്വിഫ്റ്റ് ബസ് അനുവദിച്ചത്. എന്നാൽ സർവീസ് ആരംഭിച്ച് ദിവസങ്ങൾക്കുള്ളിൽ തന്നെ ഇത് കോഴിക്കോട് വരെയാക്കി ചുരുക്കിയത് മലയോരത്തോടുള്ള കെ.എസ്.ആർ.ടി.സി അധികൃതരുടെ കടുത്ത അവഗണനയാണെന്ന് ആക്ഷേപമുയരുന്നു.

പ്രതീക്ഷകൾക്ക് മങ്ങലേറ്റു

പിറവത്ത് നിന്നും ആരംഭിച്ച് കൂരാച്ചുണ്ട് വഴി ചക്കിട്ടപ്പാറയിൽ അവസാനിക്കേണ്ടിയിരുന്ന ഈ ബസ്, മേഖലയിലെ വിദ്യാർത്ഥികൾക്കും ജീവനക്കാർക്കും ഏറെ പ്രയോജനകരമാകേണ്ടതായിരുന്നു. എന്നാൽ സർവീസ് കോഴിക്കോട് നഗരത്തിൽ അവസാനിപ്പിക്കുന്നതോടെ, കൂരാച്ചുണ്ട്, ചക്കിട്ടപ്പാറ തുടങ്ങിയ മലയോര ഗ്രാമങ്ങളിലുള്ളവർക്ക് ഇതിന്റെ പ്രയോജനം ലഭിക്കാത്ത സാഹചര്യമാണുള്ളത്.

 പ്രതിഷേധം ശക്തം

യാത്രാക്ലേശം രൂക്ഷമായ ഈ റൂട്ടിൽ പുതിയ ബസ് സർവീസ് മുടങ്ങുന്നത് അനുവദിക്കാനാവില്ലെന്ന് യാത്രക്കാരും സോഷ്യൽ മീഡിയ കൂട്ടായ്മകളും അറിയിച്ചു. പിറവം - ചക്കിട്ടപ്പാറ FB LS വാട്സാപ്പ് കൂട്ടായ്മ വിഷയത്തിൽ ശക്തമായ പ്രതിഷേധവുമായി രംഗത്തെത്തിയിട്ടുണ്ട്.

" കാത്തിരിപ്പിനൊടുവിൽ അനുവദിച്ച ബസ് സാങ്കേതിക കാരണങ്ങൾ പറഞ്ഞ് മലയോരത്തിന് നിഷേധിക്കുന്നത് നീതിയല്ല. ഉന്നത ഉദ്യോഗസ്ഥരും ജനപ്രതിനിധികളും രാഷ്ട്രീയ പാർട്ടികളും അടിയന്തരമായി ഇടപെട്ട് സർവീസ് പൂർണ്ണരൂപത്തിൽ പുനഃസ്ഥാപിക്കണം." - യാത്രക്കാർ ആവശ്യപ്പെട്ടു.

അടിയന്തര ഇടപെടൽ വേണം

മലയോര മേഖലയുടെ വികസനത്തിനും യാത്രാ സൗകര്യത്തിനും വലിയ മുതൽക്കൂട്ടാവേണ്ട ഈ സ്വിഫ്റ്റ് ബസ് ചക്കിട്ടപ്പാറ വരെ ഓടിക്കാൻ നടപടി വേണമെന്നാണ് നാട്ടുകാരുടെ ആവശ്യം. ജനപ്രതിനിധികളുടെ ഭാഗത്തുനിന്ന് കെ.എസ്.ആർ.ടി.സി അധികൃതരിൽ സമ്മർദ്ദം ചെലുത്തണമെന്നും, അല്ലാത്തപക്ഷം ശക്തമായ ജനകീയ പ്രതിഷേധ പരിപാടികളുമായി മുന്നോട്ട് പോകുമെന്നും നാട്ടുകാർ മുന്നറിയിപ്പ് നൽകി.