മരണത്തിലും കൈവിടാതെ ആ സൗഹൃദം; കണ്ണീരിലാഴ്ത്തി കുരുന്നുകളുടെ വിടവാങ്ങൽ

 

​വേങ്ങര: ഒന്നിച്ചു കളിച്ചു നടന്നവർ, ഒരേ ബെഞ്ചിലിരുന്ന് അക്ഷരങ്ങൾ നുകർന്നവർ... ഒടുവിൽ മരണത്തിന്റെ നിഴൽ വീണപ്പോഴും ആ കുഞ്ഞു കൈകൾ പരസ്പരം വേർപെട്ടില്ല. പകരയിലെ പാറക്കുളത്തിൽ പൊലിഞ്ഞുപോയ ഫാദി അമന്റെയും അസ്‌ലഹിന്റെയും വേർപാട് ഒരു നാടിന്റെയാകെ നോവായി മാറുകയാണ്. കളിക്കൂട്ടുകാർക്കായി പകര ജുമാ മസ്ജിദ് ഖബർസ്ഥാനിൽ മണ്ണൊരുങ്ങിയതും അടുത്തടുത്താണ്. ഒരേ മണ്ണിൽ, ചാരെ ഉറങ്ങാൻ അവർ മടങ്ങി.

​

​ശനിയാഴ്ച വൈകുന്നേരമാണ് നാടിനെ നടുക്കിയ ദുരന്തമുണ്ടായത്. വീടിനടുത്തുള്ള പാറക്കുളത്തിൽ മീൻ പിടിക്കാനായി ആവേശത്തോടെ പോയതായിരുന്നു ഇരുവരും. പെയ്തിറങ്ങിയ മഴയിൽ നിറഞ്ഞുകിടന്ന കുളത്തിന്റെ ആഴങ്ങളിലേക്ക് എങ്ങനെയാണ് അവർ വീണതെന്ന് ആർക്കും അറിയില്ല. ഏറെ നേരമായിട്ടും കുട്ടികളെ കാണാതായതോടെ വീട്ടുകാരും നാട്ടുകാരും നടത്തിയ തിരച്ചിലിലാണ് കുളക്കരയിൽ ഇവരുടെ ചെരിപ്പുകൾ കണ്ടെത്തിയത്. തുടർന്ന് നടത്തിയ തിരച്ചിലിൽ കുളത്തിന്റെ ആഴങ്ങളിൽ നിന്ന് ചേതനയറ്റ ആ ശരീരങ്ങൾ കണ്ടെത്തുകയായിരുന്നു. പരസ്പരം കൈകോർത്തുപിടിച്ച നിലയിലായിരുന്നു മൃതദേഹങ്ങൾ എന്നാണ് നാട്ടുകാർ വിങ്ങലോടെ ഓർക്കുന്നത്.

​

​ഇട്ടിലാക്കൽ എ.എം.എൽ.പി. സ്കൂളിലെ വിദ്യാർത്ഥികളായ ഇരുവരുടെയും വിയോഗം അധ്യാപകർക്കും സഹപാഠികൾക്കും താങ്ങാനാവുന്നതിലും അപ്പുറമായിരുന്നു. സ്കൂൾ വരാന്തകളിൽ ഇനി അവരുടെ ചിരികളില്ല, ബഹളങ്ങളില്ല. പ്രിയപ്പെട്ട കൂട്ടുകാരെ അവസാനമായി ഒരുനോക്ക് കാണാൻ എത്തിയ കുരുന്നുകളുടെയും അധ്യാപകരുടെയും തേങ്ങൽ കണ്ടുനിന്നവരുടെ ചങ്ക് തകർക്കുന്നതായിരുന്നു. സ്കൂൾ അങ്കണത്തിൽ പൊതുദർശനത്തിന് വെച്ചപ്പോൾ നാടൊന്നാകെ ആ കുരുന്നുകൾക്ക് വിടനൽകാൻ ഒഴുകിയെത്തി.

​

​ഞായറാഴ്ച രാവിലെ പകര ജുമാ മസ്ജിദ് ഖബർസ്ഥാനിൽ വൻ ജനവലിയുടെ സാന്നിധ്യത്തിലായിരുന്നു ഖബറടക്കം. മരണത്തിലും വേർപിരിയാതെ ആ കുഞ്ഞുങ്ങൾക്കായി അടുത്തടുത്തായി തന്നെ ഖബറുകൾ ഒരുക്കി. ജീവിതത്തിൽ എന്നപോലെ മരണാനന്തരവും അവർക്ക് കൂട്ടിരിക്കാൻ വിധി ഒരേ ഇടം തന്നെ നൽകി.

​ഒരു നാടിന്റെയാകെ പ്രതീക്ഷകളായിരുന്ന രണ്ട് പൊന്നോമനകളുടെ വേർപാടിൽ കുടുംബാംഗങ്ങളുടെ വേദനയിൽ പ്രദേശം മുഴുവൻ പങ്കുചേരുകയാണ്. തങ്ങളുടെ പ്രിയപ്പെട്ട 'കളിക്കൂട്ടുകാർക്ക്' കണ്ണീരോടെ നാട് വിടചൊല്ലി.