സനൂപ് ഇനി ലോകത്തെ കാണും.. ഇരുട്ടിനെ തോൽപ്പിച്ച് സനൂപ് മടങ്ങിവരുന്നു

ഒരു ചികിത്സാ പിഴവ് കവർന്നെടുത്തത് സനൂപിന്റെ കണ്ണുകളിലെ വെളിച്ചം മാത്രമായിരുന്നില്ല, ആ കുടുംബത്തിന്റെയാകെ പ്രതീക്ഷകളെയായിരുന്നു. തൃശൂർ മെഡിക്കൽ കോളേജിൽ വെച്ച് അപ്രതീക്ഷിതമായി സംഭവിച്ച ആ ദുരന്തം സനൂപിനെ ഇരുട്ടിലേക്ക് തള്ളിയിടുകയായിരുന്നു. സനൂപിന്റെ കഥ വാർത്തയിൽ കണ്ട കോൺഗ്രസ്‌ നേതാവ് കെസി വേണുഗോപാൽ വിഷയത്തിൽ ഇടപെടുകയായിരുന്നു.

ഇപ്പോഴിതാ കോയമ്പത്തൂരിലെ അരവിന്ദ് കണ്ണാശുപത്രിയിൽ നിന്ന് സനൂപിനെ കുറിച്ചുള്ള ശുഭവാർത്തകൾ പുറത്തു വരികയാണ്. സനൂപിന്റെ ചികിത്സയുടെ ആദ്യ ഘട്ടം വിജയകരമായി പൂർത്തിയായിരിക്കുന്നു. താൽക്കാലികമായി കൃത്രിമ കണ്ണുകൾ വെച്ചുപിടിപ്പിച്ചതോടെ സനൂപ് തന്റെ ആത്മവിശ്വാസം വീണ്ടെടുത്തിരിക്കുകയാണ്. രണ്ട് മാസത്തെ കാത്തിരിപ്പിന് ശേഷം സനൂപിന് കൂടുതൽ സ്മാർട്ടായ കണ്ണുകൾ ലഭിക്കും. 

ശബ്ദങ്ങളിലൂടെ ലോകത്തെ അറിയാനും തിരിച്ചറിയാനും സഹായിക്കുന്ന പുത്തൻ സ്മാർട്ട് കണ്ണടകൾ ഉപയോഗിക്കാനുള്ള പരിശീലനത്തിലാണ് സനൂപ് ഇപ്പോൾ. ആരുടെയും സഹായമില്ലാതെ സ്വന്തം കാര്യങ്ങൾ ചെയ്യാനും ആത്മവിശ്വാസത്തോടെ നടക്കാനും ഈ സ്മാർട്ട് ഗ്ലാസുകൾ സനൂപിനെ പ്രാപ്തനാക്കും. സനൂപിന്റെ ഈ യാത്രയിൽ അവനെ ഒറ്റപ്പെടുത്താതെ ചേർത്തുപിടിക്കാൻ ഒരുപാട് പേർ കൂടെയുണ്ട് എന്നത് ഏറെ സന്തോഷകരമാണെന്ന് കുടുംബം പറയുന്നു.

കെ.സി വേണുഗോപാൽ എംപി ഒരു ലക്ഷം രൂപ ചികിത്സാ സഹായമായി സനൂപിന് നൽകിയത് വലിയൊരു കൈത്താങ്ങായി. അതുപോലെ സനൂപിനെ ആശുപത്രിയിൽ എത്തിക്കാനും എല്ലാ കാര്യങ്ങൾക്കും കൂടെ നിൽക്കാനും അനിൽ അക്കരയും സജീവമായി രംഗത്തുണ്ട്. രാഷ്ട്രീയത്തിന് അപ്പുറം മനുഷ്യത്വത്തിന്റെ വലിയൊരു സ്നേഹമാണ് സനൂപിന് ചുറ്റും ഇപ്പോൾ ഉള്ളത്.