പുഴയിലേക്ക് നീണ്ട കൈകൾ; സൈഡ് മിററിൽ കണ്ട അപകടം; ബൈക്ക് തിരിച്ചുപാഞ്ഞ് ഇരുവഴഞ്ഞിപ്പാലത്ത് ഷഫീഖ് കുറിച്ചത് ഒരു ജീവന്റെ കാവൽ
മുക്കം: ഇരുവഴഞ്ഞിപ്പുഴ പാലത്തിന് മുകളിൽ നിന്ന് ആത്മഹത്യയ്ക്ക് ശ്രമിച്ച വിദ്യാർത്ഥിനിയെ സാഹസികമായി രക്ഷിച്ച് വെട്ടത്തൂർ സ്വദേശിയായ യുവാവ് മാതൃകയായി. വെട്ടത്തൂർ ചീക്കപ്പള്ളി ബഷീർ-ആമിന ദമ്പതികളുടെ മകൻ ഷഫീഖ് (കുഞ്ഞാനു) ആണ് സ്വന്തം ജീവൻ പണയപ്പെടുത്തിയും പെൺകുട്ടിയുടെ ജീവൻ രക്ഷിച്ചത്.
സംഭവം നടന്നത് ഇങ്ങനെ:
വ്യാഴാഴ്ച രാവിലെ മാർക്കറ്റിൽ പോയി മീൻ വാങ്ങി മടങ്ങുകയായിരുന്നു ഷഫീഖ്. ഈ സമയത്താണ് ഇരുവഴഞ്ഞിപ്പുഴ പാലത്തിന് മുകളിൽ സംശയാസ്പദമായ സാഹചര്യത്തിൽ ഒരു പെൺകുട്ടി നിൽക്കുന്നത് ഷഫീഖിന്റെ ശ്രദ്ധയിൽപ്പെട്ടത്. പെൺകുട്ടിയുടെ പെരുമാറ്റത്തിൽ അസ്വാഭാവികത തോന്നിയ ഷഫീഖ്, അല്പം ദൂരെ മാറി ബൈക്ക് ഒതുക്കി നിർത്തി സൈഡ് മിററിലൂടെ നിരീക്ഷിച്ചു.
പെട്ടെന്ന് പെൺകുട്ടി പാലത്തിന്റെ കൈവരിയിൽ കയറി നിൽക്കുന്നത് കണ്ടതോടെ അപകടം മണത്ത ഷഫീഖ്, നിമിഷനേരം കൊണ്ട് ബൈക്ക് തിരിച്ച് പെൺകുട്ടിയുടെ അടുത്തേക്ക് പാഞ്ഞെത്തി. ഷഫീഖ് എത്തുമ്പോഴേക്കും പെൺകുട്ടി പുഴയിലേക്ക് ചാടാൻ തയ്യാറെടുക്കുകയായിരുന്നു. ബൈക്കിലിരുന്നു കൊണ്ട് തന്നെ പെൺകുട്ടിയുടെ വസ്ത്രത്തിൽ പിടുത്തമിട്ടെങ്കിലും വസ്ത്രം കീറുന്നത് കണ്ടതോടെ ഉടൻ തന്നെ മുടിയിൽ മുറുക്കിപ്പിടിച്ച് താഴേക്ക് വീഴാതെ തടഞ്ഞു.
നാട്ടുകാരുടെ സഹായം:
യുവാവിൻ്റെ നിലവിളി കേട്ട് ഓടിക്കൂടിയ മറ്റ് വഴിയാത്രക്കാരും നാട്ടുകാരും ചേർന്നാണ് പെൺകുട്ടിയെ കൈവരിയിൽ നിന്നും സുരക്ഷിതമായി താഴെയിറക്കിയത്. വീട്ടുകാരുമായി പിണങ്ങിയതിനെത്തുടർന്നാണ് വിദ്യാർത്ഥിനി ഇത്തരമൊരു കടുംകൈയ്ക്ക് മുതിർന്നതെന്നാണ് പ്രാഥമിക വിവരം. പെൺകുട്ടിയെ ഉടൻ തന്നെ മുക്കത്തെ KMCT മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
രക്ഷാപ്രവർത്തനത്തിനിടെ കൈക്ക് പരിക്കേറ്റ ഷഫീഖ് പ്രാഥമിക ചികിത്സയ്ക്ക് ശേഷം വീട്ടിൽ വിശ്രമത്തിലാണ്. കൃത്യസമയത്ത് ഇടപെടാൻ കഴിഞ്ഞതിലും ഒരു ജീവൻ രക്ഷിക്കാനായതിലും അതിയായ സന്തോഷമുണ്ടെന്ന് 'മദീന മനസിൽ' ഷഫീഖ് പറഞ്ഞു. ഷഫീഖിന്റെ ഈ ധീരമായ പ്രവൃത്തിയെ സോഷ്യൽ മീഡിയയും നാട്ടുകാരും അഭിനന്ദനങ്ങൾ കൊണ്ട് മൂടുകയാണ്.
Comments
Post a Comment