അഗ്നിരഥത്തിലേറിയവർ ഇന്നും നാടിന്റെ വിങ്ങൽ; വിടപറയാതെ ചെമ്പനോടയും കൂരാച്ചുണ്ടും

2001 മാർച്ച് 11 കൂരാച്ചുണ്ട് , ചെമ്പനോട ഗ്രാമങ്ങൾക്കും കേരളത്തെ സംബന്ധിച്ചും മറക്കാൻ പറ്റാത്ത ഒരു കറുത്ത ദിനം

 കൂരാച്ചുണ്ട്/ ചക്കിട്ടപാറ: കേരളം കണ്ട ഏറ്റവും വലിയ യാത്രാദുരന്തങ്ങളിലൊന്നായ പൂക്കിപ്പറമ്പ് ബസ് അപകടത്തിന് ഈ മാർച്ച് 11-ന് 25 വർഷം തികയുന്നു. 2001 മാർച്ച് 11-ന് മലപ്പുറം ജില്ലയിലെ പൂക്കിപ്പറമ്പിലുണ്ടായ ആ അഗ്നിബാധയിൽ 44-ഓളം ജീവനുകളാണ് വെന്തുരുകിത്തീർന്നത്. കാൽനൂറ്റാണ്ട് പിന്നിടുമ്പോഴും, ചെമ്പനോട, കൂരാച്ചുണ്ട് ഗ്രാമങ്ങൾക്ക് ആ ദിനം ഇന്നും ഉണങ്ങാത്ത മുറിവായി അവശേഷിക്കുന്നു.

മിഷൻ യാത്രയ്ക്കിടെ പൊലിഞ്ഞ നക്ഷത്രങ്ങൾ

ജീസസ് യൂത്ത് സംഘടനയുടെ പ്രവർത്തനങ്ങൾക്കായി ഇടുക്കി രാജപുരത്ത് പോയി മടങ്ങുകയായിരുന്ന അഞ്ച് യുവജനങ്ങളാണ് ഈ അപകടത്തിൽ നാടിന് നഷ്ടമായത്. കൂരാച്ചുണ്ട് സ്വദേശി റോയി ചുവപ്പുങ്കൽ, ചെമ്പനോട സ്വദേശികളായ രജനി (പുരയിടത്തിൽ), ബിന്ദു (വാഴക്കടവത്ത്), ഷിജി (കറുത്തപാറക്കൽ), റീന (പാലറ) എന്നിവരായിരുന്നു ആ സുഹൃത്തുക്കൾ. ഗുരുവായൂരിൽ നിന്നും തലശ്ശേരിയിലേക്ക് പോവുകയായിരുന്ന 'പ്രണവം' ബസ്സിലായിരുന്നു ഇവരുടെ യാത്ര. പൂക്കിപ്പറമ്പിൽ വെച്ച് ബസ് തലകീഴായി മറിയുകയും നിമിഷങ്ങൾക്കകം തീപിടിക്കുകയുമായിരുന്നു. അഗ്നിരക്ഷാസേന എത്തുന്നതിന് മുമ്പ് നാട്ടുകാർ നടത്തിയ ധീരമായ ഇടപെടലിലൂടെ ഏതാനും പേരെ മാത്രമാണ് രക്ഷിക്കാനായത്.

സ്മരണയായി 'അഗ്നി രഥത്തിലേറിയവർ'

ഈ അഞ്ച് പേരുടെയും ജീവിതവും അവരുടെ ജീസസ് യൂത്ത് പ്രവർത്തനങ്ങളും പൂക്കിപ്പറമ്പ് അപകടത്തിന്റെ തീക്ഷ്ണതയും അടയാളപ്പെടുത്തിക്കൊണ്ട് കൂരാച്ചുണ്ട് സ്വദേശിയും റിട്ടയേഡ് അധ്യാപകനുമായ ജേക്കബ് കോച്ചേരി രചിച്ച 'അഗ്നി രഥത്തിലേറിയവർ' എന്ന പുസ്തകത്തിന്റെ രണ്ടാം പതിപ്പ് ഈ ചരമവാർഷിക ദിനത്തിൽ പുറത്തിറങ്ങുന്നു. ഈ പുസ്തകത്തെ ആസ്പദമാക്കി ജിന്റോ തോമസ് സംവിധാനം ചെയ്ത 'ജി ബാൻഡ് സോൾഫിഷേഴ്സ്' എന്ന ഡോക്യുമെന്ററി വെബ് സീരീസ് ഇപ്പോൾ 'ഗോഡ്സ് ബാൻഡ്' എന്ന യൂട്യൂബ് ചാനലിൽ ലഭ്യമാണ്.

സേവനവഴിയിൽ ജീസസ് യൂത്ത്

അപകടത്തിൽ മരിച്ചവരുടെ സ്മരണയ്ക്കായി ജീസസ് യൂത്ത് സംഘടന അഞ്ച് കുടുംബങ്ങൾക്കായി ഭവനങ്ങൾ നിർമ്മിച്ച് നൽകിയിരുന്നു. പ്രളയ ദുരിതാശ്വാസ പ്രവർത്തനങ്ങളുടെ ഭാഗമായി അർഹരായവർക്കാണ് ഈ വീടുകൾ കൈമാറിയത്. എല്ലാവർഷവും മാർച്ച് 11-നോടനുബന്ധിച്ച് ഇവരുടെ സുഹൃത്തുക്കൾ ഒത്തുചേരുകയും ഭവന സന്ദർശനവും പ്രത്യേക പ്രാർത്ഥനകളും സ്നേഹവിരുന്നും നടത്തിവരാറുമുണ്ട്.

ബാക്കിപത്രമായി ആ തെങ്ങ്

അപകടത്തിന്റെ മൂകസാക്ഷിയായി പൂക്കിപ്പറമ്പിൽ നിലനിന്നിരുന്ന, പകുതി വെന്ത നിലയിലുള്ള ആ തെങ്ങ് അടുത്തിടെ പുതിയ ഹൈവേ വികസനത്തിന്റെ ഭാഗമായി മുറിച്ചുമാറ്റപ്പെട്ടു. എങ്കിലും, ആ നാട്ടുകാരുടെ മനസ്സിൽ ആ കറുത്ത ദിനത്തിന്റെ ഓർമ്മകൾക്ക് ഇന്നും മരണമില്ല. പഞ്ചായത്ത് ഭരണസമിതിയുടെയും ആർ.ടി.ഒയുടെയും നേതൃത്വത്തിൽ എല്ലാ വർഷവും അപകടത്തിൽ മരിച്ചവർക്കായി അനുസ്മരണ പരിപാടികൾ സംഘടിപ്പിക്കാറുണ്ട്.